Bo Ta Mustra Cu Bo Ta Gradicidu?

Na un cas di misionero na west africa, un tempu tabata biba un cacho cu nan a yama teddy. Ora un hende a tira pida carni pa teddy, e tabata gulie mesora sin saboria ni kou. Lenga afo e tabata drumi den e solo tropical, i warda e siguiente pida carni cu nan lo a tira p’e. Ora no tin mas carni, e ta bira i coge su caminda bai.

Teddy nunca no a mustra e minimo señal di gratitud. Niun hende no a verwagt esei di dje. Al fin i al cabo, e tabata solamente un cacho.

HOPI bes nos ta verwagt mas gratitud for di nos próhimo cu for di bestia. Generalmente, nos ta keda desapuntá. Hopi hende ta gara loke nan por for di bida, i ainda busca mas. Esaki tampoco no ta un sorpresa. Bijbel a predicí cu den e último dianan, hende lo ta malagradecidu.—2 Timoteo 3:1, 2.

Sin embargo, sirbidónan di Dios, ta reflehá un spiritu diferente. Nan ta tuma na pechu e conseho di apostel Pablo, kende a amonestá compañeronan creyente: “Mustra cu boso ta gradicidu.”—Colosensenan 3:15.

Jehova Ta Mustra cu E Ta Gradicidu

Jehova Dios ta pone un ehempel perfecto den mustra aprecio. Considerá con e ta mira su fiel sirbidónan. Bou di inspiracion Pablo a skirbi e cristiannan hebreo: “Dios no ta inhustu p’e lubidá boso trabou i e amor cu boso a mustra pa su nomber, p’e echo cu boso a sirbi e santunan i ta sigui sirbi.”—Hebreonan 6:10.

Tin un abundancia di ehempel den cua Jehova a mustra aprecio pa su fiel sirbidónan. El a bendicioná Abraham dor di multiplicá su desendencia literalmente, i p’esei nan a bira “manera e streanan di shelu i manera e pipitanan di santu cu ta na oriya di laman.” (Génesis 22:17) Como aprecio p’e echo cu Job a keda fiel bou di prueba, Jehova no solamente a restorá Job su rikesa abundante, pero el a dun’é tambe na “cantidad dòbel.” (Job 42:10) Jehova su trato cu humanidad atrabes di milenionan a proba e berdad dje declaracion: “En cuanto Jehova, su wowonan ta pasando rond e tera p’e mustra su forsa na fabor di esnan kende nan curason ta completo pa cuné.”—2 Crónicanan 16:9.

Su aprecio pa esnan cu ta purba haci su boluntad, i su disposicion pa recompensá nan ta característicanan principal dje personalidad di Dios. Reconocimentu di esaki ta vital pa fe cristian. Pablo a skirbi: “Sin fe ta imposibel pa agrad’é bon, pasobra esun cu ta acudí na Dios mester kere . . . cu e ta bira e recompensador di esnan cu ta busk’é cu empeño.”—Hebreonan 11:6.

Si en bes di esei, Jehova a manifestá un spiritu severo i crítico, nos tur lo tabata condená. Hopi tempu pasá e salmista a señalá e punto aki: “Si ta eror ta loke bo ta vigilá, o Jah, o Jehova, ken lo por keda pará?” (Salmo 130:3) Jehova no ta un persona cu falta aprecio ni e no ta crítico. E ta apreciá esnan cu ta sirbié. E ta mustra cu e ta gradicidu.

Jesus—Un Persona Mashá Gradicidu

Reflehando e cualidadnan di su Tata celestial perfectamente, Jesucristo a mustra cu e ta gradicidu pa loke otronan a haci debí na nan fe. Considerá loke a sosodé un biaha den tempel na Jerusalem: “Awor ora [Jesus] a hisa cara wak el a mira e ricunan tira nan regalonan den cahanan di placa. Anto el a mira un cierto biuda den necesidad tira dos moneda chikitu di masha poco balor eiden, i el a bisa: ‘Di berdad mi ta bisa boso: E biuda aki, aunke pober, a tira mas cu nan tur. Pasobra tur esakinan a tira regalo for di loke nan tabatin di sobra, pero e muher aki for di su necesidad a tira tur e medio di biba cu e tabatin.’”—Lucas 21:1-4.

For di un punto di bista monetario, e contribucion tabata chikitu, specialmente ora a compar’é cu esnan dje hendenan ricu. Mayoria dje hendenan presente lo no a ni sikiera paga tinu riba e biuda. Tog, Jesus sí a ripar’é i el a dicerní su circunstancianan. Jesus a mir’é i a apreci’é.

