Un Genio Suave Ta Demostrá Sabiduria

Toñi, un trahadó di den kuido, a primi bèl i un señora di mas o ménos 50 aña a habri porta. E señora a kuminsá insultá i zundra Toñi debí ku e no a yega mas trempan pa kuida su mama di edat avansá. Aunke Toñi no a yega trabou lat, na un manera kalmu el a pidi diskulpa pa e mal komprondementu.

E SIGUIENTE biaha, e señora a bolbe zundra Toñi. Pero kon Toñi a reakshoná? El a atmití: “Esei tabata un situashon hopi difísil. No tabatin motibu pa e insultá mi.” Pero apesar di esaki, Toñi a bolbe pidi despensa i a bisa e señora ku e ta komprondé e doló ku e tabata pasa aden.

Si abo tabata Toñi, kon bo ta kere lo bo a reakshoná? Lo bo a purba di mustra suavedat? Lo tabata difísil pa bo kontrolá bo mes? Klaru, lo no ta nada fásil pa keda trankil den un situashon asina. No ta fásil pa nos keda trankil ora nos ta bou di strès òf ora hende provoká nos.

Sinembargo, Beibel ta enkurashá kristiannan pa nan tin un genio suave. De echo, e Palabra di Dios ta konektá esaki ku sabiduria. Santiago a puntra: “Ken den boso ta sabí i huisioso? Lag’é demostrá esei pa medio di su bon kondukta, pa medio di e obranan ku e ta hasi ku e suavedat ku ta bini di sabiduria.” (Sant. 3:13) Den ki sentido un genio suave ta demostrá sabiduria djariba? I kiko por yuda nos kultivá e kualidat di Dios akí?

DIKON TA SABÍ PA NOS TIN UN GENIO SUAVE?

Un genio suave por kalma un situashon tenso. “Un kontesta suave ta kita rabia, ma un palabra skèrpi ta lanta rabia.”—Pro. 15:1.

Si nos reakshoná rabiá, nos por hasi un situashon desagradabel bira pió pasobra esei lo ta meskos ku pusha palu bou di kandela. (Pro. 26:21) Di otro banda, un kontesta suave hopi bes ta kalma e situashon. E por asta trankilisá un hende rabiá.

Toñi a mira ku esaki a funshoná. Ora e señora a tende Toñi su kontesta suave, el a kuminsá yora. El a splika ku e tabatin hopi problema personal i di famia. Komo resultado di Toñi su kontesta suave i su deseo pa mantené pas, el a haña chèns di prediká na e señora i a kuminsá un estudio di Beibel kuné.

Un genio suave por hasi nos felis. “Felis ta esnan ku tin un genio suave, ya ku nan lo haña e tera.”—Mat. 5:5.

Dikon hende ku tin un genio suave ta felis? Hopi hende ku ántes tabata agresivo a kultivá suavedat, i awor nan ta felis. Nan ta hiba un mihó bida awor, i nan sa ku tin un bunita futuro ta spera nan. (Kol. 3:12) Adolfo, un superintendente di sirkuito na Spaña, ta kòrda kon su bida tabata promé ku el a aseptá e bèrdat.

El a konta: “Mi bida no tabatin sentido. Mi tabata haña asina un mal beis ku asta algun di mi amigunan tabatin miedu di mi manera arogante i violento di reakshoná. Finalmente, mi a kambia. Den un pelea, mi a haña seis hinká di kuchú i kasi mi a sangra muri.”

Pero awor, Adolfo ta siña otro hende pa kultivá suavedat mediante su ehèmpel i palabranan. Hopi hende ta sinti nan atraí na su personalidat agradabel i kariñoso. Adolfo a bisa ku e ta kontentu ku e kambionan ku el a hasi. I e ta masha gradisidu ku Yehova a yud’é kultivá un genio suave.

Un genio suave ta hasi Yehova kontentu. “Sea sabí, mi yu, i hasi mi kurason kontentu, pa mi por kontestá esun ku reprochá mi.”—Pro. 27:11.

