Kapítulo Diesnuebe
Sigui Papia e Palabra di Dios ku Tur Frankesa
1. (a) Ki bon notisia e disipelnan di Hesus a proklamá, pero kon algun hudiu a reakshoná? (b) Kiko nos lo por puntra?
KASI 2.000 aña pasá, e Yu di Dios, Hesukristu, a ser ungí komo e futuro Rei di henter mundu. Hesus a haña kastigu di morto riba instigashon di enemigunan religioso, pero Yehova a lant’é for di morto. Awor bida eterno a bira posibel via Hesus. Sin embargo, ora Hesus su disipelnan a proklamá e bon notisia aki públikamente, hende a kuminsá persiguí nan. Nan a sera algun disipel den prizòn, i asta a suta nan i taha nan di papia tokante Hesus. (Echonan 4:1-3, 17; 5:17, 18, 40) Kiko e disipelnan lo a hasi? Kiko abo lo a hasi? Lo bo a sigui duna testimonio ku tur frankesa?
2. (a) Ki notisia maravioso mester ser proklamá den nos tempu? (b) Ken tin e responsabilidat di prediká e bon notisia?
2 Na aña 1914 Hesukristu, e Rei dje Reino di Dios, a ser entronisá den shelu pa goberná ‘meimei di su enemigunan.’ (Salmo 110:2) Despues di esei, a tira Satanas i su demoñonan abou riba tera. (Revelashon 12:1-5, 7-12) Asina e último dianan dje sistema malbado aki a kuminsá. Ora e periodo aki terminá, Dios lo destruí henter e sistema di kosnan dominá pa Satanas. (Daniel 2:44; Mateo 24:21) Esnan ku sobrebibí lo tin nan dilanti e speransa di bida eterno riba un tera ku lo bira un paradeis. Si bo a aseptá e bon notisia aki, lo bo kier kompartié ku otro hende. (Mateo 24:14) Pero ki reakshon bo por ferwagt?
3. (a) Kon hende ta reakshoná riba e mensahe di Reino? (b) Ki pregunta nos tin ku kontestá pa nos mes?
3 Ora bo ta proklamá e bon nobo di Reino, algun hende lo risibié ku gustu, pero mayoria lo no ta interesá. (Mateo 24:37-39) Tin hende tal bes ta hasi bofon di bo òf ta bai kontra bo. Hesus a spièrta ku kisas bo propio famia lo por bai kontra bo. (Lukas 21:16-19) Kisas e oposishon ta bini tambe di hende na bo trabou òf na skol. Den algun parti di mundu, gobièrnu a prohibí e aktividat di Testigunan di Yehova. Si bo haña bo den un situashon asina, lo bo sigui papia e palabra di Dios ku kurashi i “para firme den fe”?—1 Korintionan 16:13.
No Konfia den Nos Mes Forsa
4. (a) Kiko ta un rekisito esensial si nos kier ta fiel sirbidó di Dios? (b) Dikon reunionnan kristian ta asina importante?
4 Pa nos ta fiel sirbidó di Yehova ta esensial pa nos konfia den loke el a perkurá pa nos bienestar spiritual. Un di esakinan ta reunionnan di kongregashon. E Skritura ta urgi nos pa no neglishá nan. (Hebreonan 10:23-25) Hende ku a sigui komo fiel Testigu di Yehova a hasi esfuerso vigoroso pa asistí regularmente na reunion huntu ku kompañeronan di adorashon. Na e reunionnan aki nos ta oumentá nos konosementu dje Skritura. Tambe nos ta haña komprendementu mas profundo di bèrdatnan bon konosí, i ta bira mas konsiente di maneranan ku nos por apliká nan. Nos ta sera mas ku nos rumannan kristian den adorashon uní i ta haña mas fortalesa pa hasi Dios su boluntat. Yehova su spiritu ta perkurá guia via e kongregashon, i mediante e spiritu ei, Hesus ta meimei di nos.—Mateo 18:20; Revelashon 3:6.
5. Ora e aktividat di Testigunan di Yehova ta prohibí, kiko ta pasa ku e reunionnan?
5 Bo ta asistí regularmente na tur reunion, i bo ta apliká personalmente loke ta ser tratá na reunion? Tin biaha, ora e aktividat di Testigunan di Yehova ta prohibí, ta nesesario pa tene e reunionnan den grupo chikí na kasnan privá. E lugá i ora por varia i kisas no ta semper kumbiniente, ya ku tin reunion ta ser tené anochi lat. Pero apesar di inkumbiniensia personal òf peliger, rumannan fiel ta hasi esfuerso sinsero pa ta presente na tur reunion.