Un otro incidente a enbolbé Maria, un muher ricu. Ora Jesus tabata na mesa pa come, Maria a basha un zeta perfumá masha costoso riba Jesus su cabes i su pianan. Algun hende a criticá e accion aki, razonando cu por a bende e zeta i usa e cen pa yuda hende pober. Con Jesus a reaccioná? El a bisa: “Lagu’é ketu. Pakico boso ta purba di causa dificultad p’é? El a haci un obra excelente pa mi. Di berdad mi ta bisa boso: Unda cu e bon nobo ser predicá den tur e mundu, loke e muher aki a haci tambe lo ser contá como recuerdo di dje.”—Marco 14:3-6, 9; Juan 12:3.

Jesus no a keha, lamentando cu no a usa e zeta costoso pa algu otro. El a apreciá e expresion generoso dje amor i fe di Maria. E incidente ta registrá den Bijbel como recuerdo di su obra excelente. E relatonan aki i otronan ta mustra cu Jesus tabata un homber mashá gradicidu.

Si bo ta un sirbidó di Dios, bo por ta sigur cu tantu Jehova Dios como Jesucristo tin aprecio profundo pa bo esfuersonan pa promové adoracion puru. Ora nos sa esei, e ta hala nos mas cerca nan i e ta motivá nos pa imitá nan dor di mustra cu nos ta gradicidu.

E Spiritu Kehoso di Satanas

Awor, laga nos considerá ehempel di un persona cu no ta mustra cu e ta gradicidu, esta, Satanas e Diabel. Satanas su falta di aprecio a pone cu el a encabesá un rebelion desastroso contra Dios.

Despues cu el a nutri un spiritu kehoso di malcontentu den su mes, Satanas a cuminsá sembra esaki den otro persona. Considerá loke a sosodé den hofi di Eden. Jehova a crea e promé homber i muher, el a pone nan den un hofi paradísico, i el a bisa nan: “Bo por come di tur palu dje hofi te na satisfaccion.” Tabatin solamente un restriccion. Dios a bisa: “En cuanto e palu di conocimentu di bon i malu, bo no mag come di dje, pasobra den e dia cu bo come di dje lo bo muri positivamente.”—Génesis 2:16, 17.

Sin embargo, no a pasa muchu tempu cu Satanas a desafiá e credibilidad di Jehova. Den cierto sentido Satanas kier a haci Eva asina malagradecidu pa cu Jehova, cu Eva lo a ser moví pa rebelá contra dje, mescos cu Satanas mes a haci. “Di berdad ta asina cu Dios a bisa cu boso no mag come di tur palu dje hofi?” Satanas a puntra. (Génesis 3:1) Claramente, el a insinuá cu Dios tabata tene algu balioso atras for di Eva, algu cu lo a habri su wowonan i hacié mescos cu Dios mes. En bes di mustra cu e ta gradicidu p’e abundancia di bendicionnan cu el a ricibí for di Jehova, Eva a cuminsá anhelá loke tabata prohibí.—Génesis 3:5, 6.

E consecuencianan desastroso ta bon conocí. Aunke el a haña e nomber Eva “pasobra e mester a bira mama di tur cu ta biba,” di otro banda el a bira mama di tur cu ta muri. Henter humanidad a heredá picá cu ta producí morto for di Adam.—Génesis 3:20; Romanonan 5:12.

Imitá Dios i Cristo

Ripará e contraste entre Satanas i Jesus. Bijbel ta describí Satanas como “e acusadó di nos rumannan . . . , cu ta acusá nan di dia i anochi dilanti nos Dios.” (Revelacion 12:10) Jesus “por salba completamente esnan cu ta acercá Dios mediante dje, pasobra e semper ta bibu pa boga pa nan.”—Hebreonan 7:25.

Satanas ta acusá e sirbidónan di Dios. Jesus ta apreciá nan i e ta boga pa nan. Como imitadónan di Cristo, cristiannan mester haci esfuerso pa busca loke ta bon den otro, apreciá i duna otro balor. Haciendo asina, nan ta mustra cu nan ta gradicidu n’e persona cu a pone e ehempel supremo den mustra aprecio, Jehova Dios.—1 Corintionan 11:1.

[Plachi na página 17]

Jesus a mustra aprecio pa Maria su obra excelente