Kapítulo Bintiun

Yehova Su Propósito Ta Alkansá Éksito Glorioso

1, 2. (a) Kiko ta Yehova su propósito relashoná ku su kriaturanan inteligente? (b) Ken a forma parti di Dios su famia uní di adoradó?

YEHOVA su propósito ta pa tur kriatura inteligente ta uní den adorashon di e úniko Dios berdadero i pa nan tur disfrutá di libertat glorioso komo yunan di Dios. Amante di hustisia tambe ta deseá esei sinseramente.

² Yehova a kuminsá kumpli ku e gran propósito aki ora el a kuminsá ku su obranan di kreashon. Su promé kreashon tabata un Yu ku desde su resurekshon ta “e resplandor di [Dios] su gloria i e representashon eksakto di su naturalesa.” (Hebreonan 1:1-3) E Yu aki tabata úniko, ya ku ta Dios so a kre’é. Despues, tabata via e Yu aki ku a krea tur otro kos: promé e angelnan den shelu, despues hende riba tera. (Job 38:7; Lukas 3:38) Tur e kriaturanan aki a forma un solo famia universal. Pa nan tur, Yehova tabata Dios, e Soberano di universo, i nan Tata amoroso.

3. (a) Kiko nos tur a heredá for di nos promé mayornan? (b) Ki areglo amoroso Yehova a hasi pa Adam su desendientenan?

³ Ora Dios a sentensiá nos promé mayornan humano na morto komo pekador boluntario, el a saka nan for di Eden i a nenga nan komo yu. Nan no tabata forma parti mas di su famia universal. (Génesis 3:22-24; Deuteronomio 32:4, 5) Nos tur ta nan desendiente, p’esei nos a nase ku e inklinashon pa hasi piká. Pero Yehova tabata sa ku algun desendiente di Adam ku Eva lo stima hustisia. P’esei amorosamente el a hasi un areglo pa esakinan por a alkansá “e libertat glorioso di e yunan di Dios.”—Romanonan 8:20, 21.

Israel Ta Pèrdè Nan Posishon Privilegiá

4. Ki privilegio Yehova a konsedé antiguo Israel?

⁴ Un 2.500 aña despues di kreashon di Adam, Yehova a konsedé sierto hende e privilegio di tin un relashon spesial kuné. El a skohe antiguo Israel pa ta su pueblo i a duna nan su Lei. (Génesis 12:1, 2) El a organisá nan komo nashon i a usa nan en konekshon ku su propósito. (Deuteronomio 14:1, 2; Isaías 43:1) Sin embargo, ainda nan tabata katibu di piká i morto, pues nan no a disfrutá dje libertat glorioso ku Adam ku Eva tabatin originalmente.

5. Kon e israelitanan a pèrdè nan posishon spesial ku Dios?

⁵ Pero tòg e israelitanan tabatin un posishon privilegiá serka Dios. Tambe nan tabatin e responsabilidat di respetá Yehova komo nan Tata i traha na armonia ku su propósito. Hesus a enfatisá e importansia di kumpli ku e obligashon ei. (Mateo 5:43-48) Sin embargo, e nashon di Israel no a hasi esaki. Ounke e hudiunan ei a pretendé ku “nos tin ún Tata, esta Dios,” Hesus a deklará ku nan akshonnan i e aktitut ku nan a demostrá a kontradisí e palabranan ei. (Huan 8:41, 44, 47) Na aña 33 Era Komun, Dios a pone fin na e Lei i na su relashon spesial ku Israel. Pero esaki a nifiká ku nunka mas hende lo por a disfrutá di un relashon spesial ku Dios?

Reuniendo ‘Loke Ta den Shelu’

6. Kiko ta e propósito dje “atministrashon” ku Pablo a menshoná na Efesionan 1:9 i 10?

⁶ Apòstel Pablo a mustra ku algun hende lo disfrutá di un relashon spesial ku Dios. Por ehèmpel, Pablo a skirbi lo siguiente tokante e areglo ku Yehova a hasi pa esnan ku ehersé fe den dje por bira miembro di Su kas: “[Dios] a hasi konosí na nos e misterio di su boluntat, segun su bon intenshon ku el a proponé den su mes, pa, komo preparashon [atministrashon, NW] di e kumplimentu di e tempunan, e reuní huntu tur kos den Kristu, tantu loke ta den e shelunan komo loke ta riba tera.” (Efesionan 1:9, 10) E “atministrashon” aki ta drei rònt di Hesukristu. Via dje, hende ta haña un kondishon aprobá dilanti Dios. Un kantidat limitá di hende tin e perspektiva di bai biba den shelu. Un kantidat hopi mas grandi lo biba riba tera pa semper.

