Cumpliendo cu Dedicacion Cristian den Libertad

“Caminda e spiritu di Jehova ta, tin libertad.”​—2 CORINTIONAN 3:17.

1. Na ken Testigonan di Jehova ta dedicá, i pakico nan ta usa agencianan legal?

TESTIGONAN DI JEHOVA ta kere cu nan religion lo dura pa semper. P’esei nan ta anticipá di sirbi Dios “cu spiritu i cu berdad” pa tur eternidad. (Juan 4:​23, 24) Como hende cu un boluntad liber, e cristiannan aki a haci un dedicacion sin reserva na Jehova Dios i ta dicididu pa cumpli cuné. Cu e fin ei, nan ta dependé riba e Palabra di Dios i riba su spiritu santu. Segun cu e Testigonan ta sigui di henter curason nan curso di dedicacion cristian den e libertad cu Dios ta duna, nan ta mustra debido respet p’e papel di ‘autoridadnan gubernamental superior’ i nan ta haci uso apropiado di medio i percuracionnan legal. (Romanonan 13:1; Santiago 1:25) Por ehempel, e Testigonan ta usa Sociedad Watch Tower como un instrumento legal​—un di hopi den vários pais​—pa permití nan cumpli cu nan trabou di yuda nan próhimo, specialmente den maneranan spiritual. Pero e Testigonan ta dedicá na Dios, no na ningun agencia legal, i nan dedicacion na Jehova lo dura pa semper.

2. Pakico Testigonan di Jehova tin hopi aprecio pa Sociedad Watch Tower i agencianan legal similar?

² Como sirbidónan dedicá na Dios, Testigonan di Jehova ta obligá pa sigui Jesus su instruccion di “haci disipel di hende di tur nacion, bautisando nan den e nomber dje Tata i dje Yu i dje spiritu santu, siñando nan.” (Mateo 28:​19, 20) E trabou aki lo continuá te n’e fin dje sistema di cosnan aki, pasobra Jesus a bisa tambe: “E bon nobo aki dje reino lo ser predicá den tur e tera habitá como testimonio pa tur nacion; i e ora ei e fin lo yega.” (Mateo 24:​3, 14) Tur aña, plantanan di imprenta di Sociedad Watch Tower i agencianan legal similar ta suministrá Testigonan di Jehova cu miyones di Bijbel, buki, foyeto i revista pa usa den nan actividad mundial di predicá. P’esei e entidadnan legal aki ta baliosísimo den yuda sirbidónan dedicá di Dios cumpli cu nan dedicacion na dje.

3. Den ki sentido Testigonan di Jehova tabata usa e término “Sociedad” anteriormente?

³ Un hende lo por argumentá cu e manera cu e Testigonan ta papia tocante Sociedad Watch Tower​—of mas frecuentemente djis “Sociedad”​—ta indicá cu nan ta mir’é como mas cu un instrumento legal. Nan no ta consider’é e autoridad final riba asuntunan di adoracion? E buki Los testigos de Jehová, proclamadores del Reino de Dios ta clarificá e punto aki dor di splica: “Ora E Toren di Vigilancia [edicion ingles di 1 di juni, 1938] a referí na ‘Sociedad,’ esaki a nificá, no un simpel instrumento legal, sino e cuerpo di cristiannan ungí cu a forma e entidad legal ei i us’é.”a P’esei e expresion a representá “e esclabo fiel i discreto.” (Mateo 24:45) Ta den e sentido aki e Testigonan generalmente a usa e término “Sociedad.” Claro cu e corporacion legal i “e esclabo fiel i discreto” no ta términonan cu nos por cambia cu otro. E directornan di Sociedad Watch Tower ta ser elegí, miéntras cu e Testigonan cu ta forma e “esclabo fiel” ta ser ungí dor di Jehova su spiritu santu.

4. (a) Con hopi Testigo ta expresá nan mes pa asina evitá malcomprendimentu? (b) Pakico nos mester ta balansá pa loke ta trata terminologia?

