“Bolbe Cerca Mi, i lo Mi Bolbe Cerca Boso”

E FAMÍA tabata disfrutando di un buitendag gozoso den campo. Anto, Pedro, esun menor, a dwal for dje otronan, corriendo tras di un iguana den ceru. Di ripiente, cielo a yena cu nubia, i awa a cuminza cai. Na principio esei tabata un awaceru suave, pero poco poco el a bira un diluvio. E famía a recoge nan pertenencia lihé i a corre pe auto. I nan tur tabata puntra unda Pedro a bai.

Entretanto, Pedro tabata purba di bolbe cerca e famía. Tabata dificultoso pa mira padilanti, i e berea subiendo e ceru a bira lodo den e awa. Inesperadamente, e tera a parce di somenta bao di su pia ora el a trompica i a cai den un burracu hundo scondí. El a purba di sali, pero e banda dje burracu a slip mucho.

Awa tabata basha for dje ceru i yena e burracu cu lodo. Pedro tabata den berdadero peliger di hoga. Pero, e ora ei su tata a hayé i a saqué cu un cabuya. Despues, nan a squal Pedro severamente pasobra el a bai riba su mes cuenta. Pero, lorá den dekel den braza di su mama, e squalmento no a cai duro.

E experencia ta wel ilustra loke ta pasa algun hende cu tabata den e pueblo di Dios. Nan a cai den e burracu hundo dje sistema di cosnan aki i desesperadamente ta purba di sali i bolbe ne siguridad dje organizacion di Jehova Dios. Ta ki agradable pa sa cu Jehova ta misericordioso i dispuesto pa ‘tira cabuya’ i yúdanan bolbe na siguridad!

E Tratamento Misericordioso di Jehova

Ayá den e tempo di Israel, ora nan a completa e construccion dje tempel, Salomón a ofrece un oracion di dedicacion den locual el a pidi Jehova scucha peticion dirigí den direccion dje tempel. Anto el a bisa: “En caso cu [israelita] ta peca contra bo (pasobra no tin hende cu no sa peca), i bo ta rabia cu nan i ta bandonánan ne enemigo, . . . i nan en berdad ta bolbe na nan sano huicio den e país unda nan a wordu hibá preso, i nan realmente ta bolbe i ta pidi fabor di bo den e país di nan vencedor, . . . anto bo tin cu tende foi cielo, e lugar establecí di bo habitacion, nan oracion i nan pidimento di fabor.”—1 Rey 8:46-49.

E peticion di Salomón a wordu cumplí na hopi ocasion durante e pasado di Israel. Bez tras bez, e pueblo di Dios a dwal, i a bandoné. Anto nan a reconoce nan error i a bolbe, buscando Dios. I Jehova Dios a pordonánan. (Deuteronomio 4:31; Isaías 44:21, 22; 2 Corintio 1:3; Santiago 5:11) Mediante Malaquías, Jehova Dios a duna resumen di mil aña di tratamento cu su pueblo ora el a bisa: “Desde e dianan di boso antepasado boso a aparta for di mi reglamento i no a wárdanan. Bolbe cerca mi, i lo mi bolbe cerca boso.”—Malaquías 3:7.

Causa di Trompicamento

Mescos cu israelita, varios dje pueblo di Dios den e dia djawe ta aparta i ta separánan for dje organizacion di Jehova. Pakico? ­Algun ta sigi tras di loke ta parce inocente na principio, mescos cu Pedro corriendo tras dje iguana. Lo sigiente ta loke a pasa Aida. El a informa: “Tur trahador tabatin e costumber di bai hunto pa come merdia den un restaurant ei cerca. Pues, ora nan a invitámi pa tuma un cofi na fin dje dia, no tabata dificultoso pa acepta. Mi a razona cu mi no tabata kita tempo cu mi mester dedica na reunion of e trabao di predica. Mi no a tuma na cuenta cu esei por ta un ocasion pa no observa e principio den 1 Corintio 15:33.

“Pronto, mi tabata corre cabai cu nan riba diasabra. Anto mi tabata bai cine i teater cu nan. Esei a resulta den perdimento di algun reunion. Finalmente mi no tabata bai reunion mes ni participa den e trabao di predica. Ora mi a tuma na cuenta loke tabata pasa, mi no tabata asocia cu e organizacion mas.”

Den otro caso e motibo por ta un picá serio scondí cu ta haci hende síntinan indigno di sirbi Dios. (Salmo 32:3-5) Of un persona por trompicá riba algo cu un compañé cristian a bisa of a haci, sin comprende cu, manera Salomón a bisa, “no tin hende cu no sa peca.”—1 Rey 8:46; Santiago 3:2.

Otronan ainda ta desanimá ora nan ta recibi disiplina. (Hebreo 12:7, 11) E atraccion dje moda di biba materialista ta kita hopi hende for dje sirbishi di Dios. Hopi bez, den nan buscamento di bon éxito mundano, nan ta ocupánan asina completamente den trabao seglar cu no tin lugar mas den nan bida pe sirbishi di Dios. (Mateo 13:4-9; 1 Timoteo 6:9, 10) E situacion di hende asina ta sin speranza?

Lo Bo Acepta e Invitacion di Jehova Dios?