7. Ken ta “loke ta den e shelunan”?

⁷ Kuminsando promé na Pentekòste di aña 33 Era Komun, a duna atenshon na “loke ta den e shelunan,” esta, esnan ku lo ta ko-heredero ku Kristu den e Reino selestial. A base di nan fe den e balor dje sakrifisio di Hesus, Dios a deklará nan hustu. (Romanonan 5:1, 2) Ku tempu, e grupo ei a bin inkluí hudiu i hende ku no ta hudiu, i “loke ta den e shelunan” lo a alkansá un kantidat di 144.000 persona. (Galationan 3:26-29; Revelashon 14:1) Ta un restu di nan so ta riba tera ainda.

Reuniendo “Loke Ta Riba Tera”

8. Ken ta “loke ta riba tera,” i ki relashon nan tin ku Yehova?

⁸ E mesun atministrashon ta reuniendo tambe “loke ta riba tera.” Miónes di hende ta ser reuní awor ku e speransa di biba pa semper riba tera. Den union ku e restu di herederonan di Reino, nan ta engrandesé e nòmber di Yehova i ta halsa su adorashon. (Isaías 2:2, 3; Sofonías 3:9) Nan tambe ta yama Yehova “Tata” pasobra nan ta rekonos’é komo e fuente di bida. I nan ta gosa di Dios su aprobashon a base di nan fe den Hesus su sanger dramá. (Revelashon 7:9, 14) Pero komo ku ainda nan ta imperfekto, ta den futuro nan lo ser rekonosé plenamente komo yunan di Dios.

9. Ki promesa Romanonan 8:21 ta ofresé humanidat?

⁹ E hendenan aki ku tin speransa di biba riba tera, ansiosamente ta spera e tempu ora ku e kreashon humano lo “wòrdu librá for di su sklabitut na korupshon.” (Romanonan 8:21) Nan liberashon lo kuminsá despues ku Kristu i su ehérsito selestial finalisá e gran tribulashon ku lo kulminá den Armagedon. Esaki lo nifiká destrukshon di henter e sistema di kosnan malbado di Satanas, siguí pa e bendishonnan di Kristu su Reinado di Mil Aña den poder di Reino.—Revelashon 19:17-21; 20:6.

10. Yehova su sirbidónan lo kanta kua kantika di alabansa?

¹⁰ Esta emoshonante lo ta ora e sirbidónan di Yehova riba tera uni pa ripití e sintimentunan di su sirbidónan den shelu, kende ku goso ta proklamá: “Grandi i maravioso bo obranan ta, o SEÑOR Dios Todopoderoso; hustu i berdadero bo kamindanan ta, abo, Rei di e nashonnan. Ken lo no teme, o SEÑOR, i glorifiká bo nòmber? Pasobra abo so ta santu; pasobra tur e nashonnan lo bin i adorá bo dilanti; pasobra bo obranan hustu a wòrdu revelá.” (Revelashon 15:3, 4) Sí, tur sirbidó di Yehova lo uni den adorashon dje úniko Dios berdadero. Asta e mortonan lo resusitá i haña e oportunidat di uni nan bos den alabansa na Yehova.—Echonan 24:15.

Libertat Maravioso den Futuro

11. Ki libertat maravioso hende ku sobrebibí e gran tribulashon lo tin?

¹¹ Despues ku e gran tribulashon, ku lo kulminá den Armagedon, a limpia mundu di maldat, Satanas e Diabel lo no ta “dios di e mundu aki” mas. Adoradónan di Yehova lo no tin ku lucha mas kontra Satanas su mal influensia. (2 Korintionan 4:4; Revelashon 20:1, 2) Religion falsu lo no duna informashon robes tokante Yehova mas ni lo no sirbi komo un influensia ku ta kousa desunion den sosiedat humano. Sirbidónan dje Dios berdadero lo no sufri di inhustisia mas ni di abusu na man di outoridatnan humano. Ki un libertat maravioso nan lo tin!

