Informe di Proclamadónan di Reino

Ta Limpia e Nomber di Dios di Reproche

E PALABRA di Dios, Bijbel, ta bisa: “Mantené boso conducta excelente entre e nacionnan, pa den loke nan ta papia contra boso como malechor, nan, como testigo ocular di boso obranan excelente, por glorificá Dios den e dia di su inspeccion.” (1 Pedro 2:12) P’esei cristiannan berdadero ta haci esfuerso pa mantené un conducta excelente pa asina evitá di trece reproche riba e nomber di Jehova.

Den un área remoto di Zambia cu yama Senanga, un hende a horta un radio for di cas di un maestro di scol. Ya cu Testigonan di Jehova tabata predicá den e área ei, e maestro a acusá nan dje ladronicia. El a denunciá e asuntu na polis, pretendiendo cu ta e Testigonan a horta su radio. Como prueba cu e Testigonan tabata na su cas, el a presentá un tratado cu el a haña bentá abou den su cas. Sin embargo, e polisnan no kier a kere. Nan a conseh’é pa bai bek i haci un investigacion mas profundo.

E cuerpo di anciano a animá e Testigonan cu a traha e dia ei den e bario di e cas dje maestro, pa bai combersá cu e maestro tocante e asuntu. Algun dje ruman hombernan a bai i a papia cuné, splicando cu nan kier limpia Jehova su nomber di reproche. Durante nan combersacion, nan a bis’é cu nan a topa un hóben den su cas i a dun’é un tratado. Na e descripcion cu nan a duna, e maestro a reconocé e homber. De echo, nan tabata bai e mésun iglesia. E maestro a bai papia cu e yoncuman, pero el a nenga e acusacionnan. E ora ei, e maestro a papia tocante e asuntu cu e mayornan di e mucha homber i a bai cas bek. Denter di un ora, mama dje mucha homber a trece e radio hortá bek.

Impulsá pa remordimentu, e maestro a acercá e cuerpo di anciano i a pidi pordon pa e acusacionnan falsu cu el haci. E ancianonan a aceptá su disculpa pero a pidié pa haci conocí loke e investigacion a saca na cla pa asina tur hende por sa cu e Testigonan tabata inocente. Na scol nan a haci un anuncio, i asina a limpia Jehova su nomber di reproche. Testigonan di Jehova por sigui predicá libremente den e pueblo.

[Mapanan/Plachi na página 19]

(Pa e teksto den su formato kompleto, wak e publikashon)

ÁFRICA

Zambia

[Rekonosementu]

Mountain High Maps® Copyright © 1997 Digital Wisdom, Inc.