Famia—Un Necesidad Humano!

HENDE ta bisa cu sociedad humano ta sinti su mes solamente mes bon cu su famianan ta sinti nan mes. Historia ta mustra cu segun cu e areglo di famia ta deteriorá, e fortalesa di comunidad i nacionnan ta debilitá. Ora decadencia moral a destruí famianan den Grecia di antigwedad, su civilisacion a desintegrá, haciend’e vulnerabel p’e conkista dor dje romanonan. E Imperio Romano a permanecé fuerte tanten cu su famianan a keda fuerte. Pero segun cu siglonan a pasa, bida di famia a debilitá, i e fortalesa dje imperio a desvanecé. “E siguridad i elevacion di famia i di bida di famia ta e propósitonan primario di civilisacion, i e metanan final di tur empeño,” Charles W. Eliot, ex-presidente di Harvard University, a comentá.

Sí, famia ta un necesidad humano. E tin un efecto directo riba e stabilidad di sociedad i e bienestar di yu i futuro generacionnan. Sin duda, tin masha hopi mama soltero cu ta traha hopi duru pa lanta bon yu, i mester encomendá nan pa nan trabou diligente. Sin embargo, estudionan ta mustra cu ta bai muchu mas mihó cu yunan si nan ta biba den un famia cu ámbos mayor.

Un estudio australiano bou di mas cu 2.100 adolesente a saca na cla cu “tienernan cu ta bini di famianan kibrá tabatin mas problema general di salú, tabatin mas chens di manifestá señalnan di problemanan emocional i tabatin mas chens di ta sexualmente activo, cu muchanan cu ta bini di famianan intacto.” Un estudio cu e Instituto Nacional Mericano di Estadísticanan di Salú a conducí, a revelá cu mucha cu ta bini di famianan kibrá tabatin “20-30 porciento mas chens di haña accidente, 40-75 porciento mas chens di keda sinta na scol, i 70 porciento mas chens di ser kitá for di scol.” I un analista di conducta ta informá cu “mucha cu ta bini di un cas cu un solo mayor tin muchu mas chens di haña nan enbolbí den crímen cu esnan cu ta lanta den un hogar tradicional.”

Hogar Ta e Refugio

E areglo di famia ta ofrecé un hogar felis, edificante i placentero pa tur. “E fuente mas importante di felicidad i bienestar no ta un carera, ni cos material, ni hobi, ni amigu, sino e famia,” segun un autoridad sueco.

Bijbel ta mustra cu tur famia riba tera debe nan nomber n’e Magnífico Creador di famia, Jehova Dios, p’e echo cu el a instituí e areglo di famia. (Génesis 1:27, 28; 2:23, 24; Efesionan 3:14, 15) Sin embargo, den e Scritura inspirá, apostel Pablo a profetisá di un atake feros riba famia, cu lo a resultá den un decadencia di moralidad i sociedad humano pafó dje congregacion cristian. El a bisa cu “e último dianan” lo ta marcá pa deslealtad, falta di “cariño natural,” i desobedencia na mayornan, asta entre esnan “cu tin un forma di debocion piadoso.” El a urgi cristiannan pa apartá nan for di hende asina. Jesus a profetisá cu oposicion contra e berdad di Dios lo a dividí famianan.—2 Timoteo 3:1-5; Mateo 10:32-37.

Sin embargo, Dios no a laga nos sin yudansa. Su Palabra ta dedicá hopi espacio na instruccion tocante relacionnan familiar. E ta bisa nos con nos por haci e famia un éxito i e hogar un lugá deleitabel unda cada miembro di famia tin un responsabilidad di cumpli cuné pa cu e otronan.a—Efesionan 5:33; 6:1-4.

Den e dianan aki cu famia ta bou di un menasa serio, ta posibel pa logra un relacion felis asina? Sigur cu sí! Bo por tin éxito den haci bo famia un oásis dushi i refrescante den e mundu secu manera desierto aki. Pero esaki ta rekerí algu for di tur hende den e círculo di famia. Aki ta sigui algun sugerencia.

Yuda Bo Famia Sobrebibí

Un dje mihó maneranan cu un famia por keda uní ta di dedicá tempu huntu. Tur miembro mester kier pasa nan tempu liber huntu. Esei kisas ta nificá sacrificio. Por ehempel, boso, tienernan, kisas tin cu sacrificá un of otro programa di television faborito, evenemento deportivo of salimentu cu amigu. Boso, tatanan, cu generalmente ta esnan cu principalmente ta soru pa e pan di cada dia, no usa boso tempu liber djis pa un hobi of otro interesnan personal. Planea actividadnan cu e famia, tal bes con pa pasa fin di siman of vakansi huntu. Naturalmente, planea algu cu tur hende lo anhelá p’e i disfrutá di dje.

Yunan tin mester di mas cu djis e asina yamá tempu di calidad, esta, periódicamente un mei ora asina programá cu e yunan. Nan tin mester di cantidad. Un columnista den un korant sueco ta skirbi: “Durante mi 15 añanan como reportero, mi a topa un gran cantidad di delincuente hubenil . . . Un característica comun ta cu nan ta parce di a ser exponí na un criansa di solamente tempu di calidad: ‘Mi mayornan no tabatin tempu pa mi.’ ‘Nunca nan tabata scucha.’ ‘Semper mi tata tabata di biahe.’ . . . Como mayor, semper bo por scoge cuantu tempu lo bo duna bo yu. Diescincu aña despues un yu di 15 aña cu no tin compasion lo husga loke bo a scoge p’e.”

