“Bo Curason Ta Recto cu Mi?”

“Bini cu mi, sí, i mira con mi no ta tolerá rivalidad pa cu Jehova.”—2 Reynan 10:16.

1, 2. (a) Con e situacion religioso di Israel a bai di malu pa pió? (b) Na 905 P.E.C., ki cambionan dramático tabata cla pa tuma lugá den Israel?

AÑA 905 P.E.C. tabata un tempu di cambio grandi den Israel. Casi 100 aña mas promé, Jehova a causa p’e reino uní di Israel ser dividí debí n’e apostasia di Sálomon. (1 Reynan 11:9-13) E tempu ei, Rehoboam, yu di Sálomon, tabata goberná e reino di zuid, Huda, miéntras cu e reino di nort, Israel, a bini bou di Rey Jeroboam, desendiente di Efraim. Desafortunadamente, e reino di nort tabatin un cuminsamentu desastroso. Jeroboam no tabata kier pa su súbditonan biaha bai n’e reino di zuid pa adorá n’e tempel, pasobra e tabatin miedu cu nan lo a haña gana di regresá n’e cas di David. P’esei el a lanta un adoracion di bisé den Israel i asina a establecé un patronchi di idolatria cu a dura pa un tempu atrabes dje historia dje reino di nort.—1 Reynan 12:26-33.

² Cosnan a bira pió ora Acab, yu di Omri, a bira rey. Su esposa stranhero, Jezabel, a promové adoracion di Baal i a mata e profetanan di Jehova. Apesar di profeta Elías su spiertamentunan franco, Acab no a haci nada pa stop e. Sin embargo, na 905 P.E.C., Acab tabata morto, i Jehoram, su yu, tabata goberná. Awor tabata tempu p’e tera ser limpiá. Elías su sucesor, Eliseo, a informá e comandante militar, Jehú, cu Jehova tabata ungiend’e pa ser e siguiente rey di Israel. Kico tabata su comision? Pa tumba e cas pecaminoso di Acab i venga e sanger dje profetanan cu Jezabel a drama!—2 Reynan 9:1-10.

3, 4. Con Jehónadab a mustra cu su curason tabata ‘recto cu e curason di Jehú’?

³ Obedeciendo e mandamentu di Dios, Jehú a laga mata e malbado Jezabel, i despues di esei el a cuminsá limpia Israel dor di tumba e cas di Acab. (2 Reynan 9:15-10:14, 17) E ora ei el a topa un apoyadó. “El a bin contra cu Jehónadab, yu di Recab, cu tabata bini pa topa cuné. Ora el a bendicion’é, el a bis’é riba esei: ‘Bo curason ta recto cu mi, mescos cu mi mes curason ta cu bo curason?’ Na esaki Jehónadab a bisa: ‘E ta.’ ‘Si e ta, duná mi bo man.’ Di manera cu el a dun’é su man. Cu esei, [Jehú] a hacié subi den e garoshi huntu cuné. Anto el a bisa: ‘Bini cu mi, sí, i mira con mi no ta tolerá rivalidad pa cu Jehova.’ I nan a hacié sigui core cuné den su garoshi di guera.”—2 Reynan 10:15, 16.

⁴ Jehónadab (of, Jónadab) no tabata un israelita. No obstante, na armonia cu su nomber (cu ta nificá “Jehova Ta Dispuesto,” “Jehova Ta Nobel,” of “Jehova Ta Generoso”) e tabata un adoradó di Jehova. (Jeremías 35:6) Sigur sigur, e tabatin un interes extraordinario den mira con Jehú “no ta tolerá rivalidad pa cu Jehova.” Con nos por sa? Wel, no tabata pa casualidad cu el a topa e rey ungí di Israel. Jehónadab tabata “bini pa topa cuné,” i esaki na un tempu ora Jehú ya a mata Jezabel caba i otronan den e cas di Acab. Jehónadab tabata sa loke tabata sosodiendo ora el a aceptá e invitacion di Jehú pa subi den su garoshi. E tabata indudablemente n’e banda di Jehú, i di Jehova, den e conflicto aki entre adoracion falsu i berdadero.

Un Jehú Moderno i un Jehónadab Moderno

5. (a) Ki cambionan lo tuma lugá pronto pa henter humanidad? (b) Ken ta e Jehú Mayor, i ken ta represent’é riba tera?

