Papia cu Curashi

¹ Durante añanan recien publicadornan den algun área ta haña cu ta birando cada bes mas difícil pa papia cu hende na nan cas. Hopi ruman ta informá cu den nan teritorio mas cu 50 porciento dje hendenan no ta na cas ora pasa pa haci bishita di cas pa cas. Como resultado, hopi dje tempu cu ta ser dedicá den sirbishi ta inproductivo.

² Añanan pasá hopi hende tabata na cas riba diadomingo, cu generalmente a ser mirá como un dia di sosiegu. Custumbernan a cambia. Ta comun awe pa riba diadomingo hende bai nan trabounan seglar, percurá pa necesidadnan di famia manera haci cómpras, of participá den recreo, locual tambe ta saca nan for di cas. Pues asta riba diadomingo, hañando contacto cu hende di cas pa cas a bira un problema.

³ Ora hende no ta na cas, esei claramente ta nificá cu nan ta na un otro caminda. Ya cu nos meta ta pa papia cu hende, pakico no papia cu esnan cu nos ta topa​—⁠riba caya, na plasa, of na trabou. Tabata Pablo su custumber pa acercá “esnan cu pa casualidad tabata presente,” pa duna nan un testimonio. (Echo. 17:17) Esaki a resultá di ta un forma productivo di testificá na e tempu ei, i e ta un forma productivo di testificá den nos dia.

⁴ Ora nos ta bai di cas pa cas, generalmente nos ta mira hende ta cana keiru of kisas ta wardando riba un persona. Ora tin bon weer, nan por ta sintá riba un banki den parke of trahando riba nan auto of laband’e. Un sonrisa amabel i un saludo amistoso tal bes ta tur loke nos mester pa cuminsá un combersacion. Si nan ta biba den becindario, nos lo por asta bisa cu probablemente net nos no a haña nan na cas i cu awor nos ta contentu di tin e chens aki di papia cu nan. Dor di tuma e iniciativa pa mustra un poco mas curashi, hopi ruman a disfrutá di experencianan recompensador.

⁵ Curashi Ta Duna Resultado: Un ruman homber a conta cu e ta acercá hende cu ta pará, sperando bus, canando trankil, of ta sintá den nan auto. Cu un sonrisa caluroso i un bos alegre, e ta acercá nan manera un bisiña amigabel cu djis kier combersá. Den e manera aki no solamente el a laga hopi literatura sino tambe a cuminsá vários studio di Bijbel.

⁶ Un otro ruman homber i su esposa tabata bayendo di cas pa cas ora nan a topa un señora na pia cargando un sacu grandi di comestíbles. Nan a cuminsá un combersacion, encomendand’e pa su diligencia den percurá pa e necesidadnan di su famia. Anto nan a puntr’é, “Pero ken por suministrá e necesidadnan di humanidad?” Esei a lanta e interes dje señora. Un combersacion breve a hiba na un invitacion na su cas, caminda nan a cuminsá un studio di Bijbel.

⁷ Pues e siguiente biaha cu bo ta testificando di cas pa cas, sea riba diadomingo, of riba cualkier otro dia di siman, i bo ta ripará cu hende no ta na cas, pakico no cobra un poco mas curashi i papia cu hende cu sí bo ta topa​—⁠riba caya of na otro parti? (1 Tes. 2:⁠2) Kisas lo bo tin un ministerio mas productivo i lo bo experenciá mayor goso den bo sirbishi.