Gradisí Yehova pa Su Generosidat

YEHOVA ta un Dios generoso. (Sant. 1:17) Nos por mira esei tur kaminda; for di e shelunan inmenso yen di strea te na e tapeit bèrdè di vegetashon ku ta kubri e superfisie di tera.—Sal. 65:12, 13; 147:7, 8; 148:3, 4.

E apresio ku e salmista tabata sinti pa su Kreador tabata asina grandi ku el a sintié impulsá pa komponé un kantika di elogio pa e obranan di Yehova. Lesa Salmo 104 i wak si bo no ta sinti meskos. E salmista a bisa: “Lo mi kanta na SEÑOR tanten ku mi ta biba; lo mi kanta alabansa na mi Dios miéntras ku mi tin bida.” (Sal. 104:33) Bo tambe ta deseá di hasi esei?

NO TIN UN SER MAS GENEROSO KU YEHOVA

Yehova ke pa nos tur imitá su ehèmpel di generosidat. Anto e ta duna nos bon motibu pa ta generoso tambe. Wak kiko el a inspirá apòstel Pablo pa skirbi: “Instruí e rumannan ku ta riku den e mundu akí pa nan no ta arogante, i pa nan pone nan speransa, no den rikesa insigur, sino den Dios, kende ta duna nos tur e kosnan ku nos ta disfrutá di dje. Bisa nan pa nan hasi bon, pa nan ta riku den bon obra, pa nan ta generoso, kla pa kompartí ku otro, i asina akumulá komo tesoro pa nan mes un bon fundeshi pa futuro, a fin ku nan por haña un gara firme riba loke realmente ta bida.” —1 Tim. 6:17-19.

Ora Pablo a skirbi su di dos karta inspirá pa e kongregashon di Korinto, el a pone énfasis riba e aktitut korekto ku nan mester tabatin enkuanto dunamentu. El a bisa: “Laga kada hende hasi manera el a disidí den su kurason, no di mala gana, ni fòrsá, pasobra Dios ta stima hende ku ta duna ku alegria.” (2 Kor. 9:7) Despues, Pablo a bisa ku un donashon ta benefisiá esun ku ta risibié pasobra e ta sasia su nesesidat, pero e ta benefisiá tambe esun ku ta duna ya ku Dios ta drama su bendishon riba dje.—2 Kor. 9:11-14.

Pablo a konkluí e sekshon akí di su karta ora el a referí na e prueba di mas grandi di Yehova su generosidat. El a bisa: “Nos ta gradisí Dios pa su regalo ku nos no por deskribí ku palabra.” (2 Kor. 9:15) E regalo akí ta tur e kosnan bon ku Yehova ta duna su pueblo mediante Hesukristu. Nan ta asina maravioso ku no tin palabra pa deskribí nan balor.

Kon nos por gradisí Yehova i su Yu pa tur e kosnan ku nan a i lo hasi pa nos? Un manera pa hasi esaki ta ora nos ta duna di nos tempu, energia i rekursonan pa apoyá e organisashon di Yehova; sea ku nos por duna hopi òf tiki.—1 Kró. 22:14; 29:3-5; Luk. 21:1-4.