Ta bèrdat ku Diabel, Yehova su enemigu prinsipal, ta purba di provoká Yehova. E insultonan di Satanas ta duna Dios tur motibu pa ta furioso, pero tòg Beibel ta deskribí Yehova komo un Dios ku “no ta rabia lihé.” (Eks. 34:6) Ora nos ta hasi esfuerso pa imitá Dios su pasenshi i suavedat, nos ta demostrá sabiduria, i esei ta hasi Yehova masha kontentu.—Efe. 5:1.

Nos ta haña nos ku hopi sirkunstansia difísil den e mundu akí. Nos por haña nos ku hende ku ta “bromadó, arogante, blasfemadó, . . . kalumniadó, sin dominio propio, feros.” (2 Tim. 3:2, 3) Pero esaki no mester stroba un kristian di kultivá un genio suave. E Palabra di Dios ta kòrda nos ku “e sabiduria djariba ta . . . pasífiko, rasonabel.” (Sant. 3:17) Ora nos ta pasífiko i rasonabel, nos ta demostrá ku nos a haña e sabiduria di Dios. E sabiduria ei lo motivá nos pa reakshoná na un manera suave ora hende ta provoká nos i lo yuda nos hala mas serka Yehova, e Fuente di sabiduria.

Kon Bo Por Kultivá un Genio Suave?

Si un hende trata bo malu òf inhustamente, kiko por yuda bo tene bo emoshonnan bou di kontrol i reakshoná na un manera ku ta hasi Yehova kontentu? Ta bon pa bo meditá riba e siguiente prinsipionan balioso.

1 RECHASÁ “E SPIRITU DI MUNDU.”—1 Kor. 2:12. Hopi hende ta kere ku un hende suave ta un hende suak. Nan ta bisa ku pa un hende ta fuerte, e mester ta dominante i agresivo. Tal pensamentu ta reflehá e spiritu di mundu i no e sabiduria djariba. De echo, Beibel ta bisa bon kla ku un hende di genio suave ta fuerte: “Ku hopi pasenshi un gobernante por wòrdu persuadí, i un lenga suave ta kibra wesu.”—Pro. 25:15.

Pregunta pa pensa ariba:

Mi ta pensa ku un hende suave ta un hende fuerte òf débil?

Mi ta hasi esfuerso pa evitá “e obranan di karni,” manera atake di rabia i pleitamentu? —Gal. 5:19, 20.
2 TUMA TEMPU PA MEDITÁ. Beibel ta bisa: “Kurason di e hustu ta studia bon kon pa kontestá, ma for di boka di e malbadonan ta brota maldat.” (Pro. 15:28) Si nos papia ora nos ta rabiá ainda, nos por bisa algu ku lo duel nos despues. Pero si nos meditá òf pensa promé ku nos papia, nos por kontrolá nos pensamentunan i kontestá ku suavedat, i esei lo yuda otro hende reakshoná na un manera faborabel.

Pregunta pa pensa ariba:

Kiko por sosodé si mi rabia lihé?

Mi por pasa por haltu di e fayo pa mantené pas?—Pro. 19:11.
3 HASI ORASHON REGULARMENTE. Pidi Dios pa su spiritu santu, e forsa di mas poderoso den universo. (Luk. 11:13) Kòrda ku e fruta di Dios su spiritu santu ta inkluí suavedat i dominio propio. Adolfo ta kòrda: “Orashon konstante na Yehova a yuda mi mashá, spesialmente ora e situashon tabata tenso.” Di igual manera, si nos “perseverá den orashon,” Yehova lo kontestá nos súplikanan ferviente pa spiritu santu.—Rom. 12:12.

Pregunta pa pensa ariba:

Mi ta pidi Yehova regularmente pa e saminá mi kurason i motivashonnan?

Mi ta pidi Yehova su spiritu santu i e sabiduria pa hasi loke ta agrad’é?—Sal. 139:23, 24; Sant. 1:5.