Haña Deleite den Duna un Testimonio Cabal
1 Nos tur ta gusta haci loke nos ta haci bon. Marco 7:37 ta bisa cu e multitudnan a declará en cuanto Jesus: “El a haci tur cos bon.” No ta straño anto cu Jesus tabatin deleite den haci Jehova su boluntad! (Compará cu Salmo 40:8.) Dor di presta atencion n’e siguiente sugerencianan, nos tambe lo haña goso obedeciendo Jesus su mandamentu “pa predicá na e pueblo i pa duna un testimonio cabal.” (Echo. 10:42) Durante januari nos ta ofrecé cualkier buki di 192 página publicá promé cu 1985 cu e congregacion por tin na stock of e buki Biba pa semper. Con nos por usa e publicacionnan aki pa duna un testimonio cabal?
2 Ya cu hopi bes hende ta preocupá cu cuestionnan di salú, lo bo por bisa esaki:
◼ “Apesar di logronan grandi riba tereno di medicina, tin hopi sufrimentu debí na malesa. Den bo opinion, di con ta asina? [Permití contesta.] Jesucristo a bisa cu pestilencia lo ta un rasgo dje último dianan. (Luc. 21:11) I tog Bijbel ta describí tambe un tempu ora enfermedad lo no existí mas. [Lesa Isaías 33:24.] Ripará con e buki aki ta inspirá speransa den e siñansa bíblico básico ei.” Resaltá comentarionan cu ta al caso den e buki cu bo ta presentando, i ofrec’é.
3 Ora di testificá informalmente cerca di centronan comercial, lo bo por cumindá, caba puntra:
◼ “Bo ta haña cu cosnan ta birando asina caru e dianan aki cu ta difícil pa e cen yega? [Permití contesta.] Bo ta kere cu lo bini un dia ora lo tin berdadero siguridad económico?” Permití contesta. Anto presentá un cita bíblico apropiado for dje buki cu bo ta ofreciendo. Sigui bisando: “E buki aki ta mustra con, mediante su Reino, Dios lo resolvé e problemanan cu ta haci bida asina difícil awe.” Ofrecé e buki. Lo bo por bisa cuantu bo a disfrutá dje combersacion, anto puntra: “Tin un manera cu nos por sigui cu e combersacion aki na un otro ocasion?” Den e manera aki lo bo por obtené e persona su number di telefon of adres di cas.
4 Kisas bo ta haña chens di usa e presentacion aki tocante pas mundial, cu e buki “Biba pa semper”:
◼ “Segun bo, di con ta asina difícil pa logra pas mundial? [Permití contesta, caba mustra e plachi na página 20-1.] Esaki ta un plachi di un suceso bíblico describí den Revelacion. [Lesa Revelacion 12:7-9, 12 directamente for di §17. Anto lesa e palabranan cu ta compañá e plachi.] E falta di pas den mundu ta un dje efectonan dje echo cu Diabel a ser tirá abou na tera. E buki aki ta contestá hopi pregunta importante, i mi ta contentu di por hacié disponibel pa bo si bo kier les’é.”—Pa haña otro maneranan eficas di presentá e buki Biba pa semper, wak e último página dje edicionnan di Nos Ministerio di Reino di september 1995, februari 1995, september 1994, september 1993 i augustus 1992.
5 Ora bo bolbe pa rebishitá esnan cu mustra interes, lo bo por purba cuminsá un studio di Bijbel dor di adaptá e introduccion aki:
◼ “Ultimo biaha cu nos a papia, bo a haci un comentario masha interesante. [Mencioná un comentario cu e persona a haci.] Mi a sigui pensa riba dje, i lo mi kier compartí cu bo e resultadonan di algun investigacion cu mi a haci riba e tópico. [Compartí un texto apropiado.] Nos ta ofrecé pa conducí un curso di studio grátis cu a haci posibel pa miyones di hende explorá e siñansanan básico di Bijbel den un periodo di tempu corticu. Un examinacion asina por yudá bo haña mas confiansa cu Dios su promesanan lo cumpli sigur.” Resaltá algun pregunta cu lo ser contestá. Si e persona nenga e oferta pa un studio di Bijbel, splica cu tambe nos tin un curso special mas lihé cu ta tuma solamente 15 minuut pa siman pa 16 siman. Mustra e foyeto Rekerí, bai na les 1 i puntra si bo por demostrá e promé les.
6 Corda Usa e Registro di No-na-Cas: Por usa e registro di “no-na-cas” eficasmente den bo esfuerso pa haña contacto cu tur hende den e teritorio. Dor di tene registronan di “no-na-cas” nechi i lesabel nos ta haci sigur cu nan lo ta útil asta pa otro publicadónan cu kisas lo usa nos registro pa purba alcansá e doñonan di cas. Bon uso dje registronan aki por yuda nos alcansá e meta di ègt papia cu cada persona den nos teritorio.
7 Sea ábil den bo trabou, i lo bo tin goso den dje. Presta atencion constante na duna un testimonio cabal i haña deleite den efectuá tur e facetanan dje ministerio bon.—1 Tim. 4:16.