Unda e Mortonan Ta?

“E TERA ta un marshe; cielu ta nos cas,” ta un dicho dje pueblo di Yoruba di West Africa. E idea aki ta ser resoná den hopi religion. E ta transmití e nocion cu e tera ta manera un marshe cu nos ta bishitá pa un tempu corticu i despues ta bai lagu’é. Segun e creencia aki, na morto nos ta bai cielu, nos berdadero habitacion.

Bijbel ta siña en berdad cu algun hende ta bai cielu. Jesucristo a bisa su fiel apostelnan: “Den e cas di mi Tata tin hopi habitacion. . . . Mi ta bai mi caminda pa prepará un lugá pa boso. Tambe, si mi ta bai mi caminda i ta prepará un lugá pa boso, mi ta bini atrobe i lo mi ricibí boso na cas cerca mi mes, pa unda cu mi ta boso tambe por ta.”​—⁠Juan 14:​2, 3.

Jesus su palabranan no ta nificá cu tur bon hende ta bai cielu of cu cielu ta e cas di humanidad. Algun hende ta ser hibá cielu en coneccion cu gobernacion riba e tera. Jehova Dios tabata sa cu gobiernunan humano nunca lo dirigí asuntunan exitosamente riba tera. P’esei, el a haci areglo pa un gobiernu celestial, of Reino, cu eventualmente lo tuma mando dje tera i transform’é den e Paradijs cu el a proponé p’e ta originalmente. (Mateo 6:​9, 10) Jesus lo ta Rey dje Reino di Dios. (Daniel 7:​13, 14) Otronan lo ta scogí for di entre humanidad pa goberná cuné. Bijbel a profetisá cu esnan cu ta ser hibá cielu lo ta “un reino i sacerdotenan pa nos Dios” i lo “reina como reynan riba tera.”​—⁠Revelacion 5:⁠10.

Ken Ta Bai Cielu?

Considerando e gran responsabilidad cu e gobernantenan celestial aki lo tin, no ta un sorpresa cu nan lo tin cu cumpli cu rekisitonan estricto. Esnan cu ta bai cielu mester tin conocimentu exacto di Jehova i mester obedec’é. (Juan 17:3; Romano 6:​17, 18) Nan tin cu ehercé fe den e sacrificio di rescate di Jesucristo. (Juan 3:16) Sin embargo, mas ta enbolbí. Nan mester ser yamá i scogí dor di Dios mediante su Yu. (2 Timoteo 1:​9, 10; 1 Pedro 2:⁠9) Ademas, nan mester ta cristiannan bautisá cu a “nace di nobo,” engendrá cu e spiritu santu di Dios. (Juan 1:​12, 13; 3:​3-6) Tambe nan tin cu mantené integridad na Dios te na morto.​—⁠2 Timoteo 2:​11-13; Revelacion 2:⁠10.

Miyones incontabel di hende cu a biba i muri no a cumpli cu e rekisitonan aki. Hopi tabatin poco oportunidad pa siña tocante e Dios berdadero. Otronan nunca a lesa Bijbel i sa poco of nada tocante Jesucristo. Asta entre cristiannan berdadero riba tera awe, poco a ser scogí dor di Dios pa bida celestial.

Consecuentemente, e cantidad di esnan cu ta bai cielu lo ta relativamente chikitu. Jesus a referí na eseinan como un “trupa chikitu.” (Lucas 12:32) Despues, apostel Juan a haña e revelacion cu esnan “cumprá for dje tera” pa goberná cu Cristo den cielu lo yega un total di solamente 144.000. (Revelacion 14:​1, 3; 20:⁠6) Ora nan ser compará cu e miyones di hende cu a biba riba tera, esei ta un cantidad chikitu en berdad.

Esnan Cu No Ta Bai Cielu

Kico ta sosodé cu esnan cu no ta bai cielu? Nan ta sufriendo den un lugá di tormento eterno, manera algun religion ta siña? Naturalmente cu no, pasobra Jehova ta un Dios di amor. Mayornan amoroso no ta tira nan yunan den candela, i Jehova no ta torturá hende den un manera asina.​—⁠1 Juan 4:⁠8.