⁴ Afin di evitá malcomprendimentu, Testigonan di Jehova ta trata di ser cauteloso tocante con nan ta expresá nan mes. En bes di bisa, “Sociedad ta siña,” hopi Testigo ta preferá di usa expresionnan manera, “Bijbel ta bisa” of, “m’a comprendé cu Bijbel ta siña.” Den e manera aki nan ta enfatisá e decision personal cu cada Testigo a tuma pa aceptá siñansa di Bijbel i asina tambe nan ta evitá di duna e impresion eróneo cu Testigonan di un of otro manera ta mará na loke un of otro secta religioso ta dicta nan. Naturalmente, sugerencianan en cuanto terminologia nunca mester bira un tópico di controversia. Al fin i al cabo, terminologia ta importante solamente n’e grado cu e ta prevení malcomprendimentu. Balansa cristian ta necesario. Bijbel ta spierta nos “pa no bringa riba palabra.” (2 Timoteo 2:​14, 15) Tambe e Scritura ta declará e principio aki: “A ménos cu boso expresá abla fácil pa comprendé cu e lenga, con hende por sa loke ta ser papiá?”​—1 Corintionan 14:9.

E Spiritu di Dios Ta Reducí e Necesidad di Regla

5. Con nos tin cu comprendé 1 Corintionan 10:23?

⁵ “Tur cos ta legal; pero no ta tur cos ta bentahoso,” apostel Pablo a skirbi. El a agregá: “Tur cos ta legal; pero no ta tur cos ta edificá.” (1 Corintionan 10:23) Ta claro cu Pablo no tabata kier men cu ta legal pa haci cosnan cu e Palabra di Dios ta condená specíficamente. Compará cu e mas o ménos 600 leynan duná na antiguo Israel, tin comparativamente poco mandamentu explícito cu ta regulá bida cristian. P’esei, hopi asuntu ta ser lagá na concenshi di cada individuo. Un persona cu a haci un dedicacion na Jehova ta disfrutá dje libertad cu ta resultá for dje guia mediante e spiritu di Dios. Despues di a haci e berdad di su mes, un cristian ta sigui su concenshi entrená bíblicamente i ta dependé riba e direccion di Dios mediante spiritu santu. Esaki ta yuda e cristian dedicá determiná kico lo “edificá” i kico lo ta “bentahoso” pa e mes i pa otronan. E ta realisá cu e decisionnan cu e ta tuma lo afectá su relacion personal cu Dios, na ken e ta dedicá.

6. Na reunionnan cristian, con nos por demostrá cu nos a haci e berdad di nos mes?

⁶ Un Testigo ta demostrá cu el a haci e berdad di su mes dor di comentá na reunionnan cristian. Na cuminsamentu, tal bes e ta lesa loke tin declará den e publicacion cu ta ser studiá. Sin embargo, cu tempu, lo e progresá te n’e punto di expresá siñansanan bíblico den su mes palabra. Asina e ta duna evidencia cu e ta desaroyando su abilidad di pensa, no djis ripití loke otronan a bisa. Formulando pensamentunan den su mes palabra i expresando palabranan corecto dje berdad den un manera sincero lo dun’é deleite i mustra cu e ta convencí den su propio mente.​—Eclesiástes 12:10; compará cu Romanonan 14:5b.

7. Ki decisionnan sirbidónan di Jehova a tuma libremente?

⁷ Amor pa Dios i pa nan próhimo ta loke ta motivá Testigonan di Jehova. (Mateo 22:​36-40) Ta cierto cu como un asociacion mundial di rumannan, nan ta estrechamente uní cu otro dor dje vínculo di amor manera di Cristo. (Colosensenan 3:14; 1 Pedro 5:9) Pero como hende cu un boluntad liber, cada un a dicidí personalmente pa declará e bon nobo dje Reino di Dios, pa permanecé políticamente neutral, pa abstené di sanger, pa evitá cierto clase di entretenimentu i pa cumpli cu normanan bíblico. Esakinan no ta decisionnan cu ta ser imponé riba nan. Nan ta decisionnan cu ta cai den e cuadro di un manera di biba cu e potencial Testigonan ta scoge boluntariamente promé cu nan a yega di dal e paso di dedicacion cristian.

