Kapítulo Binti
Tene e Dia di Yehova Bon na Mente
1. Kon bo a sinti ora bo a siña ku pronto Yehova lo libra nos dje dolónan dje sistema bieu aki?
UN DJE promé kosnan ku bo a siña for di Beibel ta Yehova su propósito pa hasi henter e tera un paradeis. Den e mundu nobo ei lo no tin guera, krímen, pobresa, malesa, sufrimentu ni morto mas. Asta e mortonan lo haña bida bèk. Ki un futuro maravioso! Loke ta komprobá ku tur e kosnan ei ta serka di kumpli ta e echo ku Kristu su presensia invisibel komo Rei na mando a kuminsá na aña 1914 i ku for di e tempu ei padilanti nos ta den e último dianan dje mundu malbado aki. Ora fin di e último dianan aki yega, Yehova lo destruí e sistema di kosnan aki i introdusí e mundu nobo primintí!
2. Kiko ta “e dia di Yehova”?
2 Beibel ta yama e binidero dia di destrukshon aki “e dia di Yehova.” (2 Pedro 3:10, NW) E ta “e dia di e rabia di SEÑOR” kontra henter e mundu di Satanas. (Sofonías 2:3) E ta kulminá den “e guera di e gran dia di Dios Todopoderoso . . . , ku na lenga hebreo yama Armagedon.” Den e guera ei “e reinan di henter mundu” lo ser destruí. (Revelashon 16:14, 16) Bo bida ta demostrá ku bo ta konvensí ku e “dia di Yehova” aki ta serka?—Sofonías 1:14-18; Yeremías 25:33.
3. (a) Ki tempu e dia di Yehova lo yega? (b) Pakiko ta bon ku Yehova no a revelá “e dia i e ora ei”?
3 Beibel no ta duna nos e fecha eksakto ku Hesukristu lo bini komo Esun ku Yehova ta usa pa ehekutá huisio kontra e sistema di kosnan di Satanas. Hesus a bisa: “Di e dia i e ora ei ni un hende no sa, ni e angelnan den shelu tampoko, ni e Yu, sino e Tata so.” (Marko 13:32) Esnan ku no ta ègt stima Yehova lo tin e inklinashon di posponé su dia den nan mente i bai okupá nan mes ku aktividatnan di mundu. Pero esnan ku di bèrdat ta stima Yehova lo sirbié di henter alma, sin wòri ki dia e fin dje mal sistema di kosnan aki ta yega.—Salmo 37:4; 1 Huan 5:3.
4. Ki atvertensia Hesus a duna?
4 Den un palabra di atvertensia na tur hende ku stima Yehova, Hesus ta bisa: “Tene kuidou, keda alerta, pasobra boso no sa ki ora e tempu ta yega.” (Marko 13:33-37) El a urgi nos pa no laga komementu i bebementu ni “preokupashonnan di bida” apsorbá nos atenshon asina tantu ku nos ta pèrdè for di bista e seriedat di nos tempu.—Lukas 21:34-36; Mateo 24:37-42.
5. Manera Pedro a splika, kiko e dia di Yehova lo trese?
5 Pedro tambe a konsehá nos pa tene bon na mente “e dia di Dios, pa kual motibu e shelunan lo wòrdu destruí dor di kimamentu, i e elementonan lo dirti di kalor intenso.” Tur gobièrnu humano—“e shelunan” lo ser destruí. Destrukshon lo bini tambe riba e sosiedat humano malbado en general—“e tera”—i su “elementonan,” e ideanan i aktividatnan dje mundu malbado aki, manera por ehèmpel mundu su aktitut independiente di Dios i su estilo di bida inmoral i materialista. Lo remplasá esaki ku “shelunan nobo [Dios su Reino selestial] i un tera nobo [un sosiedat nobo riba tera], den kual ta biba hustisia.” (2 Pedro 3:10-13) E susesonan devastador aki lo tuma lugá di ripiente i riba un dia i ora inesperá.—Mateo 24:44.
Keda Alerta pa e Señal
6. (a) Te na ki grado Hesus su kontesta riba e pregunta di su disipelnan a apliká na e fin dje sistema hudiu? (b) Ki porshon di Hesus su kontesta ta enfoká atenshon riba suseso i aktitutnan di aña 1914 padilanti?
