Pakico Nan Ta Hacié?
1 A ser profetisá dje Cristo cu ‘puru celo pa e cas di Dios lo devor’é.’ (Sal. 69:9) E celo di Jesus pa Jehova su adoracion berdadero a impuls’é pa pone e ministerio na promé lugá. (Luc. 4:43; Juan 18:37) E mésun celo aki pa duna testimonio dje berdad ta ser reflehá awe den e ministerio di Testigonan di Jehova. E aña di sirbishi cu a pasa, un promedio di 645.509 ruman mundialmente a participá den un of otro forma di sirbishi di pionero tur luna. En bista di nos dedicacion na Dios, cada un di nos mester considerá huntu cu oracion si nos por ahustá nos circunstancianan afin di sirbi como pionero auxiliar of regular.—Sal. 110:3; Ecl. 12:1; Rom. 12:1.
2 Bibando den un sistema di cosnan cu ta egoistamente materialista, hopi hende den mundu ta hañ’é difícil pa comprendé pakico un hende lo traha asina duru den e ministerio pa algu cu no ta producí ningun beneficio monetario ni ningun gloria. Pakico pioneronan ta hacié? Nan sa cu nan ta enbolbí den un trabou cu ta salba bida. Motivá dor di amor profundo pa Jehova i pa nan próhimo, nan ta sinti un obligacion fuerte i personal pa yuda salba bida. (Rom. 1:14-16; 1 Tim. 2:4; 4:16) Un pareha pionero a resumié bon bisando: “Pakico nos ta trahando pionero? Acaso nos lo por hustificá dilanti Jehova pakico nos no a traha pionero?”
3 Un otro ruman muher a skirbi esaki tocante su decision pa cuminsá traha pionero: “Ami cu mi esposo a planea pa biba di un solo salario, loke a nificá biba sin e cosnan innecesario. Sin embargo, Jehova a bendicioná nos ricamente, nunca el a bandoná nos na pobresa of necesidad. . . . Mi a haña un berdadero motibu pa biba—esei ta pa yuda hende spiritualmente pober pa yega na sa cu Jehova, e Dios berdadero, no ta leu di esnan cu ta busk’é.” Mirando e urgencia dje tempu, pioneronan ta keda contentu cu e necesidadnan di bida miéntras nan ta busca cu empeño pa adkerí tesoronan spiritual cu lo dura pa semper.—1 Tim. 6:8, 18, 19.
4 Si bo circunstancianan personal ta permití, pakico no djoin e cientos di miles di bo rumannan rond mundu cu ta trahando pionero? Asina bo por experenciá e mésun goso cu nan.