Responsabel na un Cuerpo Gobernante?

8. Ki pregunta mester ser clarificá?

⁸ Bijbel ta mustra claramente cu cristiannan berdadero no ta sirbi Dios obligá. E ta bisa: “Jehova ta e Spiritu; caminda e spiritu di Jehova ta, tin libertad.” (2 Corintionan 3:17) Pero con nos por armonisá e echo aki cu e idea di un “esclabo fiel i discreto” cu su Cuerpo Gobernante?​—Mateo 24:​45-47.

9, 10. (a) Con e principio di hefatura ta aplicá den e congregacion cristian? (b) Kico siguimentu dje principio di hefatura a haci necesario den e congregacion cristian di promé siglo?

⁹ Pa contestá e pregunta aki, nos tin cu corda e principio bíblico di hefatura. (1 Corintionan 11:3) Efesionan 5:​21-24 ta identificá Cristo como “cabes dje congregacion,” esun na ken e congregacion “ta sumiso.” Testigonan di Jehova ta comprendé cu e esclabo fiel i discreto ta consistí di Jesus su rumannan spiritual. (Hebreonan 2:​10-13) E clase di esclabo fiel aki a ser nombrá pa percurá p’e pueblo di Dios ‘alimento spiritual n’e debido tempu.’ Den e tempu di fin aki, Cristo a nombra e esclabo aki “riba tur su pertenencianan.” P’esei su posicion ta merecé e respet di ken cu ta afirmá di ta un cristian.

¹⁰ E propósito di hefatura ta pa conserbá unidad i garantisá pa “tur cos tuma lugá decentemente i segun areglo.” (1 Corintionan 14:40) Pa a logra esaki den e promé siglo, un cantidad di cristian ungí for dje clase di esclabo fiel i discreto a ser scogí pa representá henter e grupo. Manera e sucesonan cu a sigui despues a proba, e supervision cu e cuerpo gobernante aki dje promé siglo a ehercé tabatin e aprobacion i bendicion di Jehova. Cristiannan di promé siglo a aceptá e areglo gustosamente. Sí, nan realmente a ricibí i tabata gradicidu p’e resultadonan excelente cu el a producí.​—Echonan 15:​1-32.

11. Con nos tin cu mira e Cuerpo Gobernante dje tempu actual?

¹¹ E balor di un areglo asina ta existí ainda. Actualmente, e Cuerpo Gobernante di Testigonan di Jehova ta consistí di dies cristian ungí, i tur tin décadanan di experencia cristian tras di lomba. Nan ta duna direccion spiritual na Testigonan di Jehova, mescos cu e cuerpo gobernante dje promé siglo a haci. (Echonan 16:4) Mescos cu e cristiannan di promé, gustosamente e Testigonan ta acudí n’e rumannan maduro dje Cuerpo Gobernante pa direccion i guia basá riba Bijbel den asuntunan di adoracion. Aunke miembronan dje Cuerpo Gobernante ta esclabo di Jehova i di Cristo, mescos cu nan compañeronan cristian, Bijbel ta instruí nos: “Sea obediente na esnan cu ta hibando e delantera den boso i keda sumiso, pasobra nan ta vigilando pa boso alma como esnan cu lo rindi cuenta; pa nan haci esei cu goso i no cu suspiro, pasobra esaki lo ta severamente dañoso pa boso.”​—Hebreonan 13:17.

12. Na ken cada cristian individual tin cu rindi cuenta?

¹² E posicion di supervision cu e Scritura ta asigná n’e Cuerpo Gobernante ta nificá cu cada Testigo di Jehova tin cu rindi cuenta di su obranan na dje? No segun e palabranan di Pablo n’e cristiannan na Roma: “Pakico bo ta husga bo ruman? Of pakico abo tambe ta menospreciá bo ruman? Pasobra nos tur lo para dilanti e asiento di huicio di Dios . . . Cada un di nos lo rindi cuenta pa su mes na Dios.”​—Romanonan 14:​10-12.