⁵ Awe, cosnan lo cambia pronto mes radicalmente pa henter humanidad mescos cu nan a cambia pa Israel aya na 905 P.E.C. E tempu ta cerca awor pa Jehova limpia e tera di tur e mal resultadonan di Satanas su influencia, incluyendo religion falsu. Ken ta e Jehú moderno? Ningun otro cu Jesucristo, na ken e palabranan profético a ser dirigí: “Faha bo spada riba bo bel, O poderoso, cu bo dignidad i bo splendor. I den bo splendor sigui padilanti te na éxito; core den e causa dje berdad i humildad i husticia.” (Salmo 45:3, 4) Jesus ta ser representá riba tera pa “e Israel di Dios,” cristiannan ungí “cu ta warda e mandamentunan di Dios i cu tin e trabou di duna testimonio di Jesus.” (Galationan 6:16; Revelacion 12:17) Desde 1922, e rumannan ungí aki di Jesus a spierta sin miedu di Jehova su binidero actonan di huicio.—Isaías 61:1, 2; Revelacion 8:7-9:21; 16:2-21.

6. Ken a sali for dje nacionnan pa apoyá cristiannan ungí, i con nan, na moda di papia, a drenta e garoshi dje Jehú Mayor?

⁶ Cristiannan ungí no ta nan so. Mescos cu Jehónadab a sali pa topa cu Jehú, hopi hende dje nacionnan a sali bin apoyá Jesus, e Jehú Mayor, i su representantenan terenal den nan posicion pa adoracion berdadero. (Zacarías 8:23) Jesus a yama nan su “otro carnénan,” na 1932 nan a ser reconocé como un ekivalente moderno di Jehónadab di antigwedad i a ser invitá pa ‘drenta den e garoshi’ dje Jehú moderno. (Juan 10:16) Con asina? Dor di “warda e mandamentunan di Dios” i participá cu e ungínan den “e trabou di duna testimonio di Jesus.” Den e tempu actual, esaki ta incluí predicá e bon nobo dje Reino establecí di Dios bou di Jesus como Rey. (Marco 13:10) Na 1935 e “jónadabnan” aki a ser identificá como e “multitud grandi” di Revelacion 7:9-17.

7. Con cristiannan awe a mustra cu nan ‘curason ta recto ainda’ cu Jesus su curason?

⁷ Desde añanan ’30, e multitud grandi i nan rumannan ungí cu curashi a duna prueba di nan apoyo na adoracion berdadero. Den algun pais na Oost i West Europa, Lehano Oriente i Africa, hopi di nan a muri pa nan fe. (Lucas 9:23, 24) Den otro paisnan, nan a ser encarcelá, maltratá of persiguí den otro maneranan. (2 Timoteo 3:12) Ki un registro di fe nan a traha! I e Raport di Aña di Sirbishi pa 1997 ta mustra cu ainda nan ta determiná pa sirbi Dios, sin importá kico pasa. Nan ‘curason ta recto ainda’ cu Jesus su curason. Esaki a ser demostrá durante 1997, ora 5.599.931 publicadó di Reino, casi nan tur siendo “jónadab,” a dedicá un total di 1.179.735.841 ora den e trabou di duna testimonio di Jesus.

Ainda Nan Ta Predicá cu Celo

8. Con Testigonan di Jehova ta mustra nan celo pa adoracion berdadero?

⁸ Jehú tabatin un reputacion pa core su garoshi na un velocidad haltu—un evidencia di su celo pa cumpli cu su tarea. (2 Reynan 9:20) Jesus, e Jehú Mayor, ta ser describí como siendo “devorá” cu celo. (Salmo 69:9) No ta un sorpresa anto cu cristiannan berdadero awe ta conocí pa nan celo. Tantu den e congregacion i n’e público, nan ta “predicá e palabra . . . urgentemente den tempu faborabel, den tempu desfaborabel.” (2 Timoteo 4:2) Nan celo tabata specialmente bisto durante e promé parti di 1997 despues cu un artículo den Nos Ministerio di Reino a animá mas tantu publicadó posibel pa participá den e sirbishi di pionero auxiliar. Tur pais a fiha un cantidad como meta pa pioneronan auxiliar. Con e reaccion tabata? Sobresaliente! Hopi sucursal a surpasá e cantidad fihá como meta. Ecuador a fiha un meta di 4.000 pero na mart a informá 6.936 pionero auxiliar. Hapon a informá un total di 104.215 durante e tres lunanan aki. Na Zambia, caminda 6.000 tabata e meta, 6.414 pionero auxiliar a informá na mart, 6.532 na april, i 7.695 na mei. Mundialmente, e máximo di pionero auxiliar i regular huntu tabata 1.110.251, un aumento di 34,2 porciento riba 1996!—Romanonan 10:10.

