Tempu A Cambia
1 Bijbel ta bisa nos cu “e esena dje mundu aki ta cambiando.” (1 Cor. 7:31) Ki cierto esei ta awe! Asta durante nos bida, nos a mira cambionan drástico den e pensamentu i conducta di hende riba tur nivel di sociedad humano. Si nos kier tin éxito den alcansá nan cu e mensahe di Reino, nos manera di presentá e mensahe mester ta al dia cu e tempu cambiando. Nos kier presentá e bon nobo di tal manera cu e ta interesá e hendenan i ta alcansá nan curason.
2 Añanan pasá, den hopi pais e trabou di testificá tabata diferente debí cu, den mayoria caso, hende a hiba un bida mas trankil, i nan a sinti nan sigur. Religion tabatin un lugá sagrado den nan bida. Bijbel a ser respetá mashá. Den e dianan ei testificacion hopi bes a enbolbé refutá argumentonan en cuanto cuestionnan di doctrina. Awe, bida di hende ta agitá. Religion ta ser ridiculisá. Poco hende tin fe den Bijbel. I pa hopi hende, e teoria di evolucion a destruí fe den Dios.
3 Un superintendente biahero a observá: “Awor, ta parce, cu tin asina tantu problema i dificultad den bida di hende cu nos tin cu siña nan con pa biba.” E preocupacion inmediato di hende naturalmente ta drei rond di nan mes, nan famianan i nan ansiedadnan. Esakinan ta e cosnan cu nan ta papia mas tantu tocante dje ora nan ta huntu. Nos tin cu tene esei na mente den nos trabou di testificá.
4 E Reino di Dios Ta e Unico Speransa Sigur pa Futuro: Mayoria hende tin poco confiansa den gobiernu humano. Nan ta sinti cu no tin ningun posibilidad pa mira un mihó mundu durante nan bida. Religion falsu no a duna nan ningun base pa speransa. Ta p’esei e necesidad mas grandi di humanidad ta pa tende e bon nobo tocante e Reino di Dios. Mustra con lo e finalmente percurá e solucion pa tur e problemanan confrontando humanidad.
5 Bijbel Ta e Unico Fuente Confiabel di Guia: E multitudnan di hende djawe a ser mal guiá dor di lidernan cu ta dependé riba sabiduria humano i filosofianan mundano. Hende mester realisá ainda cu “no ta pertenecé na hende cu ta canando pa ni sikiera dirigí su paso.” (Jer. 10:23) E les mas balioso cu nan por siña ta cu nan mester ‘confia den Jehova cu tur nan curason i no dependé riba nan mes comprendimentu.’ (Pro. 3:5) Aunke tempu a cambia, Bijbel sí no a cambia. P’esei, den nos ministerio semper nos mester destacá e Palabra di Dios, siñando otronan pa apreciá su guia inspirá i divino. (2 Tim. 3:16, 17) Pa cumpli cu e propósito ei, nos mester mantené e importancia dje Bijbel dilanti e personanan dor di referí na dje den nos presentacionnan, usand’e pa contestá nan preguntanan, i bogando p’e necesidad di studi’é i aplicá su sabiduria práctico.
6 Maske e tempu djawe ta cambiando, nos metanan den e ministerio ta keda mescos. Nos mester predicá e bon nobo dje Reino, yuda otronan desaroyá confiansa den e Palabra di Dios i mira e necesidad di studia e Bijbel huntu cu nos. Loke nos ta bisa mester ta relevante na e necesidadnan actual di esnan na ken nos ta testificá. Dor di haci esaki, nos por bira esnan cu ta compartí e bon nobo cu otronan i asina gana mas tantu persona posibel.—1 Cor. 9:19, 23.