13. Pakico Testigonan di Jehova ta informá nan actividad di predicá?

¹³ Sin embargo, no ta cierto cu Testigonan individual tin cu entregá un informe di nan actividad di predicá? Sí, pero e propósito di esaki ta ser splicá claramente den un manual di Testigonan, cu ta bisa: “E promé siguidónan di Jesucristo tabata interesá den informe di progreso den e trabou di predicá. (Mar. 6:30) Segun cu e trabou a prosperá, informenan estadístico a ser compilá huntu cu relato di experencia sobresaliente di esnan cu tabatin un parti den predicá e bon nobo. . . . (Echo. 2:​5-11, 41, 47; 6:7; 1:15; 4:4) . . . Ki animador tabata p’e trahadónan cristian fiel ei tende informe di loke tabata ser lográ! . . . Di manera similar, e organisacion di Jehova di dia moderno ta haci esfuerso pa tene registronan exacto dje trabou cu ta ser hací na cumplimentu di Mateo 24:14.”

14, 15. (a) Con 2 Corintionan 1:24 ta aplicá n’e Cuerpo Gobernante? (b) Riba ki base cristiannan individual tin cu tuma decisionnan personal, reconociendo ki echo?

¹⁴ E Cuerpo Gobernante ta un percuracion amoroso i un ehempel di fe digno di imitacion. (Filipensenan 3:17; Hebreonan 13:7) Dor di pega na Cristo i siguié como modelo, nan por resoná e palabranan di Pablo: “No cu nos ta doño riba boso fe, sino nos ta colaboradónan pa boso goso, pasobra ta dor di boso fe boso ta firme.” (2 Corintionan 1:24) Dor di observá tendencianan, e Cuerpo Gobernante ta hala atencion n’e beneficionan di haci caso di conseho bíblico, ta ofrecé sugerencia tocante aplicacion di ley i principionan di Bijbel, ta duna spiertamentu contra peligernan scondí i ta duna “colaboradónan” animacion necesario. Asina e ta ehercé su trabou di mayordomo cristian, ta yuda nan mantené nan goso i ta edificá nan den fe di manera cu nan por para firme.​—1 Corintionan 4:​1, 2; Tito 1:​7-9.

¹⁵ Si un Testigo tuma decisionnan a base di conseho bíblico cu e Cuerpo Gobernante ta ofrecé, e ta haci esei di su propio boluntad pasobra su propio estudio di Bijbel a convenc’é cu esei ta e curso apropiado. E propio Palabra di Dios ta influenciá cada Testigo pa aplicá conseho bíblico sano cu e Cuerpo Gobernante ta ofrecé, reconociendo plenamente cu e decisionnan cu e ta tuma lo afectá su relacion personal cu Dios, na ken e ta dedicá.​—1 Tesalonicensenan 2:13.

Studiante i Soldá

16. Aunke decisionnan relacioná cu conducta ta un asuntu personal, pakico algun ta ser expulsá?

¹⁶ Pero si decisionnan en cuanto conducta ta un asuntu personal, pakico algun Testigo di Jehova ta ser expulsá? Ningun hende ta determiná arbitrariamente cu practicamentu di un cierto picá ta rekerí expulsion. Mas bien, Bijbel ta rekerí e accion aki solamente ora un miembro dje congregacion ta enbolbé su mes sin repentí den picá grave, manera esnan cu ta ser mencioná den capítulo 5 di Promé Corintionan. Pues, aunke un cristian por ser expulsá dor cu el a practicá fornicacion, esaki ta sosodé solamente si e individuo nenga di aceptá e yudansa spiritual di wardadónan amoroso. No ta Testigonan di Jehova so ta sigui e práctica cristian aki. The Encyclopedia of Religion ta skirbi: “Cualkier comunidad ta apelá n’e derecho di protehá su mes contra miembronan cu no ta cumpli cu regla i cu por menasá e bienestar general. Den un cuadro religioso hopi biaha e derecho aki a ser reforsá p’e creencia cu e sancion [di expulsion] ta afectá un hende su posicion dilanti Dios.”

