Dios Ta Actua den Maneranan Malbado?

“DEUS ESCREVE CERTO POR LINHAS TORTAS” (“DIOS TA SKIRBI règt riba liña schuin”). Esei ta un dicho na Brazil. E ta duna di comprendé cu semper Dios ta haci loke ta bon, aunke tin bes e manera cu e ta hacié, ta parce malu segun hende. Por ehempel, ora un persona muri den flor di su bida, hopi hende ta bisa cu ‘Dios a tum’é den shelu.’ Si un persona tin un desabilidad físico of e hañ’é den un tragedia, algun ta remarcá: ‘Ta boluntad di Dios.’ Siendo cu asina hende ta culpa Dios pa morto, problemanan físico i otro causanan di tristesa, e expresionnan ei ta implicá cu Dios ‘ta skirbi schuin,’ esta, cu e ta actua den un manera cu hende no por comprendé.

Di con hopi hende religioso ta kere cu Dios ta responsabel pa morto i otro dificultadnan? Hopi bes e creencianan aki ta basá riba un malcomprendimentu di algun texto bíblico sacá for di nan contexto. Laga nos tira bista un ratu riba algun di nan.

● “Ken ta asigná e muda of esun surdu of esun cu bon bista of esun ciegu? No ta ami, Jehova?”—Exodo 4:11.

Acaso esaki ta nificá cu Dios ta esun culpabel p’e diferente desabilidadnan cu hende ta sufri di dje? No. Esaki lo no ta na armonia cu e personalidad di Dios. Bijbel ta bisa nos: “Tur creacion di Dios ta excelente.” (1 Timoteo 4:4) E no ta culpabel p’e echo cu un persona ta nace ciegu, muda of surdu. E kier solamente loke ta bon pa su creacion, pasobra e ta Fuente di “tur bon don i tur regalo perfecto.”—Santiago 1:17.

Tabata nos promé mayornan, Adam cu Eva, kendenan a scoge di nan mes pa rebelá contra Dios i a perde nan perfeccion, i huntu cu esei, nan abilidad di producí yunan perfecto. (Génesis 3:1-6, 16, 19; Job 14:4) Segun cu nan desendientenan a sigui casa i haña yu, mas i mas imperfeccion, incluso defectonan físico, a cuminsá manifestá nan mes den hende. Aunke Jehova no a causa esaki, el a permitié sosodé. P’esei, papiando di su mes e por a bisa cu e ta “asigná” e muda, e surdu i e ciegu.

● “Loke ta trocí no por ser hací règt.”—Eclesiástes 1:15.

Ta Dios ta esun cu a troce cos? Ta obvio cu no. Eclesiástes 7:29 ta remarcá: “Dios a traha humanidad recto, pero nan mes a inventá hopi plan.” Contemporary English Version a parafraseá e versículo aki: “Nos tabata completamente onesto ora Dios a traha nos, pero awor nos tin mente trocí.” En bes di pega na e normanan hustu di Dios, mayor parti di homber i muher a scoge deliberadamente pa sigui nan mes plan, programa of camindanan—pa nan mes daño.—1 Timoteo 2:14.

Ademas, manera Pablo a bisa, pa motibu di picá di hende “e creacion a ser sometí na banidad.” (Romanonan 8:20) I e situacion aki “no por ser hací règt” mediante esfuersonan humano. Ta mediante intervencion divino so tur loke ta trocí i banidad den asuntunan dje tera lo ser kitá.

● “Mira e obra dje Dios berdadero, pasobra ken por haci règt loke el a troce?”—Eclesiástes 7:13.

Cu otro palabra, rey Sálomon ta puntra: ‘Ken entre humanidad por drecha e defecto i imperfeccionnan cu Dios ta permití?’ Niun hende, pasobra tin un motibu pakico Jehova Dios ta permití e cosnan aki sosodé.

P’esei, Sálomon ta recomendá: “Riba un dia bon, mustra cu bo ta den bon, i riba un dia calamitoso, mira cu e Dios berdadero a traha esun aki exactamente manera esei, cu e intencion pa humanidad no descubrí nada despues di dje.” (Eclesiástes 7:14) Hende mester apreciá e dia cu cos ta bai bon i e mester demostrá su aprecio dor di mustra bondad. E mester mira un dia bon como un regalo di Dios. Pero kico si e dia trece calamidad? Un persona ta haci bon di “mira,” esta, reconocé cu Dios a permití e calamidad tuma lugá. Di con el a permití esei? Sálomon ta bisa: “Cu e intencion pa humanidad no descubrí nada despues di dje.” Kico esaki ta nificá?

E echo cu Dios ta permití nos experenciá tantu goso como problema, ta recordá nos cu nos no sa kico futuro lo trece. Tantu e hustu como e malbado por hañ’é den calamidad. No tin excepcion. Esaki mester pone nos realisá e importancia di dependé, no riba nos mes, sino riba Dios, cordando cu “Dios ta amor.” (1 Juan 4:8) Aunke kisas nos no ta comprendé cierto cosnan awor, nos por ta sigur cu ora tur cos core nan curso completo, loke Dios a permití lo a sirbi un propósito beneficioso pa tur esnan concerní.

Sea loke sea e permití, nunca esaki lo no resultá den daño permanente pa esnan di curason onrado. Apostel Pedro a haci esaki cla ora el a comentá riba e sufrimentu cu compañeronan creyente den su tempu tabata pasa aden: “Despues cu boso a sufri un poco tempu, e Dios di tur bondad inmerecí, kende a yama boso pa su gloria eterno den union cu Cristo, mes lo terminá boso entrenamentu, lo e haci boso firme, lo e haci boso fuerte.”—1 Pedro 5:10.

Tempu pa Rectificá Cosnan

Jehova ta duna nos forsa pa wanta nos pruebanan actual. El a primintí tambe di haci “tur cos nobo.” (Revelacion 21:5) Sí, su propósito ta pa pronto su Reino celestial restorá salú di esnan cu tin un desabilidad, i supervisá e resureccion dje mortonan. Tambe e gobiernu ei lo eliminá esun kende su camindanan sí ta trocí—Satanas e Diabel. (Juan 5:28, 29; Romanonan 16:20; 1 Corintionan 15:26; 2 Pedro 3:13) Ora Dios su tempu pa rectificá cosnan yega, esta un bendicion esei lo ta pa hende temeroso di Dios riba henter e tera!

[Rekonosementu pa Potrèt na página 28]

Job Ta Tende di Su Ruina/The Doré Bible Illustrations/Dover Publications