E prospecto p’e gran mayoria di esnan cu a muri ta un resureccion pa ta den un paradijs terenal. Bijbel ta bisa cu Jehova a crea e tera “pa ser habitá.” (Isaías 45:18) E salmista a declará: “En cuanto e cielunan, na Jehova e cielunan ta pertenecé, pero e tera el a duna n’e yunan di hende.” (Salmo 115:16) Ta e tera, no cielu, cu lo ta e cas permanente di humanidad.

Jesus a profetisá: “E ora ta bini den cua tur esnan den e grafnan memorial lo tende su bos [esun di Jesus, e “Yu di hende”] i lo sali.” (Juan 5:​27-29) Apostel cristian Pablo a afirmá: “Mi tin speransa en cuanto Dios . . . cu lo bai tin un resureccion di tantu e hustunan como e inhustunan.” (Echo 24:15) Riba e staca di tormento, Jesus a primintí un malechor repentí bida mediante un resureccion den un paradijs terenal.​—⁠Lucas 23:⁠43.

Pero den ki condicion e mortonan cu lo ser resucitá na bida riba tera ta actualmente? Un suceso den e ministerio di Jesus ta yuda contestá e pregunta aki. Su amigu Lázaro a muri. Promé cu Jesus a bai pa resucit’é, El a bisa Su disipelnan: “Lázaro nos amigu a bai sosegá, pero mi ta bai aya pa lant’é for di soño.” (Juan 11:11) Asina Jesus a compará morto cu soño, un soño profundo sin soñamentu.

Durmiendo den Morto

Otro textonan ta armonisá cu e pensamentu aki di siendo drumí den morto. Nan no ta siña cu hende tin un alma inmortal cu ta pasa pa e region di spiritu despues di morto. Mas bien, Bijbel ta bisa: “E mortonan . . . no ta conciente di nada en absoluto . . . Nan amor i nan odio i nan yaluzí a perecé caba . . . No tin trabou ni planeamentu ni conocimentu ni sabiduria den Sheol [e graf], e lugá na unda bo ta bayendo.” (Eclesiastes 9:​5, 6, 10) Ademas, e salmista a declará cu hende “ta bolbe na su suela; den e dia ei su pensamentunan en berdad ta perecé.”​—⁠Salmo 146:⁠4.

E textonan aki ta mustra claramente cu esnan cu ta drumi den morto no por mira of tende nos. Nan ta incapas pa trece sea bendicion of calamidad. Nan no ta den cielu, ni tampoco nan ta biba den un comunidad di antepasadonan. Nan ta sin bida, fuera di existencia.

N’e debido tempu di Dios, esnan cu awor ta drumí den morto i cu ta den su memoria lo ser lantá na bida den un paradijs terenal. Esei lo ta un tera limpiá di contaminacion, dificultad i problema cu humanidad ta experenciá awor. Ki un tempu gososo esei lo ta! Den e Paradijs ei nan lo tin e prospecto di biba pa semper, pasobra Salmo 37:29 ta sigurá nos: “E hustunan mes lo poseé e tera, i nan lo biba riba dje pa semper.”

[Box on page 6, 7]

MI A STOP DI ADORA E MORTONAN

“Tempu mi tabata mucha, mi tabata yuda mi tata durante su sacrificionan regular na su defuntu tata. Na un ocasion ora mi tata a recuperá di un malesa teribel, e medium spiritista a bis’é cu como aprecio pa su recuperacion e mester ofrecé un sacrificio di un cabritu, yams, nechi [noot] di palu di ‘kola’ i likeur na su defuntu tata. Tambe mi tata a ser consehá pa suplicá su defuntu antepasadonan pa prevení mas malesa i calamidad.

“Mi mama a cumpra loke tabata necesario p’e sacrificio, cua lo a ser efectuá n’e graf di mi tawela. E graf tabata net banda di nos cas, na armonia cu e custumber local.

