Yehoyada A Mustra Kurashi

Yézabèl tabatin un yu muhé ku yama Atalía. Atalía tabata mal hende meskos ku su mama. Atalía tabata kasá ku e rei di Huda. Despues ku e kasá di Atalía a muri, su yu hòmber a bira rei. Pero ora Atalía su yu hòmber a muri, el a hasi su mes reina di Huda. Despues, el a purba di kaba ku tur persona ku por a heredá e trono di rei. El a asta mata su mes nietunan. Tur hende tabatin miedu di Atalía.

Sumo Saserdote Yehoyada i su kasá, Yehósheba, tabata sa ku e kosnan ku Atalía tabata hasi tabata hopi malu. Nan a riska nan bida pa skonde un di e nietunan di Atalía. E bebi ei tabata yama Yehóas. Nan a kria e mucha na e tèmpel.

Ora Yehóas tabatin shete aña, Yehoyada a reuní tur e komandantenan i e levitanan, i el a bisa nan: ‘Vigilá e portanan di e tèmpel, anto no laga ningun hende pasa.’ Despues, Yehoyada a pone un korona riba Yehóas su kabes, i el a bisa ku Yehóas a bira rei di Huda. E pueblo a grita: “Biba nos Rei!”

Reina Atalía a tende e boroto ku e pueblo tabata hasi, i el a kore bai e tèmpel. Ora el a mira e rei nobo, el a grita: “Traishon! Traishon!” E komandantenan a gara e reina malbado, bai kuné i mat’é. Reina Atalía tabata un mal ehèmpel pa e pueblo. Kiko Yehoyada lo a hasi?

Yehoyada a yuda e pueblo sera un pakto ku Yehova. Nan a primintí ku nan lo a sirbi Yehova so. Yehoyada a laga nan basha e tèmpel di Baal abou i bati e imágennan kibra chikí chikí. El a nombra e saserdotenan i e levitanan pa traha na e tèmpel, pa asina e pueblo por a bolbe adorá Yehova einan. El a nombra pòrtir pa vigilá e palasio pa niun hende impuru no drenta. Despues, Yehoyada i e komandantenan a hiba Yehóas na e palasio, i nan a pon’é sinta riba e trono. E pueblo tabata kontentu. Porfin nan por a sirbi Yehova libremente, pasobra e reina malbado Atalía no tabat’ei mas i no tabatin hende ku tabata sirbi Baal. Bo a mira kon e kurashi ku Yehoyada a mustra a yuda hopi hende?