6 En bista dje tempu ku nos ta biba aden, nos mester ta bon na altura di e detayenan dje señal kombiná ku ta identifiká e último dianan, “e konklushon dje sistema di kosnan.” Kòrda ku ora Hesus a kontestá e pregunta di su disipelnan, ku ta pará skirbí na Mateo 24:3 [NW], algun dje kosnan ku el a deskribí den versíkulo 4 te ku 22 a kumpli na un eskala chikí riba e nashon hudiu i nan sistema di bida entre aña 33 pa 70 Era Komun. Pero e profesia tabatin su kumplimentu prinsipal for di aña 1914 padilanti, e tempu di Kristu su “presensia i dje konklushon dje sistema di kosnan.” Mateo 24:23-28 ta konta kiko lo a tuma lugá for di aña 70 Era Komun te na e tempu di Kristu su presensia. E desaroyonan deskribí na Mateo 24:29–25:46 ta tuma lugá durante e tempu di fin.
7. (a) Dikon kada un di nos mester ta alerta pa e manera ku kondishonnan aktual ta kumpli ku e señal? (b) Kontestá e preguntanan na fin dje paragraf aki pa mustra kon e señal a kuminsá kumpli for di 1914.
7 Kada un di nos mester ta alerta pa susesonan i aktitutnan ku ta kumpli ku e señal. Konektando esakinan ku profesia bíbliko lo yuda nos tene e dia di Yehova bon na mente. Tambe nos lo por ta mas konvinsente ora nos ta spièrta otro hende ku e dia ei ta hopi serka. (Isaías 61:1, 2) Ku e metanan ei na mente, laga nos repasá e siguiente preguntanan ku ta destaká sierto parti dje señal, ku ta pará skirbí na Mateo 24:7 i Lukas 21:10 i 11.
Den ki manera ekstraordinario e profesia ku “nashon lo lanta kontra nashon, i reino kontra reino” a kumpli kuminsando na 1914? Pa loke ta guera, kiko a pasa for di e tempu ei padilanti?
Na 1918, kua pèst a mata mas hende ku Promé Guera Mundial? Apesar di hende su konosementu médiko, kua malesanan ainda ta mata miónes di persona?
Te na ki grado skarsedat di kuminda a afektá mundu apesar dje adelantonan sientífiko di siglo pasá?
Kiko ta konvensé bo ku 2 Timoteo 3:1-5 i 13 ta deskribí, no kon bida semper tabata, sino kon e situashon aktual ta empeorando segun ku nos ta yegando fin dje último dianan?
Separashon di Hende
8. (a) Kiko mas, deskribí na Mateo 13:24-30 i 36-43, Hesus a asosiá ku fin dje tempu aki? (b) Kiko e ilustrashon di Hesus ta nifiká?
8 Tin mas desaroyonan importante ku Hesus a asosiá ku fin dje tempu aki. Un di nan ta e separashon di “e yunan di e reino” for di “e yunan di e malbado.” Hesus a papia di esaki den su parábola òf komparashon tokante un kunuku sembrá ku trigu. Un enemigu a bini i sembra yerba shimaron meimei di e trigu. “E trigu” den su ilustrashon ta representá e berdadero kristiannan ungí. “E yerba shimaron” ta hende ku ta bisa ku nan ta kristian pero ku ta duna prueba di ta “yunan di e malbado” pasobra nan ta pega n’e mundu ku Diabel ta manda riba dje. E personanan aki ta ser separá for di “e yunan di [Dios su] reino” i marká pa destrukshon. (Mateo 13:24-30, 36-43) Di bèrdat e separashon aki a tuma lugá?
9. (a) Despues di Promé Guera Mundial, ki gran separashon di tur hende ku tabata bisa ku nan ta kristian a tuma lugá? (b) Kon kristiannan ungí a duna prueba ku nan ta e berdadero sirbidónan dje Reino?
9 Despues di Promé Guera Mundial, tur hende ku tabata bisa ku nan ta kristian a keda separá den dos grupo: (1) E pastornan di kristiandat i nan siguidónan, ku públikamente a deklará nan apoyo fuerte na e Liga di Nashonnan (awor Nashonnan Uní) i na mesun tempu a keda tene duru na nashonalismo, i (2) kristiannan berdadero dje temporada despues di guera, ku a duna nan pleno sosten na Dios su Reino Mesiániko i no na e nashonnan dje mundu aki. (Huan 17:16) E di dos grupo aki a duna prueba di ta e berdadero sirbidónan dje Reino di Dios dor di aseptá e tarea di prediká “e evangelio aki di e reino” rònt mundu. (Mateo 24:14) Ku ki resultado?
10. Kiko tabata e promé resultado dje aktividat di prediká e Reino?
10 E restu di esnan ungí ku Dios su spiritu, kendenan tin e speransa di ta huntu ku Kristu komo parti dje Reino selestial, tabata e proménan pa ser rekohé. Ounke e personanan ei tabata plamá den e nashonnan, a trese nan den un solo organisashon. E seyamentu final dje ungínan aki ta serka.—Revelashon 7:3, 4.