6. Kon nos ta demostrá ku nos ta konfia den Yehova, i kon esaki por yuda nos sigui papia ku tur frankesa?
6 Nos ta desaroyá konfiansa den Yehova dor di akudí regularmente na dje den orashon sinsero, realisando ku nos tin mester di Dios su yudansa. Abo ta hasi esei? Hesus a hasi orashon ku frekuensia durante su ministerio riba tera. (Lukas 3:21; 6:12, 13; 22:39-44) I e anochi promé ku nan a klab’é na staka, el a urgi su disipelnan: “Keda vigilá i hasi orashon, pa boso no kai den tentashon.” (Marko 14:38) Si nos ta haña hopi hende ku no ta interesá den e mensahe di Reino, nos lo por sinti gana di baha man na nos sirbishi. Si hende ta hasi bofon di nos òf ta persiguí nos, kisas nos ta sinti gana di stòp di prediká pa evitá problema. Pero si sinseramente nos ta pidi Dios den orashon pa su spiritu yuda nos sigui papia ku tur frankesa, nos lo haña fortalesa pa no entregá na e deseonan ei.—Lukas 11:13; Efesionan 6:18-20.
Un Registro di Duna Testimonio ku Tur Frankesa
7. (a) Dikon e registro den Echonan ta spesialmente interesante pa nos? (b) Kontestá e preguntanan ku tin na fin dje paragraf aki, enfatisando kon e informashon por benefisiá nos.
7 E registro ku tin den e buki di Echonan ta spesialmente interesante pa nos tur. E ta konta nos kon e apòstelnan i otro disipelnan di promé siglo—hende ku tabatin sintimentu meskos ku nos—a vense opstákulo i a duna prueba di ta testigunan fiel di Yehova ku kurashi. Laga nos eksaminá un parti dje registro ei ku yudansa dje siguiente preguntanan i tekstonan bíbliko. Segun ku nos ta hasi esei, konsiderá kon bo por benefisiá personalmente di loke bo ta lesa.
E apòstelnan tabata hòmbernan bon eduká? Nan tabata hende ku di naturalesa tabatin kurashi, sin importá kiko pasa? (Huan 18:17, 25-27; 20:19; Echonan 4:13)
Kiko a duna Pedro kurashi pa papia dilanti e korte hudiu ku a kondená e propio Yu di Dios? (Mateo 10:19, 20; Echonan 4:8)
Kiko e apòstelnan tabata hasi durante e simannan promé ku nan a wòrdu hibá dilanti di Sanedrin? (Echonan 1:14; 2:1, 42)
Ora e gobernantenan a taha e apòstelnan di prediká den nòmber di Hesus, kiko Pedro ku Huan a kontestá? (Echonan 4:19, 20)
Despues ku e apòstelnan a haña nan libertat, na ken nan a bolbe akudí pa yudansa? Nan a pidi pa e persekushon stòp, òf kiko nan a pidi? (Echonan 4:24-31)
Kiko Yehova a usa pa yuda nan ora opositor a purba stòp e trabou di prediká? (Echonan 5:17-20)
Kon e apòstelnan a demostrá ku nan a komprendé e motibu pakiko nan a haña nan libertat? (Echonan 5:21, 41, 42)
Asta ora hopi dje disipelnan a plama bai otro kaminda debí na persekushon, kiko nan a sigui hasi? (Echonan 8:3, 4; 11:19-21)
8. Ki resultadonan emoshonante e predikashon dje promé disipelnan tabatin, i kon bini nos tin un partisipashon den e mesun sirbishi?
8 E trabou di prediká e bon nobo no tabata enbano. Rònt di 3.000 disipel a batisá na Pentekòste di aña 33 Era Komun. “Konstantemente tabata bin mas i mas hende aserka ku tabata kere den Señor, multitutnan di hòmber i muhé.” (Echonan 2:41; 4:4; 5:14) Ku tempu, asta un persiguidó feros di Dios su pueblo, Saulo di Tarso, a bira un kristian i a kuminsá duna testimonio dje bèrdat ku kurashi. El a bira mihó konosí komo apòstel Pablo. (Galationan 1:22-24) E trabou ku a kuminsá den promé siglo no a stòp. E aktividat ei a oumentá den e último dianan aki i a yega den tur skina di mundu. Nos tin e privilegio di partisipá den dje, i segun ku nos ta hasi esei, nos por siña dje ehèmpel di testigunan fiel ku a sirbi promé ku nos.