“Amigu, famia i bisiñanan a ser invitá pa bin observá e sacrificio. Mi tata, elegantemente bistí pa pas cu e ocasion, a sinta riba un stul enfrente dje tumba unda tabatin un rij di ­vários carpachi di cabes di cabritu cu a ser usá den sacrificionan anterior. Mi tarea tabata pa basha biña for di un botter den un beker chikitu, cua mi a entregá na mi tata. En buelta, el a bash’é riba suela den sacrificio. Mi tata a inbocá e nomber di su tata tres biaha i a resa na dje pa liberacion for di futuro calamidad.

“E nechinan di palu di ‘kola’ a ser ofrecé, i un chubat’i carné a ser matá, herebé i comí dor di tur esnan presente. Mi a participá den e comementu i a baila riba cantamentu i e tocamentu di tambú. Mi tata a baila di un manera masha bunita i rigoroso, maske bo por a mira cu e tabatin su añanan. De bes en cuando el a resa pa su antepasadonan bendicioná tur esnan presente, miéntras e hendenan, incluyendo ami, a contestá Ise, nificando ‘Sea asina.’ Mi a wak mi tata cu interes intenso i admiracion i a anhelá p’e dia ora lo mi ta suficiente grandi pa haci sacrificio na defuntu antepasadonan.

“Apesar dje hopi sacrificionan ofrecí, ainda no tabatin pas den e famia. Aunke mi mama tabatin tres yu homber na bida, ningun dje tres yu muhernan cu el a haña a biba mashá; tur a muri den infancia. Ora mi mama a sali na estado atrobe, mi tata a haci sacrificionan amplio p’e mucha nace sano i salbo.

“Mama a bolbe duna lus na un yu muher. Dos aña despues e mucha a bira malu i a muri. Mi tata a consultá cu e medium spiritista, kende a bisa cu un enemigu tabata responsabel p’e morto. E medium spiritista a bisa cu p’e ‘alma’ dje mucha bringa bek, un pida palu na candela, un botter di likeur i un yu di cachó tabata necesario p’e sacrificio. E palu na candela mester a ser poné rib’e graf, e likeur mester a ser di sprengu rib’e graf, i e yu di cachó mester a ser derá bibu banda dje graf. Esaki lo mester a spierta e alma dje mucha muher defuntu p’e venga su morto.

“Mi a hiba e botter di likeur i e palu na candela n’e graf, i mi tata a hiba e cachó chikitu, cua el a dera segun instruccion dje medium spiritista. Nos tur a kere cu dentro di siete dia e alma dje mucha muher defuntu lo a destruí e persona cu a causa su morto prematuro. Dos luna a pasa i no tabatin ningun ­noticia di morto den e becindario. Mi a keda desilusioná.

“Mi tabatin 18 aña di edad n’e tempu ei. Djis despues mi a topa Testigonan di Jehova, kendenan a mustrá mi for dje Scritura cu e mortonan no por haci ni bon ni malu na hende bibu. Segun cu conocimentu dje Palabra di Dios a saca rais den mi curason, mi a bisa mi tata cu lo mi no por compañ’é mas pa haci sacrificio n’e mortonan. Na promé instante el a rabia cu mi pasobra, manera el a expres’é, mi a lagu’é na caya. Pero ora el a ripará cu mi no tabata dispuesto pa renunciá mi fe nobo, e no a oponé mi adoracion na Jehova.

“Dia 18 di april, 1948, mi a simbolisá mi dedicacion mediante bautismo bou di awa. Desde e tempu ei, mi a sigui sirbi Jehova cu masha goso i satisfaccion, yudando otronan libra nan mes for di adoracion di defuntu ­antepasadonan, kendenan no por yuda nos ni perhudicá nos.”​—⁠Contribuí dor di J. B. Omiegbe, Stad Benin, Nigeria.

[Caption on page 6]

Lo tin gran goso ora e mortonan ser resucitá riba un tera paradísico