Bo Ta Disfrutá di Studio Personal?

CUALKIER sirbidor sincero di Dios lo ta contentu pa dedicá un bon cantidad di tempu na studio personal di Bijbel. (Salmo 1:​1, 2) Tog, hopi persona, sintiendo gran demanda riba nan tempu i fortalesa, ta haña ta difícil pa dedicá mes tantu tempu i energia na studio personal manera nan lo tabata kier.

Sin embargo, pa por sigui padilanti como sirbidor activo di Dios, tur persona mester renobá nan goso i fortalesa dia tras dia dor di haña aspectonan nobo of mas profundo dje berdad dje Palabra di Dios. E berdadnan di Bijbel cu a motivá bo profundamente añanan pasá kisas no ta motivando bo mes tantu awor. P’esei, ta bon, asta vital, pa nos haci un esfuerso conciente i constante pa gana perspicacia frescu den e berdad pa asina nos tene nos mes spiritualmente stimulá.

Con hombernan di fe di antigua a haci nan mes spiritualmente fuerte mediante studio personal dje Palabra di Dios? Con algun dje sirbidornan di Jehova di dia moderno ta haci nan studio mas deleitabel i tambe fructífero? Con nan a ser recompensá pa nan esfuersonan?

Nan A Renobá Nan Fortalesa Mediante Studio Personal

Rey Hosías di Huda a efectuá su campaña contra idolatria cu un celo asta mas grandi despues cu nan a lesa p’e ‘e buki mes dje ley di Jehova skirbí pa e man di Moises.’ Sin duda esei no tabata e promé biaha cu el a considerá e parti aki dje Palabra di Dios; pero tendiendo e mensahe directamente for dje manuscrito original a stimul’é den su bataya pa adoracion puru.​—⁠2 Crónica 34:​14-19.

Profeta Daniel a dicerní ‘e cantidad di añanan pa cumpli cu e desolacion di Jerusalem’ i e echo cu esaki tabata sigur no solamente for dje buki di Jeremías sino tambe for di “e bukinan.” Esakinan muy probablemente a incluí bukinan manera Levítico (26:​34, 35), Isaías (44:​26-28), Oseas (14:​4-7) i Amos (9:​13-15). Loke el a confirmá mediante su studio diligente dje bukinan di Bijbel a guia e homber deboto aki pa busca Dios den oracion ferviente. Su peticion sincero a ser contestá cu mas revelacion i siguransa en relacion cu e stad di Jerusalem i tambe su pueblo.​—⁠Daniel, capítulo 9.

Hosías, kende a haci “loke tabata corecto dilanti e wowonan di Jehova,” i Daniel kende tabata “un persona masha deseabel” den bista di Dios, básicamente no tabata diferente for di nos awe. (2 Rey 22:2; Daniel 9:⁠23) Nan esfuersonan personal dedicá na un studio altamente motivá dje Scritura disponibel n’e tempu ei a guia nan na mayor spiritualidad i a yuda nan disfrutá di lasonan mas fuerte cu Dios. Nos por bisa mescos di hopi otro sirbidor di Jehova di antigua, manera Jefte, un salmista dje cas di Asaf, Nehemías i Esteban. Tur e personanan aki a duna evidencia di studio personal cuidadoso dje parti di Bijbel cu tabata disponibel den nan tempu.​—⁠Hues 11:​14-27; Salmo 79, 80; Nehemías 1:​8-10; 8:​9-12; 13:​29-31; Echo 6:​15–7:⁠53.

Laga e Ministerio Ser un Incentivo

Mayoria sirbidor di Jehova awe kendenan a sirbi’é pa hopi aña tin un programa pa studio personal di Bijbel. Nan a haña esaki esencial afin di keda spiritualmente lantá i cumpli plenamente cu nan responsabilidadnan cristian. Asina mes, hopi di nan ta admití cu no ta semper fácil pa balansá e uso di nan tempu i energia entre studio i otro asuntunan cu no mester ser neglishá.

Tog, kedando spiritualmente alerto mediante studio personal diligente ta esencial pa trata cu e necesidadnan den e ministerio cristian n’e tempu avansá aki dje obra mundial di predicacion di Reino. Esnan cu ta ser conmoví dor di perspicacia frescu i mas profundo den e Palabra di Dios por cumpli cu satisfacé e desafio di toca curasonnan hambrá. Esaki ta cierto sea bo ser asigná caminda por spera di coge hopi piscá den sentido spiritual of bo ta perseverando den teritorionan bon-trahá caminda indiferencia general ta prevalecé.

