Presentando e Bon Nobo cu un Sentido di Urgencia
1 Nos ta mustra nos aprecio profundo pa e promesanan dje Reino di Dios dor di participá di henter nos curason den e ministerio cristian. Nos tin cu participá den e trabou aki cu un sentido di urgencia. Pakico? Pasobra e trahadornan ta poco, e fin dje sistema di cosnan malbado aki ta yegando cerca i e bida di esnan den nos teritorio ta na peliger. (Eze. 3:19; Mat. 9:37, 38) Un responsabilidad asina pisá ta rekerí nos mihó esfuerso den e ministerio. Con nos por mustra un sentido di urgencia relacioná cu nos actividad di sirbishi di veld? Dor di prepará bon presentacionnan di antemano, dor di ta diligente den busca hende na unda cu nan por ser hañá, dor di tene un registro exacto di tur esnan cu mustra interes, dor di bolbe bek pronto pa sigui cultivá e interes hañá i dor di corda cu siendo bida ta enbolbí, nos mester tuma nos ministerio na serio. E siguiente sugerencianan por ta útil segun cu nos ta prepará pa presentá e bon nobo cu un sentido di urgencia durante februari. E oferta lo ta e buki Revelacion—su gran culminacion ta cerca!
2 Kisas lo bo por cuminsá un combersacion dor di mencioná brevemente algun problema cu e comunidad ta enfrentá i despues lo bo por bisa:
◼ “Hopi hende ta kere cu tin un Dios, pero nan ta puntra nan mes: ‘Ki clase di futuro e kier pa nos?’ Con abo lo contestá esei? [Permití contesta.] Bo tabata sa cu Bijbel claramente ta splica e boluntad di Dios pa humanidad i e pasonan cu e ta tumando pa logra esei?” Bai na página 301 den e buki Revelacion su culminacion. Lesa Revelacion 21:1 den §1 i despues lesa e splicacion duná di dje den e último mitar di §2. Bai na e plachi na página 302 pa ilustrá loke esaki ta nificá pa nos futuro. Lesa Revelacion 21:4 den §6. Si tin bon reaccion, ofrecé e buki. Mencioná e contribucion p’e. Haci areglo pa bolbe bek un ora cumbiniente pa sigui e combersacion.
3 Na un rebishita lo bo por sigui trata e consideracion anterior di Revelacion 21:1, 4 cu e presentacion breve aki:
◼ “Na mi último bishita, nos a papia tocante e promesa di Dios pa prepará un sociedad terenal nobo pa humanidad. [Hala atencion atrobe n’e plachi na página 302 den e buki Revelacion su culminacion.] Lo bo kier mira bo famia disfrutá di condicionnan asina? [Permití contesta.] E pregunta ta, Ki confiabel e promesanan di Dios ta? Por fabor, tuma nota di loke e mes ta bisa.” Lesa Revelacion 21:5, 6a den §8 na página 303. Haci e pregunta imprimí pa §9 na página 303 i lesa e contesta, incluyendo e último frase dje paragraf. Mencioná e oferta di un studio di Bijbel grátis. Haci areglo pa demostr’é despues.
4 Ya cu hopi hende ta preocupá tocante e problemanan aumentante cu humanidad ta enfrentá, lo bo por bisa algu asina aki n’e bishita inicial:
◼ “Casi tur hende ta preocupá tocante e problemanan cu nos ta enfrentá den nos comunidad. [Mencioná un par.] Pa décadanan políticonan a primintí di trece solucionnan permanente, i algun di nan a purba haci esei. Kico abo ta pensa ta pone cu condicionnan ta sigui empeorá? [Permití contesta.] Bijbel ta ofrecé un splicacion cu mayoria hende nunca a tuma na consideracion. E buki di Revelacion ta describí un guera cu a tuma lugá den shelu. Ripará e resultado, manera ta ser declará na Revelacion 12:9.” Lesa e versículo, caba bai na página 182 den e buki Revelacion su culminacion. Usa e plachi pa splica Satanas su enbolbimentu den asuntunan di tera. Si e persona demostrá berdadero interes, ofrecé e buki i mencioná e contribucion p’e. Haci areglo pa bolbe bek i considerá con Dios lo solucioná e problemanan di humanidad.
5 Si bo a primintí di bolbe bek pa splica Dios su solucion pa e problemanan djawe, lo bo por purba e introduccion aki:
◼ “Mi a haci un esfuerso special pa bini bek pa nos por sigui cu nos combersacion riba e berdadero solucion pa e problemanan cu humanidad ta enfrentá. Na mi último bishita, nos a mira cu Bijbel ta identificá Satanas e Diabel como esun cu ta gañando henter e tera habitá. Siendo cu e ta un criatura spiritual sobrehumano, bo ta kere cu tin un manera pa eliminá su influencia? [Permití contesta.] Por fabor, tuma nota di loke Bijbel ta bisa.” Lesa i splica Revelacion 20:1-3. Usando e plachi na página 4-5 dje buki Conocimentu, mustra con condicionnan lo ta sin e influencia di Satanas. Ofrecé un studio di Bijbel i trata na cumins’é mesora.
6 Cu asina tantu hende interesá den e medio ambiente, lo bo por bisa algu asina aki pa habri un combersacion:
◼ “Nos a ripará cu casi tur hende ta preocupá tocante e contaminacion di nos aire, awa i cuminda. Den algun pais e condicion dje medio ambiente ya caba ta un peliger pa bida. Siendo cu Dios ta e Creador dje tera, kico bo ta pensa lo e haci tocante esaki? [Permití contesta.] Bijbel ta bisa cu Dios ta bai exigí cuenta dje manera cu nos ta usa e planeta. [Lesa Revelacion 11:18b.] Imaginá bo, biba riba un tera cu ta liber di tur contaminacion!” Dirigí atencion na Dios su promesa di un paradijs, manera Revelacion 21:3, 4 ta indicá. Mustra e plachi na página 302 dje buki Revelacion su culminacion. Ofrecé e buki i haci areglo pa un otro bishita. Duna e persona un oportunidad pa haci e contribucion.
7 Ora di regresá cerca un persona cu a mustra interes den e tera paradísico, lo bo por bisa:
◼ “Na mi último bishita, nos tabata di acuerdo cu pa solucioná e problema di un tera contaminá, Dios lo tin cu intervení den asuntunan di hende. Pero e pregunta ta, Kico nos tin cu haci pa sobrebibí te den e hustu mundu nobo cu Dios lo forma?” Lesa Juan 17:3. Invitá e doño di cas pa probechá di nos curso grátis pa studia Bijbel i asina gana e conocimentu special aki.
8 Esta un privilegio e ta pa ser usá como cosechadornan di tempu actual i pa haci un trabou di predicacion cu ta salba bida! Cu nos tur keda ocupá presentando e bon nobo cu un sentido di urgencia, ‘sabiendo cu nos labor no ta en bano.’—1 Cor. 15:58.