Hóbennan—Ki Metanan Spiritual Boso Tin?
1 Jehova sa con importante trabou significativo i metanan alcansabel ta pa haña felicidad. (Mira Génesis 1:28; 2:15, 19.) Awe, Jehova a duna su pueblo e asignacion di predicá i siña otro. Tambe nos tin e meta di al final alcansá bida eterno den Paradijs. Miéntras tantu, nos tin cu fiha metanan spiritual progresivo si nos kier evitá di dirigí nos energia i recursonan den e direccion robes.—1 Cor. 9:26.
2 Metanan Realístico pa Hóbennan: Hóbennan mester tin metanan teocrático cu ta den nan alcanse segun nan capacidad individual. (1 Tim. 4:15) Algun cu ta hopi chikitu a alcansá e meta di siña for di cabes e bukinan di Bijbel asta promé cu nan a siña lesa. Mediante e studio di famia, yunan ta siña prepará p’e reunionnan di manera cu nan por cumpli cu e meta di duna comentarionan significativo i di inscribí den e Scol di Ministerio Teocrático. Ora yunan ta compañá nan mayornan den sirbishi di veld, nan ta siña pa tene un participacion den duna testimonio segun cu nan ta progresá den direccion dje meta di bira publicadónan no-bautisá. Mayornan mester pone dilanti nan yunan chikitu e meta di dedicacion i bautismo.
3 Si bo ta un tiener, kico bo a pone como bo metanan spiritual? “Corda, awor, bo Magnífico Creador” dor di enfocá riba e metanan realmente importante den bida. (Ecl. 12:1; Sal. 71:17) Pakico no traha pionero auxiliar durante e lunanan cu bo tin vacansi di scol? Bo a pensa pa drenta den e ministerio di tempu completo como pionero regular? Kico di siña un idioma nobo di manera cu den futuro lo bo por yuda un grupo of congregacion di idioma stranhero den bo área of na otro parti? Hopi ruman cu awor ta sirbi na Betel of como superintendente biahero of misionero a fiha sirbishi special di tempu completo como nan meta tempu nan tabata bai scol ainda. Pakico bo tambe no ta haci mescos?
4 Miéntras bo ta hopi yong ainda, haci esfuerso pa imitá Jesus su ehempel. Asta n’e edad yong di 12 aña, e tabata cla pa papia tocante asuntunan spiritual. (Luc. 2:42-49, 52) Fihando metanan probechoso pa bo mes pa haci studio personal, pa lesa Bijbel tur dia, i pa asociá regularmente cu cristiannan maduro na reunion i den sirbishi lo yudá bo adkerí e abilidad pa siña otronan tocante e Reino di Dios manera Jesus a haci.