Alimentá Regularmente cu e Palabra di Dios

Loke otronan ta haciendo por duná bo idea riba con bo por disfrutá mas di bo rutina di studio of con abo i bo famia lo por haci uso mas recompensador di tempu di studio. Entre e cosnan cu un sirbidor di Dios lo no kier perde ta lesamentu dje Palabra di Dios mes riba un base regular. Hopi a pone como meta pa lesa un mínimo di tres pa cuater capítulo di Bijbel cada siman. Bo kier lesa henter e Bijbel den un solo aña? Anto lo bo ta contentu pa dedicá mas tempu na les’é, talbes mei ora pa dia.

Bo a lesa Bijbel completo mas cu un biaha? Pakico no fiha un meta nobo siguiente biaha? Pa un cambio, un muher cristian a lesa e bukinan di Bijbel segun e ordu den cua nan a ser skirbí. El a capta hopi detaye, basá riba antecedencia cronológico, cu el a perde anteriormente. Un otro muher cristian a lesa Bijbel di kaft pa kaft cincu biaha durante e último cincu añanan, cada biaha for di un perspectiva diferente. E promé biaha, el a lesa for di cuminsamentu te final. Durante e di dos lesamentu, el a resumí e contenido di cada capítulo den un of dos frase den un buki di nota. For dje di tres aña en adelante, el pasa pa un edicion di referencia tamaño grandi, promé averiguando selectivamente e referencianan di un parti pa otro den e márgen i despues prestando mas atencion n’e notanan abou i tambe n’e informacion den apendix. E di cincu biaha, el a usa mapanan di Bijbel pa aumentá su comprendimentu for dje aspecto geográfico. E ta bisa: “Pa mi, lesamentu di Bijbel a bira mes deleitabel cu come un cuminda.”

Algun studiante di Bijbel celoso a haña ta probechoso pa tin nan mes copia di Bijbel cu ta ser usá solamente pa studio personal, anotando brevemente den su márgen comentarionan interesante, ilustracionnan penetrante cu ta provocá pensamentu of e numbernan di página di otro publicacionnan na cua nan por referí despues. Un minister di tempu completo ta haña ta un placer pa na fin di cada luna skirbi den su copia di studio puntonan nobo cu el a siña durante e luna. E ta bisa: “Anticipando e oranan balioso di mi aki ta yudá mi alcansá otro metanan p’e luna mas lihé.”

Algun Idea Ingenioso

Bo ta sinti cu bo programa ta yen cu debernan diario i semanal i cu bo mester di algun tip pa mihó uso di bo tempu limitá? Wel, cana cu loke bo tin intencion di lesa i utilisá bo momentonan liber. Na cas of caminda bo ta studia normalmente, te n’e grado cu ta razonablemente posibel, drecha bo bukinan i otro hermentnan di studio pa nan por ta fácil pa alcansá. Haci bo huki di studio agradabel pero no asina comfortabel cu bo ta cabishá. Bo tin un asignacion di discurso? Lesa henter e material n’e ocasion mas pronto posibel, anto laga e ideanan bini na bo mente segun cu bo ta sosegando of haciendo varios tarea.

Otronan por cooperá cu bo den haci mihó uso di tempu p’e beneficio mutuo. Por ehempel, bo por laga un persona lesa artículonan leve na bos haltu miéntras bo ta haciendo trabounan rutinario of sirbiendo té na bo lesador bondadoso. Ke tal di un acuerdo entre tur persona na cas pa tene un ora ketu pa studio personal? “Kico bo a disfrutá di lesa últimamente?” Tin biaha bo por saca afó loke bo amigunan a siña dor di cuminsá un combersacion den e manera aki.

Bo ta interesá den introducí algun idea frescu den bo programa di studio? Bo por fiha un meta di tempu pa studio den e mésun manera cu hopi ta fiha un meta di tempu pa papia tocante Bijbel cu otronan. Un publicador di tempu completo (pionero) ta fiha un meta mensual mínimo pa oranan di studio i tin deleite ora e mira su oranan marcá yegando mas cerca di su meta. Otronan ta limitá e tempu na wakmentu di television i den e manera ei ta haña tempu pa studia. Hopi persona ta scoge un tema di studio cu nan ta sigui pa algun tempu, manera e frutanan di spiritu, antecedencia di bukinan di Bijbel, of e arte di siña. Algun ta disfrutá di diagramnan cronológico, manera esnan cu ta mustra e relacion entre e reynan i profetanana israelita of Echonan di Apostel i e cartanan di Pablo.

