Informe di Proclamadornan di Reino

Alcansando Tur Clase di Hende cu e Berdad

APOSTEL Pablo tabata un proclamador celoso dje Reino di Dios. E no a permití oposicion interferí cu su comision di predicá “e bon nobo.” (1 Corintionan 9:16; Echonan 13:50-52) Pablo a urgi otronan pa sigui su ehempel.—1 Corintionan 11:1.

Testigonan di Jehova ta conocí rond mundu pa nan esfuersonan determiná pa predicá. En berdad, nan ta papia cu otro hende tantu den “tempu faborabel” como den “tempu difícil” pa cumpli cu e trabou cu Dios a manda nan di “haci disipel.” (2 Timoteo 4:2; Mateo 28:19, 20) Asta den paisnan caminda nan ta experenciá oposicion, personanan di curason onrado ta ser alcansá cu e mensahe importantísimo tocante e Reino di Dios, manera e siguiente experencianan ta ilustrá.

◻ Riba un isla den e parti west di Laman Pacífico unda e trabou di Testigonan di Jehova ta prohibí, un hobencito di 12 aña a ripará cu ta mal asociacion so e tabatin na scol. Hopi di su compañeronan di klas tabatin custumber di huma sigaria, lesa literatura pornográfico, pester maestronan i bringa cu otro. E situacion a bira asina malu cu e mucha a pidi su tata si e por a bai un otro scol. Sin embargo, e tata a razoná cu su yu pa desconseh’é esei, ya cu el a haña cu e conducta dje studiantenan n’e otro scol den cercania lo no tabata diferente. Sin embargo, con e tabatin cu yuda su yu?

E tata a corda cu e tabatin un buki pa hóbennan den cas. Tabata un regalo di un pariente cu tabata un Testigo di Jehova. Di manera cu el a busca e buki, i asina cu el a hañ’é, el a duna su yu e. E tabata titulá Loke hovenan sa puntra—Contesta práctica.a E hobencito a haña e capítulo “Con mi por trata cu presion di otro hóbennan?” specialmente útil. No solamente esei a siñ’é e importancia di mantené respet propio, sino tambe a siñ’é con pa bisa no cu tacto ora otronan a purba pone presion riba dje pa sigui un curso imprudente. Dor di aplicá e principionan bíblico hañá den e buki, e hóben a siña con pa enfrentá presion di su pareunan cu éxito.

Notando esaki i otro cambionan positivo den su yu, e tata a dicidí na lesa e buki. Impresioná pa e conseho práctico hañá den e buki, e tata a pidi Testigonan di Jehova pa un studio di Bijbel na cas. Despues, otro miembronan di su famia a uni cuné den e studio. E resultado? E hobencito, su ruman homber mas yong, su tata, i su dos welonan parti tata awor ta Testigo di Jehova.

◻ Den e mésun pais, dos Testigo di Jehova a ser encarcelá debí na nan obedencia estricto na principionan di Bijbel. Sin embargo, nan no a laga nan situacion stroba nan di papia cu curashi tocante e Reino di Dios. Nan a acercá un funcionario di prizon i a haña permit pa conmemorá e Cena di Señor ei den. Ki contentu nan a keda ora 14 prezu a expresá interes den Bijbel i a uni cu e Testigonan p’e evento importante aki! Despues cu nan a sali liber, algun di nan a sigui studia Bijbel i asociá cu Testigonan di Jehova.

Den mas cu 25 pais, Testigonan di Jehova ta sufri como resultado di prohibicion of vários forma di oposicion of persecucion. Sin embargo, mescos cu e apostelnan, nan ta sigui “sin stop siñando i declarando e bon nobo tocante e Cristo, Jesus.”—Echonan 5:42.

[Nota]