Graduado di Galad ta haya “Mas felicidad den duna”

RIBA diadomingo, 6 di Mart di 1994, e famía di Betel dje centro mundial di Testigo di Jehova i bishitante a reuni pa un ocasion festivo​—⁠e graduacion di klas di 96 dje Scol Bíblico di Galad di Watchtower. Den su comentario di introduccion, Karl F. Klein, e presidente dje programa, cu a sirbi como miembro dje Cuerpo Gobernante di Testigo di Jehova pa casi binti aña, a bisa e 46 alumno: “Jesús a bisa cu tin mas felicidad den duna cu tin den recibi. Asina lo ta den boso asignacion como misionero​—⁠mientras mas boso ta duna, mas feliz boso lo keda.”​—⁠Echo 20:⁠35.

Conseho di despedida

Un serie di discurso a sigi pe alumno. Leon Weaver, un miembro dje Comité di Departamento di Sirbishi, a desaroya e tema “Perseverancia ta glorifica Jehova.” Prueba ta enfrenta nos tur. (2 Corintio 6:​3-5) Segun ruman Weaver, “Ora nos ta bao di presion, ta mashá fácil pa depende di nos mes.” Sin embargo, el a haci alumno corda: “Sea loke sea e prueba cu ta enfrentános como hende, Jehova Dios tin un interés den dje. E nunca lo permiti pa boso ser tentá mas ayá cu loke boso por wanta.”​—⁠1 Corintio 10:⁠13.

Lyman Swingle dje Cuerpo Gobernante a duna e sigiente discurso cu e título “Semper aprecia boso asignacion.” Israelita no a scoge cada bez unda nan lo biba of kico nan lo haci. Cada tribu tabata asigná un pida di terreno, i levita tabata asigná cierto trabao pa haci. Di igual manera, hopi ruman den e sirbishi special di tempo completo djawe​—⁠tal como misionero i miembro di famía di Betel​—⁠no ta decidi pa nan mes unda nan lo biba i cua trabao nan lo haci. Kico ta pasa si uno di nan ta experimenta sintimento di insiguridad tocante su asignacion? Segun ruman Swingle, “Si bo ta fiha atentamente riba e Agente Principal di nos fe, Jesús, i considera su ehempel cuidadosamente, lo bo no faya.”​—⁠Hebreo 12:​2, 3.

Leonard Pearson, dje Comité di Watchtower Farms, a sigi, tratando cu e tema di “Keda enfocá.” El a bisa: “Bo por tin e mihor cámara, e obheto di mas bonita, i e situacion ideal, i toch haya resultado pober​—⁠si bo cámara no ta enfocá.” Mescos cu lens di ángulo hancho, nos bista mester inclui e predicacion mundial cu ta ser hací. Nos nunca mester perde bista dje cuadro completo. “Esnan cu ta enfocá riba nan mes lo no ser feliz den nan asignacion,” segun ruman Pearson. “Esnan cu ta enfocá riba Jehova Dios i e trabao cu el a dúnanan pa haci lo logra.”

John E. Barr, un otro miembro dje Cuerpo Gobernante, a duna e sigiente discurso, titulá “Tanto cos pa keda agradicido pe.” Ruman Barr a conseha alumno: “Nunca perde boso sintimento di agradicimento na Jehova Dios. Esei ta un fuente di mas grandi di contentamento, apesar di cua asignacion boso tin.” Un actitud di agradicimento a impulsa David pa skirbi: “Liña di midí mes a cai pa mi den lugar agradabel. Realmente, mi mes posesion a resulta di ser placentero pa mi.” (Salmo 16:⁠6) “Boso tin un posesion asina precioso, sintiendo boso pegá cu Jehova den boso bida diario,” segun ruman Barr. “Jehova nunca lo kita tal relacion for di boso tan tempo cu boso ta sigi consideré como algo mashá agradabel pa locual boso ta keda agradicido.”

Jack Redford, instructor di Galad, a papia sigientemente, riba e tema “Con boso lo usa boso lenga?” Cuanto daño papiamento sin pensa por causa! (Proverbio 18:21) Con boso por domina boso lenga? Ruman Redford a contestá: “Promé, boso mester entrena boso mente, pasobra e lenga ta refleha e mente i curazón.” (Mateo 12:​34-37) Jesús a pone un ehempel excelente; el a usa su lenga pa engrandece e nomber di Jehova Dios. Ruman Redford a bisa e klas, “Awe tin un hamber pa tende e palabra di Jehova. Boso conoce e palabra ei. Boso tin ‘e lenga di hende siñá.’ P’sei laga boso mente i curazón cu ta plenamente dedicá na Jehova guía boso lenga.”​—⁠Isaías 50:⁠4.

Énfasis tabata duná ne importancia di oracion den e discurso titulá “Bo ta camna como si fuera den e presencia di Jehova?” Ulysses Glass, registrador dje scol, a bisa: “Si un tata ta traha duro pa mantene su famía pero nunca ta papia cu nan ni nunca ta expresa palabra di cariño, su famía por wel conclui cu su motivacion ta pa cumpli cu un deber desagradabel en bez di amor. Asina ta cu nos. Nos por keda ocupá den e sirbishi di Dios. Pero si nos no ta haci oracion, anto nos ta simplemente dedicá na un trabao en bez di na un amoroso Tata celestial.”

