Siña Hende na un Manera Simpel

Loke Hesus A Hasi

VIDIO: Hesus A Ilustrá Ku Nos Tata Ta Kla pa Kuida Nos

1. Wak e VIDIO òf lesa Mateo 6:​25-27. Despues, analisá e siguiente preguntanan:

1. Kon Hesus a ilustrá ku Yehova ta kla pa kuida nos?

2. Aunke Hesus tabata sa hopi kos tokante para, riba ki detaye simpel el a enfoká? Dikon nos por bisa ku esei tabata un manera efikas di siña hende?

Kiko Nos Por Siña for di Hesus?

2. Ora nos ta siña hende na un manera simpel, hende lo keda kòrda loke nos a siña nan, i e informashon lo por yega na nan kurason.

Imitá Hesus

3. No papia hopi. Na lugá di splika tur loke bo sa tokante un sierto tópiko, konsentrá riba e informashon ku tin den e publikashon ku boso ta studiando. Despues di hasi un pregunta, warda ku pasenshi pa bo studiante kontestá. Si bo studiante no sa e kontesta òf si su kontesta no ta kuadra ku loke Beibel ta siña, hasi pregunta adishonal pa yud’é rasoná riba e asuntu. Si bo studiante komprondé e punto prinsipal, sigui ku e siguiente punto.

4. Usa loke bo studiante sa kaba pa yud’é komprondé un punto nobo. Por ehèmpel, promé ku bo kuminsá ku un lès tokante resurekshon, bo por repasá brevemente loke bo studiante sa kaba tokante e kondishon di e mortonan.

5. Hasi bon uso di ilustrashon. Promé ku bo usa un ilustrashon, puntra bo mes:

1. ‘E ilustrashon ta simpel?’

2. ‘Mi studiante lo komprondé e ilustrashon mesora?’

3. ‘Mi studiante lo kòrda e punto prinsipal i no djis e ilustrashon?’