Na un ocasion Jesús a bisa algo cu tabata difícil pa comprende, i algun hende a trompica. E relato ta bisa: “Hopi disípel di dje a bolbe ne cosnan patrás i no a camna cuné mas.” Pero nan tur no a trompica. E relato bíblico ta sigi: “Jesús a puntra e diesdosnan: ‘Boso no kier bai també, berdad?’ Simón Pedro a contesté: ‘Señor, cerca ken nos por bai? Bo tin e palabra di bida eterna.’” (Juan 6:66-68) Apóstol di Jesús sabiamente a comprende cu ta desastroso pa bandona Jesús.

Algun hende cu ta kita cai eventualmente ta yega na un conclusion similar. Nan ta tuma na cuenta cu bandonamento dje organizacion di Dios ta un paso desastroso pa tuma i cu solamente cerca Jehova Dios i Jesucristo nan por haya e palabra cu ta hiba na bida. Despues di a tuma esei na cuenta, nan mester tuma na cuenta també cu nunca ta laat pa reconsidera, pidi Jehova pordón, i bolbe cerca dje. Tabata Jehova Dios mes cu a duna e invitacion: “Bolbe cerca mi, i lo mi bolbe cerca boso.”—Malaquías 3:7.

Realmente, unda un cristian sincero por haya felicidad si no ta den e sirbishi di Jehova Dios? Si e corriente ta hiba un persona despues cu e tabata un parti dje organizacion di Dios pa basta tempo, kico ta speré den e mundo pafó? Lo e mira pronto cu awor e ta parti di un mundo cu ta bira cada bez mas violento. Lo e haya su mes inbolucrá den un sistema di cosnan yen di hipocresía, mentira, fraude, i inmoralidad, un mundo tanto peligroso i desagradable como e burracu yen di lodo cu a peligrá e bida dje hoven Pedro. Ora e ta bolbe na su sano huicio i ta tuma na cuenta cu su bida eterna ta den peliger, e no mag tarda pa busca yudanza pa salba su mes for dje situacion. Sin embargo, bolbimento no por ta fácil.

Bo ta un hende cu a purba di bolbe na Jehova Dios pero a haya cu tabata difícil? Anto, bo sa cu bo tin mester di yudanza. I ta sigur cu bo rumanan den e organizacion di Dios ta dispuesto pa ofrecébo yudanza. Pero, bo tin cu haci esfuerzo pa mustra Jehova Dios bo deseo. Ta tempo pa bo ‘bolbe na bo sano huicio’ i ‘realmente bolbe na Jehova.’—1 Rey 8:47.

Yudá pa Bolbe

Aida a splica loke a yudé bolbe na Jehova Dios: “Net na ora, e ruman cu a conduci estudio cu mi a invitámi pa asisti ne asamblea di circuito cuné. E tabata asina amable! I e no a reprendémi mes! El a mustra tanto amor. Un aña a pasa desde cu mi a asisti na reunion pe último bez, pero mi a medita riba e banidad di mundo i riba e echo cu, tras dje resplandor, tin solamente tristeza, frustracion, i inmoralidad. Pues, mi a decidi di asisti ne asamblea. Ora mi a yega e teater unda nan a celebré, mi a bai ne último carreda di asiento i a sconde den un skina scur. Mi no tabata kier pe rumanan mirámi i haci pregunta.

“Sin embargo, e programa a duna conseho cu tabata mashá necesario pa mi. Ora el a caba, mi a keda determiná di no solamente bolbe cerca e pueblo di Jehova Dios sino també dedicá mi mes na dje cu tur mi curazón. E rumanan a recibími cu braza habrí i e ‘yiu perdí’ a bolbe.” (Lucas 15:11-24) Tur esei a sosode basta tempo pasá, i Aida ta den e sirbishi di tempo completo pa mas cu 25 aña caba.

E caso di un otro persona cu a dwal tabatin un resultado igualmente feliz. Algun anciano a duna José conseho cu a refleha mas nan mes pensamento en bez di principio bíblico. José, desanimá i yen di rencor, a cai den inactividad despues. Pa ocho aña el a keda separá for dje pueblo di Dios, i durante e tempo ei el a casa cu un persona no creyente i a bira tata di yiunan, uno di locual el a permiti bautizá den e religion católico.

Finalmente, el a wordu yudá ora e superintendente di circuito a haci bishita di pastoreamento cerca dje i a anima anciano pa haci mescos. El a wordu restorá i a keda contentu pa mira su esposa mustra interés den e berdad. Actualmente, José ta sirbi como anciano den e congregacion. E dos experencia ei ta mustra cu Jehova Dios no ta nenga di duna bendicion na hende cu ta acepta su invitacion amoroso di bolbe.

Sin embargo, pa disfruta di tal bendicion, bo tin cu aprecia e yudanza ofrecí i acepté. Den casi tur congregacion e rumanan ta corda esnan cu a bira inactivo i ta bishitánan de bez en cuando, haciendo esfuerzo pa yúdanan. Bo aceptacion di tal yudanza ta mustra aprecio pa misericordia di Jehova Dios.—Santiago 5:19, 20.

Berdaderamente, awor ta e tempo pa acepta e invitacion di Jehova Dios: “Bolbe cerca mi.” (Malaquías 3:7; Isaías 1:18) No tarda mas. Suceso di mundo ta marcha cu rapidez notable. E mihor lugar pa bo ser durante e tempo dificultoso cu ta bini ta den e organizacion di Jehova Dios, salbo bao di su proteccion. Solamente hende cu ta tuma refugio den Jehova Dios tin un speranza firme di ser scondí for di su furia den e dia grandi di su rabia.—Sofonías 2:2, 3.

[Plachi na página 30]

Lo bo acepta e invitacion di Jehova Dios di “Bolbe cerca mi”?