Predicacion Ta Distinguí Nos
1 Hopi hende ta puntra: “Kico ta haci Testigonan di Jehova diferente for di otro religion?” Con lo bo contestá? Lo bo por splica algun di nos creencianan basá riba Bijbel. Pero bo a pensa tambe pa señalá con gran parti di nos ministerio público ta distinguí nos for di otro religion?—Mat. 24:14; 28:19, 20.
2 Awe, poco hende religioso ta sinti nan motivá pa compartí nan creencianan cu otro hende. Podisé nan ta pensa cu obedecé leynan di César, hiba un bida moralmente decente of haci bon obra pa otro hende, ta suficiente. Sin embargo, nan no ta sinti ningun obligacion pa yuda otro hende siña loke Bijbel ta bisa tocante gana salbacion. Con nos ta diferente?
3 Nos ministerio celoso ta na contraste skerpi cu e actividadnan di otro religion. Pa mas cu 100 aña, Testigonan di tempu actual a predicá e bon nobo diligentemente te na extremo dje tera, imitando asina e promé cristiannan. Nos meta pa haci esei ta pa yuda mas tantu hende posibel pone nan bida na armonia cu e boluntad di Dios.—1 Tim. 2:4; 2 Ped. 3:9.
4 Ki Reputacion Abo Tin? Bo ta conocí como un predicadó celoso dje Palabra di Dios? (Echo. 17:2, 3; 18:25) Debí na bo actividad di predicá, bo bisiñanan ta mira unbes e diferencia entre nan religion i esun di bo? Bo ta conocí como un hende cu ta ansioso pa compartí su speransa cu otronan? Bo tin un rutina regular pa participá den e ministerio? Corda cu nos ta distinguí nos mes no solamente na nos nomber, sino tambe dor cu nos ta haci loke e nomber ei ta describí, esta, testificá tocante Jehova.—Isa. 43:10.
5 Amor pa Dios i pa próhimo ta motivá nos pa participá den e actividad di predicá. (Mat. 22:37-39) Ta p’esei nos, mescos cu Jesus i e apostelnan, kier probechá di tur oportunidad pa compartí e mensahe di Reino cu otro hende. Laga nos sigui predicá e bon nobo celosamente na esnan cu ta dispuesto na scucha. Dor di haci esei nos ta yuda personanan di curason sincero mira “e distincion entre . . . un cu ta sirbi Dios i unu cu no a sirbié.”—Mal. 3:18.