17, 18. Con (a) un sistema di scol i (b) un organisacion militar por ilustrá cu ta corecto pa expulsá hende?

¹⁷ Testigonan di Jehova ta studiantenan di Bijbel. (Hosué 1:8; Salmo 1:2; Echonan 17:11) E programa di educacion bíblico cu e Cuerpo Gobernante ta percurá por ser compará cu un curículo di scol cu un hunta di educacion ta prepará. Aunke e hunta mes no ta e fuente dje material cu ta ser siñá, e ta traha sí e curículo, ta determiná e método di instruccion i ta duna guia necesario. Si un persona ta nenga abiertamente di biba segun e rekisitonan dje scol, ta crea dificultad pa co-studiantenan, of ta causa bergwensa p’e scol, e por ser expulsá. Autoridad di scol tin e derecho di actua p’e beneficio dje studiantenan den nan totalidad.

¹⁸ Ademas di ta studiante, Testigonan di Jehova ta soldá di Jesucristo, instruí pa “lucha e lucha excelente di e fe.” (1 Timoteo 6:12; 2 Timoteo 2:3) Di mes, conducta persistente cu no ta pas pa un soldá cristian por trece desaprobacion divino. Como un individuo dotá cu libertad di scoge, un soldá cristian por tuma e decisionnan di su gustu, pero e tin cu carga e consecuencianan di su decision. Pablo ta razoná: “Ningun hende cu ta sirbi como soldá ta enbolbé su mes den negoshi comercial di bida, p’e por gana e aprobacion di esun cu a reclut’é como soldá. Ademas, si un hende ta competí asta den e weganan, e no ta ser coroná a ménos cu e competí segun regla.” (2 Timoteo 2:​4, 5) Cristiannan maduro, incluyendo esnan dje Cuerpo Gobernante, ta keda completamente na disposicion di nan Lider, Jesucristo, wardando “e reglanan” pa asina nan por gana e premio di bida eterno.​—Juan 17:3; Revelacion 2:10.

19. Despues di a examiná e echonan tocante dedicacion cristian, di kico nos por ta sigur?

¹⁹ Echo no ta mustra claramente cu Testigonan di Jehova ta sirbidó di Dios, i no esclabo di hende? Como cristiannan dedicá cu ta disfrutá dje libertad pa cua Cristo a libra nan, nan ta laga e spiritu di Dios i su Palabra goberná nan bida segun cu nan ta sirbi unidamente cu nan rumannan den e congregacion di Dios. (Salmo 133:1) E evidencianan di esaki tambe mester eliminá cualkier incertidumbre tocante e fuente di nan fortalesa. Huntu cu e salmista, nan por canta: “Jehova ta mi forsa i mi escudo. Den dje mi curason a confia, i mi a ser yudá, di manera cu mi curason ta hubilá, i cu mi cantica lo mi elogi’é.”​—Salmo 28:7.

[Nota]

Con Lo Bo Contestá?

◻ Con Sociedad Watch Tower i agencianan legal similar ta yuda Testigonan di Jehova?

◻ Con cristiannan ta beneficiá dje papel dje Cuerpo Gobernante di Testigonan di Jehova?

◻ Pakico e pueblo di Jehova ta informá nan actividad di predicá?

◻ Bou di ki circunstancianan ta apropiado pa expulsá un cristian dedicá?

[Plachi na página 19]

E cuerpo gobernante dje promé siglo a conserbá unidad di doctrina

[Plachi na página 23]

Rond mundu, Testigonan di Jehova ta disfrutá dje libertad pa cua Cristo a libra nan