9. (a) Pablo a probechá di ki oportunidatnan pa e duna testimonio? (b) Den ki maneranan abo ta plama e mensahe di Reino na otro hende?
9 Kiko Pablo a hasi ora el a siña e bèrdat tokante Hesukristu? “Mesora el a kuminsá proklamá Hesus . . . , bisando: ‘E ta e Yu di Dios.’” (Echonan 9:20) El a apresiá e bondat inmeresí ku Dios a mustra na dje, i el a realisá ku tur hende tin ku tende e bon notisia ku el a risibí. Pablo tabata un hudiu, i segun e kustumber dje tempu ei, el a bai na e snoanan pa duna testimonio. Tambe el a prediká di kas pa kas i a rasoná ku hende na plasa. E tabata dispuesto pa muda bai teritorionan nobo pa prediká e bon notisia.—Echonan 17:17; 20:20; Romanonan 15:23, 24.
10. (a) Kon Pablo, maske e tabatin tur frankesa, a mustra komprendementu den e manera ku el a duna testimonio? (b) Kon nos por reflehá e kualidatnan di Pablo ora nos ta duna testimonio na famia, kolega i kompañero di skol?
10 Pablo a papia ku tur frankesa pero tambe a mustra komprendementu, i esei ta loke nos tambe mester hasi. Ku hudiu el a basa su kòmbersashon riba e promesanan ku Dios a hasi na nan antepasadonan. Ku griego el a basa su kòmbersashon riba e kosnan ku nan tabata familiarisá kuné. Tabatin biaha ku el a usa su mes eksperensia tempu el a konosé e bèrdat komo un medio pa duna testimonio. El a bisa: “Mi ta hasi tur kos pa kousa dje bon nobo, pa mi por bira un partisipante di dje ku otronan.”—1 Korintionan 9:20-23, NW; Echonan 22:3-21.
11. (a) Kiko Pablo a hasi pa evitá ku kada bes tabatin konfrontashon ku hende ku tabata kontra? (b) Ki ora ta sabí pa nos imitá Pablo su ehèmpel, i den ki manera? (c) Di unda e poder pa sigui papia ku kurashi ta bini?
11 Ora ku debí na oposishon a parse ku tabata mihó pa Pablo bai prediká den un otro área pa un tempu, el a hasi esei en bes di sigui buska konfrontashon ku esnan ku tabata kontra dje. (Echonan 14:5-7; 18:5-7; Romanonan 12:18) Pero nunka e tabatin bèrgwensa dje bon nobo. (Romanonan 1:16) Ounke Pablo no a gusta e trato insolente—asta violento—ku el a haña na man di hende ku tabata kontra, tòg “den nos Dios [e] tabatin e kurashi” pa sigui prediká. El a bisa: “Señor a para na mi lado i a fortalesé mi, pa dor di mi e predikamentu wòrdu kumplí totalmente.” (1 Tesalonisensenan 2:2; 2 Timoteo 4:17) Hesus, Kabes dje kongregashon kristian, ta sigui duna nos e poder ku nos mester pa hasi e trabou ku el a profetisá pa nos tempu.—Marko 13:10.
12. Kiko ta duna prueba di kurashi kristian, i kiko ta e base pa esei?
12 Nos tin tur motibu pa sigui papia e palabra di Dios ku tur frankesa i kurashi, manera Hesus i e otro fiel sirbidónan di Dios a hasi den promé siglo. Esaki no ta nifiká ku nos ta demostrá falta di konsiderashon òf ta fòrsa hende pa nan tende nos mensahe tòg. Pero nos no ta entregá pasobra hende no ta interesá; ni nos no ta keda ketu pasobra tin hende ku ta kontra. Meskos ku Hesus, nos ta hala atenshon na e Reino di Dios komo e gobièrnu legítimo pa henter mundu. Nos ta papia ku konfiansa pasobra nos ta representá Yehova, e Soberano di universo, i pasobra e mensahe ku nos ta proklamá no ta bini di nos sino for di dje. I ta nos amor pa Yehova mester ta e motibu mas fuerte ku ta pone nos alab’é.—Filipensenan 1:27, 28; 1 Tesalonisensenan 2:13.
Komo Repaso
• Dikon ta importante pa nos kompartí e mensahe di Reino ku tur hende posibel, pero ki reakshon nos por ferwagt?
• Kon nos por demostrá ku nos no ta konfia den nos mes forsa pa sirbi Yehova?
• Ki lèsnan balioso nos ta siña for dje buki di Echonan?
[Plachi na página 173]
Meskos ku den pasado, Yehova su sirbidónan djawe ta papia e palabra di Dios ku kurashi