Ken Lo Por Aceptá un Studio di Bijbel?
1 Profeta Amos a declará cu lo bai tin un hamber den e pais di Israel, “un hamber, no di pan, i un sed, no di awa, sino pa tende e palabranan di Jehova.” (Amos 8:11) Na beneficio di esnan cu tin hamber i sed den sentido spiritual, Jehova su organisacion ta distribuyendo un cantidad enorme di literatura bíblico rond mundu.
2 Te asina leu, nos a imprimí 70 miyon buki Conocimentu i 91 miyon foyeto Rekerí. Nos ta apreciá e simplesa i eficacia dje publicacionnan aki ora di siña hende e berdad. Sin embargo, literalmente multitudnan di hende cu a ricibí nos literatura no a studia Bijbel cu nos ainda. Kico nos por haci tocante esaki?
3 Ken Cu Tuma Literatura Ta un Posibel Studio! Considerá e experencia di un publicadó cu a ofrecé un studio na un señora e promé bes cu el a papia cuné na porta. E señora a aceptá mesora. Despues el a bisa e ruman: “Bo ta e promé persona cu a yega di ofrecé pa studia Bijbel cu mi.” Den bo teritorio, cuantu hende cu tin nos literatura caba, kisas lo bisa mescos? Cada bes cu laga literatura, un oportunidad ta habri pa haci rebishita i cuminsá un studio di Bijbel.
4 Como cu hopi bes nos ta topa hende cu ya caba tin nos publicacionnan, con nos por stimulá nan interes pa haña sa kico nos literatura ta contené? Un Testigo a puntra un doño di cas directamente si e no tabatin ningun pregunta bíblico, i e señora a contestá cu no. E ruman a persistí: “Mi tin sigur cu bo tin pregunta.” Berdad, e señora tabatin pregunta i un studio a cuminsá. Pakico no puntra e doño di cas si lo e kier haña sa e punto di bista bíblico di un pregunta of di un asuntu cu ta preocup’é? Sea prepará pa plantia un pregunta interesante si e doño di cas no por pensa riba algu. Combersacionnan asina por prepará e caminda pa un studio regular di berdadnan bíblico básico.
5 E actividad di studio di Bijbel ta e curason di nos ministerio. Ya cu nos no sa nunca ken lo por aceptá un studio, no vacilá pa ofrecé studio na tur hende cu bo topa. Presentá e asuntu di studio den oracion na Jehova, i traha di acuerdo cu bo oracion. Por ta pronto, un hende cu bo ofrecé un studio lo acept’é!—1 Juan 5:14, 15.