Pregunta di Lector

En bista dje echo cu Jehova ta dispuesto pa pordoná picá a base di e balor dje sacrificio di rescate, di con ta necesario pa cristiannan confesá cerca ancianonan den congregacion?

Manera por ser mirá den e caso di David cu Bat-seba, Jehova a pordoná e picá di David aunke e tabata grave, pasobra David a repentí di berdad. Ora profeta Natan a acerk’é, David a confesá francamente: “Mi a peca contra Jehova.”—2 Samuel 12:13.

Sin embargo, Jehova no solamente ta aceptá e confesion sincero di un pecadó i dun’é pordon, pero tambe e ta haci percuracion amoroso pa yuda esun cu a cometé eror progresá i recuperá spiritualmente. Den e caso di David, e yudansa a bini via profeta Natan. Awe, den e congregacion cristian, tin hombernan spiritualmente maduro, esta, e ancianonan. Disipel Santiago ta splica: “Tin un hende [spiritualmente] enfermo entre boso? Lagu’é yama e ancianonan dje congregacion cerca dje i laga nan haci oracion riba dje, i hunt’é cu zeta den e nomber di Jehova. I e oracion di fe lo cura esun enfermo, i Jehova lo lant’é. Tambe, si el a cometé picá, lo e ser pordoná.”—Santiago 5:14, 15.

Ancianonan cu experencia por haci hopi pa aliviá e dolor di curason cu un pecadó cu remordimentu ta sinti. Nan ta haci esfuerso pa imitá Jehova ora nan ta trata cu e persona aki. Nunca e ancianonan lo kier actua brutu, ni maske disiplina fuerte por ta apropiado. Mas bien, cu compasion nan ta considerá e necesidadnan inmediato dje persona. Cu pacenshi nan ta usa e Palabra di Dios den nan esfuerso pa reahustá e manera di pensa di esun cu a cometé eror. (Galationan 6:1) Asta si un persona no confesá su picá boluntariamente, podisé lo e ser motivá tog na repentimentu ora cu ancianonan acerk’é, mescos cu David ora Natan a acerk’é. Pues e apoyo cu ancianonan ta duna, ta yuda esun cu a cometé eror evitá e peliger di ripití e picá i e consecuencianan serio di bira un pecadó sin escrúpulo.—Hebreonan 10:26-31.

Siguramente no ta fácil pa confesá na otro hende actonan cu bo mes tin bergwensa di dje, i pa busca pordon. Bo mester di fortalesa interno. Pero, pensa un ratu riba e alternativa. Un homber cu a keda sin revelá su picá serio na anciano den congregacion a bisa: “Na mi curason mi tabata sinti un dolor cu no kier a kita. Mi a bai haci mas esfuerso den e trabou di predicá, pero e sintimentu di remordimentu a keda.” El a kere cu confesá na Dios den oracion tabata suficiente, pero ta claro cu esei no tabata e caso ya cu el a haña e mésun sintimentunan cu rey David. (Salmo 51:8, 11) Ta cuantu mas mihó anto pa aceptá e yudansa amoroso cu Jehova ta percurá mediante e ancianonan!