Pregunta di Lector

Algun Testigo di Jehova a yega di haña oferta pa trabou cu ta relacioná cu edificio of propiedadnan religioso. Kico ta e punto di bista bíblico tocante trabounan asina?

Cristiannan cu sinceramente kier cumpli cu 1 Timoteo 5:8 cu ta enfatisá e importancia di percurá materialmente pa miembronan di bo famia di cas, por haña nan confrontá cu e cuestion aki. Aunke cristiannan sigur-sigur mester cumpli cu e conseho ei, esei no ta duna nan motibu pa aceptá tur sorto di trabou seglar sin importá loke e ta enbolbé. Cristiannan ta reconocé cu nan mester tene cuenta cu otro aspectonan dje boluntad di Dios. Por ehempel, e deseo di un homber pa percurá pa su famia lo no hustificá e echo cu e ta violá loke Bijbel ta bisa tocante inmoralidad of asesinato. (Compará cu Génesis 39:4-9; Isaías 2:4; Juan 17:14, 16.) Ta vital tambe pa cristiannan actua na armonia cu e mandato pa sali for di Babilonia e Grandi, e imperio mundial di religion falsu.—Revelacion 18:4, 5.

Rond mundu, sirbidónan di Dios ta haña nan cu hopi situacion relacioná cu trabou. Lo no tin sentido ni e no ta toca na nos pa purba traha un lista dje posibilidadnan ni pa traha reglanan categórico. (2 Corintionan 1:24) Pero tog, laga nos mencioná cierto factornan cu cristiannan mester tene cuenta cuné ora di tuma decision personal relacioná cu trabou. La Atalaya di 15 di november 1982 (na ingles 15 di juli 1982) a presentá e factornan aki brevemente den un artículo tocante con pa saca beneficio for dje concenshi cu Dios a duna nos. Un cuadro a lansa dos pregunta clave i despues el a describí algun factor cu ta di gran yudansa.

E promé pregunta clave ta esaki: Bijbel ta condená trabou seglar riba su mes? Comentando riba esaki, La Atalaya a mustra cu Bijbel ta condená hortamentu, mal uso di sanger i idolatria. Un cristian mester evitá trabou seglar cu directamente ta promové actividadnan cu Dios ta desaprobá, manera esnan mencioná ei.

E segundo pregunta ta: Haciendo e trabou aki lo haci bo cómplice di un práctica cu Bijbel ta condená? Ta bisto anto, cu un persona cu ta traha den un localidad di wega di placa, den clínica di aborto of den un cas di prostitucion ta cómplice di un práctica no-bíblico. Asta si su trabou diario einan ta djis bari of contestá telefon, e ta contribuyendo cu un práctica cu e Palabra di Dios ta condená.

Hopi cristian cu mester a tuma decision relacioná cu trabou a ripará cu considerando e dos preguntanan ei so a yuda nan tuma un decision personal.

Por ehempel, for dje dos preguntanan ei un hende por comprendé di con un berdadero adoradó lo no bai traha directamente pa un organisacion di religion falsu dor di traha pa misa of den dje. Revelacion 18:4 ta duna e mandato: “Sali for di dje, mi pueblo, si boso no kier participá cuné den su picánan.” Un persona lo ta participando den obra i picánan di Babilonia e Grandi si e ta un trahadó vast di un religion cu ta siña adoracion falsu. Sea cu e trahadó ta un hardinero, un conciërge, un persona cu ta haci reparacion of un tenedó di buki, su trabou ta sirbi pa promové adoracion cu ta na conflicto cu religion berdadero. Ademas, ta razonabel cu hende cu lo mira e trahadó aki ta traha pa haci e misa bunita, pa manten’é den bon condicion of p’e misa cumpli cu su metanan religioso, lo asoci’é cu e religion ei.

Pero, kico di un persona cu no ta un trahadó vast di un misa of un organisacion religioso? Kisas nan a yam’é djis pa haci un reparacion di emergencia na un pipa kibrá den bodega dje misa. Esei lo no ta diferente for dje echo cu e mes ta haci un oferta pa haña un trabou pa insulá dak di misa of pone panchi riba dje?

Atrobe, bo por imaginá un gran cantidad di situacion. P’esei, laga nos repasá cincu factor mas cu La Atalaya a presentá:

1. E trabou ta djis un servicio humanitario cu riba su mes no ta bíblicamente inaceptabel? Tuma por ehempel un partidó di carta. E echo cu e ta parti carta, apénas por nificá cu e ta promoviendo un práctica cu Bijbel ta condená si un dje edificionan den e área cu e ta duna servicio na dje ta un misa of un clínica di aborto. Dios ta percurá lus di solo cu ta briya dor di bentana di tur edificio, incluso un misa of clínica. (Echonan 14:16, 17) Kisas un cristian cu ta partidó di carta lo por concluí cu e ta duna servicio humanitario na tur hende, tur dia. Lo e por ta mescos cu un cristian cu ta reaccioná na un emergencia—un ‘pipefitter’ cu nan a yama pa drecha un pipa kibrá den un misa of un paramédico cu a ser yamá pa asistí un persona cu a bira malu durante sacrificio di misa. Lo e por considerá esaki djis un acto incidental di duna asistencia humanitario.

2. Te na ki grado e persona tin autoridad riba loke ta ser hací? Un cristian cu ta doño di un tienda nunca lo no ta di acuerdo pa bestel i bende ídolo, amuletonan cu tin di haber cu spiritismo, sigaria of bloedworst. Como doño, ta e tin di bisa. Kisas hende ta urgié pa bende sigaria of ídolo p’e saca ganashi, pero lo e actua segun su creencianan bíblico. Di otro banda, kisas un trahadó cristian den un supermercado tin cu traha na caha, limpia flur of tene buki. E no tin control riba e productonan cu e negoshi ta bestel i bende, asta si algun di esakinan ta inaceptabel, manera sigaria of artículonan pa dianan di fiesta religioso.a (Compará cu Lucas 7:8; 17:7, 8.) Esaki ta relacioná cu e siguiente punto.