9. Ademas dje trabou di predica di cas-pa-cas, den ki otro maneranan Testigonan di Jehova ta haña hende pa conta nan dje bon nobo?

⁹ Apostel Pablo a bisa e ancianonan di Efeso: “Mi no a nenga di bisa boso ningun dje cosnan cu tabata probechoso ni di siña boso públicamente i di cas pa cas.” (Echonan 20:20) Awe Testigonan di Jehova ta imitá Pablo su ehempel i ta predicá e bon nobo celosamente di cas pa cas. Sin embargo, kisas no ta fácil pa haña hende na nan cas. P’esei, “e esclabo fiel i discreto” ta animá publicadónan di Reino pa acercá hende na nan lugá di negoshi, riba caya, na playa, den parkenan público—unda cu nan por haña hende. (Mateo 24:45-47) E resultadonan tabata excelente.

10, 11. Con publicadónan den dos pais a demostrá iniciativa excelente pa localisá esnan interesá cu normalmente no sa ta na cas?

¹⁰ Na Kopenhagen, Dinamarca, un grupo chikitu di publicadó tabata dunando testimonio den e cayanan pafó di stacionnan di trein. For di januari pa juni, nan a laga 4.733 revista, por a papia cu hopi hende, i a haci hopi rebishita. Vários publicadó den e pais ei a establecé rutanan di revista den áreanan di negoshi. Na un cierto pueblo tin un marshe grandi tur diabierne, i miles di hende ta bini ei. P’esei e congregacion a haci areglo pa duna testimonio regularmente n’e marshe. Den un área nan ta bishitá e scolnan cu un pakete di informacion cu a contené publicacionnan cu ta specialmente apropiado pa maestronan di scol.

¹¹ Na Hawai tambe esfuersonan a ser hací pa alcansá esnan cu no por ser hañá na cas. Entre e teritorionan special tin áreanan público (caya, parke, lugá di parkeer, i parada di bus), áreanan di centro di stad, centronan comercial i aeropuerto, dunamentu di testimonio via telefon, transporte público (predicacion den bus), i campusnan di universidad. E congregacion ta haci sigur pa asigná e cantidad apropiado di Testigo na cada teritorio i cu esnan asigná ta ser entrená apropiadamente. Esfuersonan bon organisá similar na esakinan ta ser informá den hopi pais. Como resultado, nan ta topa hendenan interesá cu probablemente nunca lo a ser hañá den e ministerio di cas-pa-cas.

Nan Ta Para Firme

12, 13. (a) Ki táctica Satanas a usa contra Testigonan di Jehova durante 1997? (b) Con publicidad falsu a resultá contraproducente den un pais?

¹² Den un cantidad di pais na 1997, Testigonan di Jehova tabata víctima di publicidad malicioso i falsu cu a ser promové cu e aparente obhetivo di tuma posibel accion legal contra nan. Pero nan no a hala atras! (Salmo 112:7, 8) Nan a corda e oracion dje salmista: “Esun presuntuoso a manchá mi cu falsedad. En cuanto ami, cu tur mi curason lo mi warda bo ordunan.” (Salmo 119:69) Publicidad yen di mentira asina ta simplemente un evidencia cu cristiannan berdadero ta ser odiá manera Jesus a profetisá. (Mateo 24:9) I algun biaha esei a resultá contraproducente. Un homber na Bélgica a lesa un artículo difamatorio tocante Testigonan di Jehova den un korant bon conocí. Di shok p’e comentarionan calumniador, el a asistí na un reunion na un Salon di Reino e siguiente diadomingo. El a haci areglo pa studia Bijbel cu e Testigonan i a sigui progresá rápidamente. Anteriormente, e homber aki tabata miembro di un gèng. Su studio di Bijbel a yud’é drecha su bida, algu cu hende rond di dje a ripará. Siguramente, e escritor dje artículo calumniador no tabatin un resultado asina na mente!