12. Kon tur hende lo libra di piká i su efektonan?

¹² Hesus, komo “e Lamchi di Dios ku ta kita piká di mundu,” lo apliká e balor di su sakrifisio i asina anulá piká di humanidat. (Huan 1:29) Tempu Hesus tabata riba tera i a pordoná e pikánan di un persona, el a kura e persona ei komo prueba di esaki. (Mateo 9:1-7; 15:30, 31) Di igual manera Kristu Hesus, komo Rei selestial dje Reino di Dios, milagrosamente lo kura hende siegu, muda, surdu, mankaron, mentalmente afligí i esnan ku tin kualkier otro malesa. (Revelashon 21:3, 4) E “lei di piká” di tur hende obediente lo ser anulá, di manera ku nan pensamentunan i akshonnan lo agradá nan mes i tambe Dios. (Romanonan 7:21-23) Pa fin dje Mil Aña, nan lo a alkansá perfekshon humano, den e ‘imágen i semehansa’ dje úniko Dios berdadero.—Génesis 1:26.

13. Ki akshon Kristu lo tuma na fin dje Reinado di Mil Aña, i ku ki resultado?

¹³ Despues ku Kristu hiba humanidat na perfekshon, lo e duna su Tata e outoridat bèk ku el a risibí pa hasi e trabou aki: “E ta entregá e reino na Dios Tata, ora ku el a pone un fin na tur dominio i na tur outoridat i poder. Pasobra e mester reina te ora ku [Dios] a pone tur su enemigunan bou di su pia.” (1 Korintionan 15:24, 25) E Reinado di Mil Aña dje Reino lo a kumpli kabalmente ku su propósito; p’esei lo no ta nesesario mas pa e gobièrnu ousiliar aki keda entre Yehova i humanidat. I ya ku piká i morto a keda kompletamente eliminá i humanidat ta reskatá, no tin mester di Hesus mas komo Reskatador. Beibel ta splika: “E ora ei e Yu mes tambe lo wòrdu sometí na Esun, kende a someté tur kos na dje, pa Dios por ta tur den tur.”—1 Korintionan 15:28.

14. Hende perfekto lo ser someté na kiko, i dikon?

¹⁴ Despues di esaki, humanidat perfekto lo haña e chèns di demostrá ku nan ta skohe pa sirbi e úniko Dios berdadero pa semper. P’esei, promé ku Yehova adoptá nan kompletamente komo su yu, lo e someté tur hende perfekto na un prueba final. Lo e lòs Satanas i su demoñonan for di abismo. Esaki lo no resultá den ningun daño permanente pa esnan ku di bèrdat stima Yehova. Pero ken ku ta infiel i ku ta laga Satanas hiba nan na desobedesé Yehova lo ser destruí pa semper, huntu ku e rebelde original i su demoñonan.—Revelashon 20:7-10.

15. Ki situashon lo bolbe eksistí entre tur Yehova su kriaturanan inteligente?

¹⁵ E ora ei Yehova lo adoptá komo su yu tur hende perfekto ku a sostené Dios su gobernashon supremo durante e prueba final ei. For di e tempu ei padilanti, nan lo gosa plenamente dje libertat glorioso di e yunan di Dios komo parti di Dios su famia universal. Tur kriatura inteligente den shelu i riba tera lo ta uní un bes mas den adorashon dje úniko Dios berdadero. Yehova su propósito lo a alkansá éksito glorioso! Abo kier ta parti di e famia felis, eterno i universal ei? Si ta asina, nos ta animá bo pa tuma na pechu loke Beibel ta bisa na 1 Huan 2:17: “Mundu ta pasa bai i su deseonan tambe, ma esun ku hasi e boluntat di Dios ta permanesé pa semper.”

Komo Repaso

• Promé ku e rebelion den Eden, ki relashon tur adoradó di Yehova tabatin kuné?

• Ki responsabilidat hende ku ta sirbi Dios tin?

• Ken mas lo bira yu di Dios, i kon esaki ta relashoná ku e propósito di Yehova pa loke ta adorashon uní?

[Plachi na página 190]

Hende obediente lo gosa di bida den un paradeis mundial