3. Te na ki grado e persona ta enbolbí? Laga nos bolbe n’e ehempel di un tienda. Probablemente, un trahadó cu ta traha na caha of cu ta yena reki, ta trata solamente de bes en cuando cu sigaria of artículonan religioso; esei ta un parti chikitu di su trabou general. Pero, ki un contraste ta un trahadó cu ta traha den e mésun tienda n’e bali di tabaco! Henter su trabou, dia den dia afó, ta enfocá riba algu contrario cu creencianan cristian. (2 Corintionan 7:1) Esaki ta ilustrá pakico mester evaluá e grado di enbolbimentu of contacto ora di tuma decision relacioná cu trabou.

4. Di ki fuente e salario ta bini of na unda e sitio di trabou ta? Considerá dos situacion. Pa drecha su imágen público, un clínica di aborto ta dicidí di paga un hende pa limpia e cayanan den becindario. E clínica di aborto ta paga su salario, pero e no ta traha einan i ningun hende no ta mir’é henter dia den e clínica. En bes di esei, sin importá ken ta pagu’é, nan ta mir’é ta haci un trabou público cu riba su mes no ta na conflicto cu e Scritura. Ata aki un contraste. Den un pais caminda prostitucion ta legal, servicio público di salú ta paga un verpleegster p’e traha den cas di prostitucion p’e haci chekeonan di salú cu intencion di reducí plamamentu di malesanan transmití sexualmente. Aunke e servicio di salú público ta pagu’é, su trabou completo ta n’e cas di prostitucion, haciendo inmoralidad mas sigur, mas aceptabel. E ehempelnan aki ta ilustrá cu e fuente di bo salario i e sitio di trabou ta aspectonan pa tene cuenta cuné.

5. Ki efecto hacimentu dje trabou tin; lo e molestiá bo mes concenshi of trompecá otronan? Nos mester tene cuenta cu nos mes concenshi i tambe cu esun di otronan. Asta si un cierto trabou (incluso sitio i fuente di salario) ta parce aceptabel pa mayoria cristian, un individuo por sinti cu e trabou lo molestiá su mes concenshi. Apostel Pablo, kende a pone un excelente ehempel, a bisa: “Nos ta confia cu nos tin un concenshi onrado, ya cu nos ta deseá na comportá nos mes onradamente den tur cos.” (Hebreonan 13:18) Nos mester evitá di haci trabou cu lo laga nos cu un concenshi molestiá; pero, tampoco nos no mester criticá otronan cu tin un concenshi diferente. I di otro banda, kisas un cristian no ta mira ningun conflicto entre Bijbel i e echo cu e ta haci un cierto trabou, pero e ta realisá cu lo e molestiá concenshi di mayoria hende den e congregacion i den e comunidad. Pablo a reflehá e actitud corecto den su palabranan: “Di ningun manera nos ta duna un motibu pa tropieso, pa hende no haña falta den nos ministerio; pero di tur manera nos ta recomendá nos mes como ministernan di Dios.”—2 Corintionan 6:3, 4.

Awor, laga nos bai bek n’e pregunta principal tocante trahamentu den misa, manera pone bentana nobo, laba tapijt of haci mantencion di fornu. Con lo bo por aplicá e factornan mencioná ariba?

Corda riba e aspecto di autoridad. E cristian ta e doño of manager cu por dicidí si ta aceptá un trabou asina na un misa of no? Un cristian cu tin autoridad lo tin gana di participá den Babilonia e Grandi dor di haci un oferta pa un trabou of contract pa yuda un cierto religion promové adoracion falsu? Esaki lo no ta mescos cu dicidí di bende sigaria of ídolo den bo mes tienda?—2 Corintionan 6:14-16.

Si un cristian ta un trahadó cu no por dicidí cua trabou ta ser aceptá, e tin cu tene cuenta cu otro factornan manera, e sitio di trabou i e grado di enbolbementu. E ta un trahadó cu nan a pidi pa djis hiba of pone stul nobo pa un ocasion of p’e duna servicio humanitario, manera un bombero cu ta paga candela den un misa promé cu e plama? Hopi hende lo considerá esaki algu diferente for di un trahadó di un empresa cu ta dedicá hopi tempu na verfmentu dje misa of cu regularmente ta traha den e hardin pa hacié atractivo. Un contacto regular i extenso asina lo aumentá e chensnan cu hopi hende lo asociá e cristian ei cu e religion cu e ta pretendé di no apoyá, i posiblemente e ta trompecá nan.—Mateo 13:41; 18:6, 7.

Nos a plantia un cantidad di consideracion importante relacioná cu trabou. Nan a ser presentá den contexto di un pregunta specífico relacioná cu religion falsu. Pero, nan por ser considerá mescos tambe en coneccion cu otro tipo di trabou. Den tur caso, nos mester considerá e asuntu cu oracion, tumando na cuenta e aspectonan specífico, i probablemente único, dje situacion en cuestion. E factornan presentá ariba, ya caba a yuda hopi cristian sincero tuma decisionnan di acuerdo cu nan concenshi i cu ta reflehá nan deseo pa cana stret i recto dilanti Jehova.—Proverbionan 3:5, 6; Isaías 2:3; Hebreonan 12:12-14.

[Nota]