¹³ Algun hende di curason onrado na Bélgica tabatin e curashi di papia contra e propaganda yen di engaño. Entre nan tabatin un ex-promé minister cu a duna boca cu e tin hopi admiracion pa loke Testigonan di Jehova a logra. I un diputado a skirbi: “Contrario n’e insinuacionnan cu tabata circulá na cierto ocasionnan, pa ami, [Testigonan di Jehova] no ta representá ni e mínimo menasa pa Estado. Nan ta ciudadanonan cu ta stima pas, conciencial i respetuoso pa cu autoridadnan.” Sabí, en berdad ta e palabranan di apostel Pedro: “Mantené boso conducta excelente entre e nacionnan, pa cu, den loke nan ta papia contra boso como malechor, nan, como testigo ocular di boso obranan excelente, por glorificá Dios den e dia di su inspeccion.”—1 Pedro 2:12.

Un Celebracion Sobresaliente di Memorial

14. Cua tabata algun informe excitante di asistencia na Memorial na 1997?

¹⁴ Ta apropiado pa esnan cu ta duna testimonio di Jesus mira e Memorial di su morto como un punto culminante den nan aña. Na 1997, 14.322.226 persona tabata presente dia 23 di mart pa celebrá e evento. Esei tabata riba 1.400.000 mas cu na 1996. (Lucas 22:14-20) Den hopi pais e asistencia na Memorial tabata hopi mas tantu cu e cantidad di publicadó di Reino, mustrando prospectonan excelente pa futuro aumento. Por ehempel, na Haiti, aña 1997 a conoce un máximo di 10.621 publicadó, mientras cu 67.259 a asistí n’e Memorial. Bo por chek e raport anual riba página 18 pa 21 i mira cuantu otro pais tabatin asistencianan haltu asina compará cu e cantidad di publicadónan.

15. Den algun pais, con nos rumannan a vence problemanan serio pa por a celebrá e Memorial?

¹⁵ Pa algun ruman, no tabata fácil pa asisti n’e Memorial. Na Albania tabatin un toke de keda pa 7:00 p.m. pa motibu di desordu civil. Den 115 grupo chikitu rond e pais, e Memorial a cuminsá 5:45 p.m. Solo a baha 6:08 p.m., loke a marca e cuminsamentu di 14 di nísan. E emblemanan a ser pasá rond di 6:15 p.m. Den mayoria caso e oracion final tabata rond di 6:30 p.m., i esnan cu a asistí a pura bai cas promé cu e toke de keda cuminsá. Tog, e asistencia na Memorial tabata 3.154 compará cu un máximo di publicadó di 1.090. Den un pais africano, desordu civil a haci e Salon di Reino inaccesibel, di manera cu dos anciano a dicidí di reuní den e cas di un di tres anciano pa haci areglo pa tene e celebracion den gruponan mas chikitu. Pa por a yega n’e cas, e dos ancianonan tabatin cu crusa un canal di afvoer. Sin embargo, tabatin un bringamentu den e área, i francotiradónan tabata tira riba tur hende cu a purba crusa e canal. Un anciano a core pasa e canal sin incidente. E di dos tabata crusando ora el a tende un tiru. El a tira su mes abou i a lastra bai na un lugá sigur miéntras cu bala tabata skeiru riba su cabes. E ancianonan a tene un reunion exitoso, i nan a percurá p’e necesidadnan dje congregacion.

“For di Tur Nacion i Tribu . . . i Lenga”

16. Con e clase di esclabo fiel i discreto a haci areglo p’e bon nobo ser plamá entre gruponan chikitu di idioma?

¹⁶ Apostel Juan a mira cu e multitud grandi lo a “sali for di tur nacion i tribu i pueblo i lenga.” (Revelacion 7:9) P’esei, e Cuerpo Gobernante ta haci areglo pa haci literatura disponibel den mas i mas idioma—incluyendo esnan cu tribunan remoto i gruponan chikitu di hende ta papia. Na Mozambique, por ehempel, e tratado Bida den un trankilu mundo nobo a ser publicá na cincu idioma mas. Na Nicaragua, e foyeto Disfrutá di bida riba tera pa semper! a ser hací disponibel na idioma miskito—e promé publicacion di Sociedad Watch Tower den e lenga ei. Hopi indjan miskito a aceptá e foyeto cu goso ora nan a mira algu den nan mes idioma. Na 1997 Sociedad a aprobá pa literatura ser publicá na 25 idioma mas i a imprimí mas cu mil miyon revista.

