Yehova Tabatin Pasenshi ku Yónas

Nínive tabata un stat na Asiria. E hendenan ku tabata biba einan tabata masha malbado. Yehova a bisa Profeta Yónas bai Nínive pa spièrta e hendenan pa stòp di hasi loke ta malu. Pero Yónas a bai den otro direkshon. El a subi un barku ku tabata bai Társis.

Ora e barku tabata riba laman, un mal tempu a lanta, i e nabegantenan a spanta mashá. Nan a resa na nan diosnan i puntra: ‘Dikon e kosnan akí ta pasa?’ Al final, Yónas a bisa nan: ‘T’ami falta. Yehova a duna mi un tarea, pero mi a hui. Benta mi den laman, i e tormenta lo pasa.’ E nabegantenan no tabata ke tira Yónas den laman, pero, el a bisa nan pa hasié tòg. Ora nan a benta Yónas den laman, e tormenta a stòp.

Yónas a kere ku lo el a muri. Segun ku e tabata senk mas i mas, el a resa na Yehova. E ora ei, Yehova a manda un piská grandi. E piská a guli Yónas, pero Yónas no a muri. Ora Yónas tabata den barika di e piská, el a resa: ‘Mi ta primintí ku semper lo mi obedesé bo.’ Yehova a protehá Yónas tur e tres dianan ku Yónas tabata den e piská. Despues, Yehova a laga e piská skupi Yónas riba tera.

Yehova a salba Yónas. Esei a nifiká ku e no mester a bai Nínive mas? Nò. Yehova a bolbe bisa Yónas pa bai einan. E biaha akí, Yónas a obedesé. El a drenta e stat, i el a bisa e hendenan ei: “Akí 40 dia, Nínive lo ser destruí.” Pero, algu ku e no a pensa a pasa. E hendenan di Nínive a skucha Yónas i nan a stòp di hasi loke ta malu. E rei di Nínive a bisa su pueblo: ‘Resa na Dios i pidié pordon. Kisas lo e no mata nos.’ Ora Yehova a mira ku e hendenan a arepentí, e no a destruí Nínive.

Yónas a rabia mashá pasobra Yehova no a destruí e stat. Djis imaginá bo: Yehova tabatin pasenshi ku Yónas, i el a mustra kompashon na Yónas. Pero, Yónas no a mustra kompashon na e hendenan di Nínive. En bes di esei, el a sali pafó di e stat, bai sinta den sombra di un mata di kalbas largu i keha. Despues, e mata a muri, i Yónas a rabia. E ora ei, Yehova a bis’é: ‘Bo a sinti mas duele di e mata akí ku di e hendenan di Nínive. Mi a mustra kompashon na nan, i nan a keda na bida.’ Kiko Yehova tabata ke siña Yónas? E hendenan di Nínive tabata mas importante ku kualke mata.