“Kico Mi Mester Haci?”
1 Como un hóben cu ta birando adulto, kisas bo ta puntra: ‘Kico mi mester haci cu mi bida?’ Hóbennan cristian kier expandé nan sirbishi na Jehova den e ministerio. Pero con boso por haci esaki miéntras boso ta tuma e responsabilidadnan di adulto, entre otro, percurá pa boso propio necesidadnan material? Kisas no ta fácil pa haña e contesta.
2 Tin hóbennan cu ta bira anshá ora nan wak e situacion económico dje mundu i e pronósticonan pa futuro. Nan ta puntra nan mes: ‘Mi mester sigui un educacion seglar adicional? Mi mester drenta e sirbishi di tempu completo mesora?’ Pa un persona por tuma e decision corecto, e tin cu contestá e pregunta aki onestamente: ‘Kico ta mi interes principal den bida?’ E tin cu examiná su motibunan.
3 Kico abo a cultivá como bo interes principal durante bo hubentud? Bo ta interesá foral den busca bentaha financiero, of di berdad bo kier usa bo bida pa promové interesnan di Reino? Un título di universidad no ta garantisá éxito den e mercado laboral. Como un alternativa, hopi hóben a adkerí abilidadnan di trabou cu doñonan di trabou ta busca, dor di traha como aprendis, dor di sigui cierto educacion técnico of scol di ofishi, of sigui cursonan corticu di universidad cu ta rekerí masha tiki tempu i enbolbimentu.
4 Confia Jehova Su Promesa: Un echo di sumo importancia pa considerá ta e siguransa cu Jehova Dios ta duna cu lo e percurá pa esnan cu pone interesnan di Reino promé den bida. (Mat. 6:33) Esaki no ta un promesa bashí. Hopi ruman homber cu a asistí n’e Scol di Entrenamentu Ministerial a haña título di universidad promé cu nan a conocé e berdad. Pero ki clase di trabou seglar nan tabata haci? Masha poco di nan tabata sigui e carera pa cua nan a siña. Hopi tabata traha riba tereno di duna servicio, i por a percurá masha bon mes pa nan necesidadnan financiero miéntras nan tabata traha pionero. Dor di expandé nan actividad den e ministerio, nan ta ricibiendo bendicionnan hopi mas grandi cu cualkier recompensa monetario.
5 Ora di dicidí kico bo mester haci despues cu bo caba scol secundario, pisa tur e factornan i examiná bo motibunan bon. Pa un punto di bista balansá di ki opcionnan bo tin, considerá informacion manera loke a sali den e Spierta! di 8 di mart 1998, página 13-15. Papia cu bo mayornan, e ancianonan, bo superintendente di circuito i pioneronan exitoso den bo área. Esei lo yuda bo tuma un decision sabí tocante kico bo mester haci cu bo bida.—Ecl. 12:1, 13.