17. Ki grupo di idioma a ser yudá na Korea, i con videocasetnan a yuda e seccion aki dje poblacion den un gran manera?

¹⁷ Na Korea un otro grupo di idioma a ser yudá. Aña 1997 a mira e promé congreso na idioma di seña koreano. Tin 15 congregacion di idioma di seña na Korea cu 543 publicadó, pero 1.174 a asistí n’e congreso, i 21 a ser bautisá. Pa yuda e surdunan cu no por comprendé fácilmente e palabra papiá of skirbí, ta producí publicacionnan riba videocaset na 13 diferente idioma di seña. Dje manera ei, e surdunan ta ser yudá pa “lesa” i asta studia e bon nobo, cu resultadonan excelente. Na Merca, anteriormente por a tuma te cu cincu aña pa un persona surdu progresá te n’e punto di bautismo. Awor, cu un cantidad di video disponibel den Idioma di Seña Mericano, pa algun hende surdu, esei a ser reducí na rond di un aña.

Laga Nos ‘Permanecé den e Garoshi’

18. Despues di a topa cu Jehónadab, kico Jehú a cuminsá haci?

¹⁸ Aya na 905 P.E.C., despues cu Jehónadab a uni cuné, Jehú a cuminsá destruí adoracion falsu. El a emití un invitacion na tur adoradó di Baal: “Santificá un asamblea solem pa Baal.” Anto el a manda mensahero dor di henter e pais pa haci sigur cu ningun adoradó di Baal a keda afó. Segun cu e multitudnan a basha drenta den e gran tempel dje dios falsu, Jehú a haci sigur pa ningun adoradó di Jehova ta eiden. Finalmente, Jehú i su ehército a mata e adoradónan di Baal. “Asina Jehú a anikilá Baal for di Israel.”—2 Reynan 10:20-28.

19. En bista di loke tin den futuro pa humanidad, ki spiritu nos mester desplegá, i cu ki tarea nos tin cu ocupá nos mes diligentemente?

¹⁹ Awe, e huicio final di tur religion falsu ta djis tras di porta. Bou di direccion angelical cristiannan ta proclamando bon nobo na tur humanidad, animando nan pa teme Dios i pa separá nan mes for di religion falsu. (Revelacion 14:6-8; 18:2, 4) Esnan mansu ta ser animá pa someté nan mes n’e Reino di Dios bou di Jehova su Rey entronisá, Jesucristo. (Revelacion 12:10) N’e tempu excitante aki, nos no mester permití nos celo debilitá, ma laga nos para firme pa adoracion berdadero.

20. Kico lo bo ta determiná pa haci durante e aña di sirbishi di 1998?

²⁰ Un biaha, ora Rey David tabata bou di hopi presion, el a bisa den oracion: “Mi curason ta constante, O Dios, mi curason ta constante. Lo mi elogiá bo entre e pueblonan, O Jehova.” (Salmo 57:7, 9) Laga nos tambe sea constante. Durante e aña di sirbishi di 1997, apesar di hopi dificultad, un gritu fuerte di alabansa a ser duná p’e gloria di Jehova Dios. Laga pa un gritu similar, asta mas grandi, ser tendé durante e aña di sirbishi actual. I laga esaki ta cierto sin importá loke Satanas purba haci pa desanimá nos of oponé nos. Dje manera ei, nos lo mustra cu nos curason ta keda recto cu e curason dje Jehú Mayor, Jesucristo, i nos lo respondé cu henter nos alma n’e spiertamentu inspirá: “Alegrá den Jehova i sea gososo, boso e hustunan; i sclama gososamente, boso tur cu ta recto di curason.”—Salmo 32:11.

Bo Por Splica?

◻ Ki cambionan a tuma lugá den Israel na 905 P.E.C.?

◻ Ken ta e Jehú moderno, i con e “multitud grandi” a demostrá cu nan ‘curason ta recto’cu su curason?

◻ Ki estadísticanan for dje raport anual ta ilustrá e celo cu Testigonan di Jehova a demostrá durante e aña di sirbishi di 1997?

◻ Sin importá kico Satanas por haci contra nos, ki spiritu nos lo demostrá durante e aña di sirbishi di 1998?

[Tabèl na página 18-21]

RAPORT DI AÑA DI SIRBISHI DI 1997

(Wak e edishon imprimí di e revista akí.)

[Plachi na página 15]

E asistencia sobresaliente n’e Memorial ta mustra prospectonan excelente pa futuro aumento

[Plachi na página 16]

Mescos cu Jehónadab a apoyó Jehú, asína e “multitud grandi” awe ta apoyá Jehú Mayor, Jesucristo, i su rumannan ungí