Un Punto di Bista Apropiado di Placa

Tur miembro di famia mester desaroyá tambe un punto di bista apropiado di placa. Nan mester ta dispuesto pa pone cen huntu pa cubri e gastunan general dje famia. Hopi hende muher tin cu busca trabou pa yuda cubri gastu, pero boso, esposanan, mester ta conciente dje peliger i tentacionnan cu boso lo por encontrá. E mundu aki ta urgí bo pa “probechá” di bo chensnan i “haci loke bo kier.” E por poné bo bira independiente i insatisfecho cu e papel cu Dios a duná bo como mama i trahadó na cas.—Tito 2:4, 5.

Si boso, mamanan, por ta na cas i ser un guia i amigu pa boso yunan, esei sigur lo contribuí hopi na forma lasonan fuerte cu lo yuda tene boso famia huntu den tempu bon i malu. Un muher por contribuí masha hopi mes na forma un hogar felis, sigur i funcional. “Mester di shen homber pa traha un campamentu, pero un muher so por forma un hogar,” segun un político di siglo 19.

Si tur miembro di famia cooperá pa biba den e presupuesto dje famia, lo e spar e famia di hopi problema. Parehanan mester ta di acuerdo pa hiba un bida simpel i pone interesnan spiritual na promé lugá. Yunan mester siña pa keda satisfecho, i no exigí cosnan cu e presupuesto di famia no por carga. Tene cuidou cu deseo di wowo! E tentacion pa cumpra cosnan cu bo no por permití bo mes, hincando bo mes den debe, a kibra hopi famia. Si tur miembro di famia pone nan fondonan huntu pa un cos cu nan kier haci huntu—un biahe refrescante, un artefacto útil i agradabel pa cas, of un contribucion pa sostené e congregacion cristian, esei lo beneficiá e unidad familiar.

Un otro forma di “contribucion” na un spiritu di famia felis cu tur miembro di famia mester pone cabes huntu p’e ta esun di yuda den trabou di limpiesa i mantencion: soru pa cas, curá, auto, etcétera. Por asigná cada miembro di famia, asta esnan mas hóben, cu un parti dje tarea. Boso, muchanan, purba pa no malgastá boso tempu. Mas bien, desaroyá un spiritu di yuda i di cooperá; esaki lo resultá den berdadero amistad i compañerismo, cu ta edificá unidad di famia.

Balor di Educacion Bíblico

Den un famia cristian uní, e importancia di studio bíblico regular tambe ta ser enfatisá. Consideracion diario di textonan di Bijbel i un studio semanal dje Scritura Santu ta percurá un base pa un famia uní. Mester considerá e berdadnan i principionan básico di Bijbel huntu den un manera cu ta move curason di tur den e famia.

Tal sesionnan cu famia mester ta educacional pero a la bes agradabel i animante. Un famia den nort di Suecia tabatin e custumber di laga e yunan skirbi preguntanan cu a presentá durante siman. Despues nan tabata considerá e preguntanan aki durante e studio semanal di Bijbel. Hopi biaha e preguntanan tabata profundo i a pone hende pensa. Nan a resultá di ta un refleho dje muchanan su abilidad di pensa i aprecio pa siñansanan di Bijbel. Algun pregunta tabata: “Semper Jehova ta pone tur cos crece of el a haci esei djis un biaha so?” “Pakico Bijbel ta bisa cu Dios a crea hende ‘den su imágen’ siendo cu Dios no ta un hende?” “Adam i Eva no a vris durante winter den Paradijs siendo cu nan tabata pia abou i no tabatin ningun paña na nan curpa?” “Pakico nos tin mester di luna anochi ora cu mester ta scur?” E yunan ta grandi awor i ta sirbiendo Dios como minister di tempu completo.

Ora di trata problemanan di famia, boso, mayornan, ta haci bon di purba ser positivo i alegre. Mustra consideracion i sea flexibel, pero tog consistente, ora ta trata di principionan importante cu mester haci caso di dje. Laga e yunan mira cu amor pa Dios i pa su principionan hustu semper ta goberná boso decisionnan. Hopi biaha e ambiente di scol ta yen di tension i ta haci e muchanan deprimí. Nan tin mester di hopi animacion na cas pa compensá un influencia asina.

Mayornan, no pretendé di ta perfecto. Admití boso eror i pidi despensa na boso yunan ora ta necesario. Hóbennan, ora Mami of Papi admití un fayo, laga bo amor pa nan crece.—Eclesiástes 7:16.

Sí, un famia uní ta percurá un hogar di pas, siguridad i felicidad. E poëta aleman Goethe a yega di bisa: “Esun mas felis, sea rey of campesino, ta esun cu ta haña felicidad na cas.” Pa mayornan i yunan apreciativo, no tin ningun lugá manera nan cas.

Ta cierto cu e presionnan dje mundu den cua nos ta biba ta pone famianan bou di un menasa serio awe. Pero siendo cu ta Dios a instituí famia, lo e sobrebibí. Bo famia lo sobrebibí, i abo tambe si bo sigui Dios su guia recto pa un bida di famia felis.

[Nota]