Theodore Jaracz, dje Cuerpo Gobernante, a papia riba e tema “Pakico multitud grandi ta asocia cu e pueblo di Dios.” Tur aña cientos di miles di hende ta drenta den e organizacion di Jehova Dios. (Zacarías 8:23) Kico ta identifica Testigo di Jehova como e pueblo di Dios? Promé, nan ta acepta e Bijbel completo como e Palabra di Dios. (2 Timoteo 3:16) Di dos, nan ta keda neutral políticamente. (Juan 17:16) Di tres, nan ta duna testimonio dje nomber di Dios. (Juan 17:26) Di cuater, nan ta manifesta amor di sacrificio propio. (Juan 13:35; 15:13) Cu tal identificacion, cu curashi nos por ‘declara na tur parti e excelencia di esun cu a yámanos for dje scuridad na su luz maraviyoso.’​—⁠1 Pedro 2:⁠9.

Despues di tal discurso conmovedor, tur 46 alumno a recibi diploma. Nan ta asigná na 16 país rond di mundo.

Un programa variá den atardi

Den atardi Donald Krebs dje Comité di Betel a dirigi un estudio breve di Toren di Vigilancia. Anto e graduadonan a presenta un programa titulá: “Sabiduría ta sigi sclama den e caya mes.” (Proverbio 1:20) Nan a demonstra experencia recompensador cu nan tabatin dunando testimonio riba caya i també den negoshi. Berdaderamente, Jehova ta bendiciona esnan cu ta lanta curashi pa predica informalmente. Segun un graduado: “Mi ta gusta pensa di nos como machete den man di cosechador angelical. Mientras mas skerpi ta nos aptitud, mas trabao angel por haci usando nos.” (Compara cu Revelacion 14:⁠6.) E programa di alumno a inclui també un presentacion di slide cu a hiba e auditorio na un paseo educativo di Bolivia, Malta, i Taiwan​—⁠tres país unda graduado dje klas a ser mandá.

Sigientemente, tabatin un entrevista di Wallace i Jane Liverance​—⁠misionero pa diesiete aña. Den October di 1993 nan tabata invitá na Watchtower Farms, unda ruman Liverance ta sirbi awor como un instructor di Galad.

Un presentacion cu cuater esena a sigi, titulá “Onrando esnan merecedor durante nan edad avanzá.” Ora edad di hende ta avanzá, e miedu di bira inútil i bandoná por debilitá nan confianza propio. (Salmo 71:⁠9) E presentacion conmovedor a mustra con tur hende den e congregacion por apoya tal hende fiel di edad.

Despues di un cantica i oracion di conclusion, tur 6.220 hende asistiendo den e Salón di Asamblea di Jersey City i salón satélite a síntinan refrescá. Nos oracion ta pa e graduadonan den nan asignacion nobo. Laga nan sigi experimenta e mayor felicidad cu ta resulta di dunamento.

[Box on page 26]

Dato dje klas

Cantidad di país representá: 9

Asigná na cuanto país: 16

Cantidad di alumno: 46

Edad promedio: 33,85

Promedio di aña den e berdad: 16,6

Promedio di aña den e ministerio di tempo completo: 12,2

[Box on page 27]

Enfoque riba Malta

CRISTIANDAD a silenciá e berdad bíblico den Malta pa hopi aña. E último misionero di Galad pa ser mandá na Malta, Frederick Smedley i Peter Bridle, a graduá for di klas di ocho ayá na 1947. Pero, nan tabata arestá i deportá for di Malta un poco tempo despues di a yega. E Anuario de los testigos de Jehová de 1948 a informa: “E dos misionero a pasa tanto tempo den corte i cu funcionario dje país como nan a dedica na hacimento di nan trabao ministerial, debí ne oposicion dje Herarquía Católico Romano. Pastor ta bisa cu Malta ta dje Iglesia católico i tur otro hende tin cu bai.” Awor, rond di 45 aña despues, cuater misionero dje klas di 96 di Galad a ser asigná na Malta.

[Picture on page 26]

Klas di 96 di graduado dje Scol Bíblico di Galad di Watchtower

Den e sigiente lista, fila ta contá di dilanti te patrás, i nomber ta duná di robez pa drechi den cada fila.

(1) Ehlers, P.; Giese, M.; Sellman, S.; Zusperregui, J.; Rowe, S.; Jackson, K.; Scott, T. (2) Liehr, T.; Garcia, I.; Garcia, J.; Fernández, A.; Davidson, L.; Liidemann, P.; Gibson, L.; Juárez, C. (3) Fouts, C.; Pastrana, G.; Claeson, D.; Fernández, L.; Walls, M.; Dressen, M.; Pastrana, F.; Burks, J. (4) Burks, D.; Scott, S.; Jackson, M.; Mauray, H.; Juárez, L.; Zusperregui, A.; Brorsson, C.; Rowe, C. (5) Sellman, K.; Liidemann, P.; Davidson, C.; Mauray, S.; Walls, D.; Dressen, D.; Schaafsma, G.; Liehr, S. (6) Claeson, T.; Gibson, T.; Giese, C.; Ehlers, D.; Fouts, R.; Schaafsma, S.; Brorsson, L.