11. (a) Ki trabou di rekohementu ta sigui te awe, i na armonia ku kua profesia? (b) Kiko kumplimentu dje profesia aki ta nifiká?
11 Despues, bou di guia di Kristu, a kuminsá reuní “un multitut grandi . . . di tur nashon i tur tribu i pueblo i lenga.” Esakinan ta forma e “otro karnénan” ku lo sobrebibí “e gran tribulashon” i drenta den Dios su mundu nobo. (Revelashon 7:9, 14; Huan 10:16) E trabou aki di prediká e Reino di Dios promé ku e fin bini, ta sigui te awe. Fielmente e multitut grandi di otro karné, ku awor ta konsistí di miónes di hende, ta yuda e restu ungí duna publisidat na e mensahe vital dje Reino. Den tur nashon hende ta tende e mensahe aki.
Kiko Ta Bai Sosodé den Futuro?
12. Kuantu tempu mas nos tin ku prediká promé ku e dia di Yehova yega?
12 Tur e evidensia menshoná ariba ta nifiká ku nos ta serka dje fin di e último dianan i ku Yehova su dia ta tras di porta. Pero tin mas profesia ku tin ku kumpli promé ku e dia inspirador di temor ei kuminsá? Sí. Pa kuminsá, ainda no a kaba di separá hende en konekshon ku e kuestion di Reino. Den algun área kaminda pa años tabatin oposishon intenso, awor tin un oumento di disipel nobo. Asta kaminda hende ta rechasá e bon nobo, Yehova su miserikòrdia ta keda demostrá ora nos ta duna testimonio. Pues, sigui ku e trabou! Hesus ta sigurá nos ku ora e trabou ta kla, e fin lo bini.
13. Manera ta pará skirbí na 1 Tesalonisensenan 5:2 i 3, ki suseso remarkabel tin ku tuma lugá ainda, i kiko esei lo nifiká pa nos?
13 Segun un otro profesia bíbliko sumamente importante: “Miéntras ku nan ta bisa: ‘Pas i siguridat!’ pèrdishon lo bin riba nan di ripiente, manera doló di parto riba un muhé na estado; i nan lo no skapa.” (1 Tesalonisensenan 5:2, 3) Tempu lo mustra kon e proklamashon ei di “pas i siguridat” lo tuma lugá. Pero un kos ta sigur, lo e no nifiká ku lidernan di mundu realmente a solushoná e problemanan di humanidat. E proklamashon ei lo no gaña hende ku ta tene Yehova su dia bon na mente. Nan sa ku mesora despues di esei, destrukshon repentino lo bini.
14. Ki susesonan lo tuma lugá durante e gran tribulashon, i den ki sekuensia?
14 Na komienso dje gran tribulashon, e gobernantenan lo bira kontra Babilonia e Grandi, e imperio mundial di religion falsu, i lo destruyé. (Mateo 24:21; Revelashon 17:15, 16) Despues di esei, e nashonnan lo bira kontra esnan ku ta sostené Yehova su gobernashon supremo. Esaki lo provoká Yehova su furia kontra gobièrnunan polítiko i nan apoyadónan, i lo resultá den nan destrukshon kompleto. Esei lo ta Armagedon, e kulminashon dje gran tribulashon. Anto Satanas i su demoñonan lo ser tirá den abismo, i lo no por influensiá humanidat mas. Esaki lo konkluí e dia di Yehova, ora ku su nòmber lo ser santifiká.—Ezekiel 38:18, 22, 23; Revelashon 19:11–20:3.
15. Dikon lo no ta sabí pa rasoná ku e dia di Yehova ta hopi leu ainda?
15 Fin dje sistema aki lo bini presis na ora, segun Dios su orario. Lo e no ta lat. (Habakuk 2:3) Kòrda ku e destrukshon di Yerusalèm na aña 70 Era Komun a bini rápidamente, ora ku e hudiunan no a sper’é, ora ku nan a pensa ku e peliger a pasa. I kiko di antiguo Babilonia? E tabata poderoso, sigur di su mes i fortifiká ku murayanan inmenso. Pero el a kai den un solo anochi. Asina tambe, destrukshon repentino lo bini riba e mal sistema di kosnan aki. Ora e sosodé, lagu’é haña nos uní den adorashon berdadero, teniendo e dia di Yehova bon na mente.
Komo Repaso
• Dikon ta vital pa tene e dia di Yehova bon na mente? Kon nos por hasi esei?
• E separashon di hende ku ta tumando lugá tin ki influensia riba nos personalmente?
• Kiko tin ku sosodé den futuro ainda promé ku e dia di Yehova kuminsá? Pues, kiko kada un di nos mester ta hasiendo?
[Plachi na página 180]
Pronto e último dianan lo terminá ora destruí e sistema di Satanas