Alcansando Asta Mas Hende cu e Bon Nobo

SEGUN cu mi tabata pensa riba e hendenan den e pais caminda mi ta biba, mi a realisá cu hopi conocé Testigonan di Jehova solamente for di informenan di noticia. Mi a pensa cu mester busca contacto cu e hendenan aki pa nan por siña ken Testigonan di Jehova ta i loke nan realmente ta kere. Pero con mi por a yuda? Mi esposo ta un anciano cristian, i el a duná mi guia i sugerencianan sabí.

Nos a haña un idea clave den e artículo “Revistanan cu Ta Duna Consuelo Práctico,” publicá den e edicion dje revista Spierta! [na spañó] di 8 di januari, 1995. Relacioná cu e actividad di un Testigo, e artículo ta bisa: “El a tuma pa custumber pa colectá ehemplarnan mas bieu di cierto edicion di Spierta! cu otro Testigonan a acumulá na cas. Despues e ta bishitá organisacionnan cu e ta kere cu lo por tin interes special den algun dje temanan.”

Cu yudansa di mi esposo, no a dura muchu cu mi a colectá vários shen ehemplar dje revistanan. For di esakinan mi por a selectá un variedad di tópiconan apropiado pa hende cu lo mi a purba haña contacto cuné.

Usando buki di telefon i registronan público, mi a compilá un lista cu ta representá hospital, instituto pa hóbennan i casnan di cuido. Tambe mi a pone riba lista directornan di agencianan funerario, supervisor i conseheronan di scol, inspectornan médico i funcionarionan di prizon i corte di husticia. Mi lista a incluí director di institutonan pa alcohólico i adictonan di droga, asociacionnan pa asuntunan ambiental, pa esnan desabilitá i víctimanan di guera i investigacion di nutricion. Tampoco mi a pasa por haltu di gerentenan di oficinanan pa asuntunan di bienestar, servicionan social i di famia.

Kico Lo Mi Bisa?

E promé cos cu mi tabata haci ora mi a bai pa un bishita tabata di identificá mi mes claramente. Despues mi a mencioná cu mi bishita lo a tuma solamente un par di minuut.

Una bes cu mi tabata cara-cara cu e persona encargá, mi tabata bisa: “Mi ta un Testigo di Jehova. Sin embargo, mi no ta aki pa papia over di religion, loke por ta inapropiado durante oranan di oficina.” Generalmente e atmósfera tabata bira mas relahá. Anto, adaptando mi comentarionan n’e situacion, mi tabata sigui: “Mi bishita tin dos motibu. Na promé lugá, mi ta deseá di expresá mi aprecio p’e trabou cu boso oficina ta organisá. Al fin i al cabo, nos no mester subestimá e echo cu un hende ta dedicá su tempu i energia na fabor dje público en general. Siguramente mester encomendá esaki.” Den hopi caso e persona cu a ser acercá den e manera aki a keda sorprendí.

Pa awor e persona muy probablemente ta puntra su mes kico e di dos motibu di mi bishita tabata. Mi tabata sigui: “E di dos motibu di mi bishita ta esaki: For di nos revista Spierta!, cu ta ser publicá internacionalmente, mi a selectá algun artículo cu ta trata particularmente cu bo tipo di trabou i e problemanan asociá cuné. Mi ta sigur cu lo bo kier sa con un revista internacional ta mira e problemanan aki. Lo mi ta contentu pa laga e ehemplarnan aki cerca bo.” Hopi biaha nan a bisá mi cu nan a apreciá mi esfuersonan.

Resultadonan Sorprendente i Recompensador

Ora mi a usa e método aki, mayoria hende a ricibí mi amigablemente; solamente un di cada 17 persona cu mi a papia cuné a rechasá mi oferta. Mi tabatin un cantidad di experencia cu tabata tantu sorprendente como recompensador.

Por ehempel, despues cu mi a purba cuater biaha i a spera cu pacenshi, mi a logra reuní cu un inspector di scol dje distrito. E tabata un homber hopi ocupá. Tog, e tabata masha amigabel i a papia un ratu cu mi. Ora mi tabata cla pa bai, el a bisa: “Di berdad mi ta apreciá bo esfuerso, i definitivamente lo mi lesa bo literatura cuidadosamente.”

Na un otro ocasion, mi a bishitá un corte di distrito i a topa e hues principal, un homber di edad medio. Ora mi a drenta su oficina, el a hisa cara for di su papelnan un poco iritá.

“Oranan di oficina ta diamars mainta so, i e ora ei lo mi ta disponibel pa cualkier informacion,” el a bisa cu un stem di mal beis.

“Permití mi disculpá mi mes pa a bini na un ora inapropiado,” mi a contestá lihé i agregá: “Naturalmente, lo mi ta contentu pa bini un otro biaha. Pero eigenlijk mi bishita ta di un caracter privá.”

Awor e hues a bira curioso. El a puntra, den un tono muchu ménos hostil, kico mi tabata kier. Mi a ripití cu lo mi bishit’é atrobe riba diamars.

“Por fabor, tuma asiento,” el a insistí, pa mi sorpresa. “Kico bo kier?”

A sigui un combersacion animá, i el a pidi despensa pa tabata asina antipático na cuminsamentu debí cu e tabata realmente hopi ocupá.

“Bo sa kico mi ta gusta dje Testigonan di Jehova?” e hues a puntra despues di un ratu. “Nan tin principionan bon fundá for di cua nan no ta desviá. Hitler a purba tur loke e tabata por, pero tog e Testigonan no a bai guera.”

Ora ami cu un ruman muher a drenta un oficina, e secretarianan ei a reconocé nos. Anto e secretaria ehecutivo a bisa masha secu: “E presidente no sa ricibí ningun grupo.”

“Pero lo e ricibí nos,” mi a contestá cu calmu, “pasobra nos ta Testigonan di Jehova. Nos no a bini pa pidi nada, i nos bishita lo no dura mas cu tres minuut.” Den mi curason mi a haci oracion fervientemente, “O Jehova, por fabor, laga esaki bai bon!”

E secretaria a respondé den un manera reservá: “Ta bon, anto, lo mi purba.” El a cana bai. Despues di mas o ménos dos minuut cu a parce manera un eternidad pa mi, el a reaparecé siguí pa e presidente mes. Sin bisa un palabra, el a guia nos na su oficina, pasando dos otro oficina.

Ora nos a cuminsá combersá, el a bira mas i mas amigabel. Gustosamente el a aceptá e edicionnan special dje revista Spierta! ora nos a ofrecé nan. Nos a gradicí Jehova p’e oportunidad aki pa duna un bon testimonio tocante e propósito di nos trabou.

Mirando bek riba e hopi experencianan maraviyoso, mi a bin apreciá mas plenamente loke apostel Pedro a bisa: “Siguramente mi ta percibí cu Dios no ta parcial, sino den tur nacion e hende cu ta tem’é i ta obra husticia ta aceptabel p’e.” (Echonan 10:34, 35) E boluntad di Dios ta pa hende di tur antecedente, idioma of posicion social ricibí e oportunidad pa conocé su propósito pa humanidad i p’e tera.—Contribuí.