Hóbennan, boso kier tin un fe mas fuerte? Pakico no scoge un publicacion pa studio cabal durante bo siguiente vacansi di scol? Un studiante di scol secundario bautisá a selectá El hombre en busca de Dios, un buki publicá dor dje Sociedad Watch Tower. Capítulo pa capítulo, el a traha resúmen breve den un buki di nota di loke el a siña. Tabata un desafio i a tuma mas tempu cu el a pensa. Sin embargo, ora el a finalisá e buki completo, e tabata sumamente impresioná p’e berdad veracidad dje mensahe di Bijbel.

Semper Anhelá Sea Celoso pa Siña

Un gran cantidad di fiel sirbidor di Jehova di dia moderno ya caba tin “hopi di haci den e trabou di Señor.” (1 Corintio 15:58) Asta cu un programa revisá i esfuerso sincero, e rutina cu bo ta sigui den un siman típico kisas no ta cambia mashá. Sin embargo, anhelo sigur di bo parti pa gana un comprendimentu mas profundo dje berdad, i pa keda plenamente na altura i na armonia cu e desaroyo dje propósitonan di Jehova lo haci un diferencia.

Ta animador pa tende e recompensanan di esnan cu a mehorá nan patronchi di studio. Un homber cristian, realisando cu e tabata perdiendo un actitud positivo en cuanto buscamentu di un comprendimentu mas profundo dje berdad, a organisá su bida p’e por a dedicá mas di su oranan liber na studio personal. “Esei a duná mi deleite cu mi no a conocé promé anteriormente,” e ta bisa. “Cu confiansa semper aumentante den e echo cu Bijbel su orígen ta divino, mi ta haña cu mi por papia cu otronan tocante mi fe cu berdadero entusiasmo. Mi ta sinti cu mi ta bon nutrí, spiritualmente sano i contentu na fin di cada dia.”

Un superintendente biahero di Testigonan di Jehova, kende ta bishitá hopi congregacion, a describí otro beneficionan asina’ki: “Esnan cu ta diligente den studio personal generalmente ta bibitu i animá den nan expresionnan. Nan ta sali mihó cu otronan, i nan no ta ser influenciá fácilmente pa comentarionan negativo di otro hende. Ora nan ta den e ministerio di veld, nan ta adaptabel i tambe alerto en cuanto e necesidadnan dje hendenan cu nan ta encontrá.”

E ta agregá un punto cu algun kisas kier tene na mente ora nan ta analisá nan mes patronchi di studio. “Na reunionnan pa consideracionnan bíblico, hopi hende tin tendencia di lesa nan comentario direct for dje página imprimí. Nan lo beneficiá mas si nan meditá riba con e material ta relacioná cu loke nan a siña anteriormente of cu nan mes bida.” Bo ta kere cu lo bo por mehorá den esaki?

Profeta Daniel, despues di tabatin mas cu 90 aña di bida, no a sinti cu el a comprendé suficiente dje camindanan di Jehova. Den su añanan final, el a puntra en cuanto un asuntu cu e no por a comprendé plenamente: “O mi señor, kico lo ta e parti final dje cosnan aki?” (Daniel 12:⁠8) Sin duda e anhelo incambiabel aki pa siña mas dje berdad di Dios tabata un clave pa su integridad sublime atrabes dje curso di su bida yen di acontecimentu.​—⁠Daniel 7:​8, 16, 19, 20.

Cada sirbidor di Jehova tin un responsabilidad igualmente serio pa para firme como un di Su Testigonan. Semper anhelá pa siña pa tene bo mes spiritualmente fuerte. Purba agregá un of dos rasgo nobo na bo programa di studio personal semanal, mensual of anual. Mira con Dios lo bendicioná cualkier esfuerso chikitu cu bo ta haci. Sí, disfrutá di bo studio personal di Bijbel i e resultadonan cu esei ta trece.​—⁠Salmo 107:43.

[Nota]