‘Kico Mi Por Haci?’
1 ‘Kico mi por haci?’ Sin duda, e pregunta ei tabata den mente dje miembronan dje grupo chikitu di studio di Bijbel, organisá pa Charles Taze Russell den añanan 1870. Segun cu nan a progresá den nan comprendimentu dje boluntad di Dios, e studiantenan di Bijbel ei lo mester a puntra nan mes kico nan por a haci pa yuda otro hende siña tocante Dios su propósito. Pa alcansá henter e mundu cu e conocimentu di Bijbel cu nan tabata ganando, sigur tabata un tarea enorme.
2 Nos por ta felis cu nan a trata satisfactoriamente cu e desafio ei. Con? Cada persona a haci su parti cu kisas a parce insignificante, di manera cu awe, Testigonan di Jehova a bira conocí mundialmente: un organisacion di casi seis miyon proclamadó di Reino cu ta sirbi den alrededor di 90.000 congregacion den 234 pais i isla!—Isa. 60:22.
3 Ofrecé Bo Pleno Apoyo: Ta vital pa cada un di nos participá den e tremendo trabou cu Jesus a profetisá cu lo tuma lugá den e último dianan aki. (Mar. 13:10) Ta sigur cu no por laga e trabou aki solamente den man dje cantidad limitá di ancianonan, ni e actividad di predicá no ta cai riba scouder dje pioneronan so. En realidad, tur cristian dedicá tin un papel importante pa hunga. Nos tur por participá den un ke otro forma di actividad di predicá. (1 Tim. 1:12) Sea cual sea e grado cu nos haci esaki, nos ta beneficiá nos mes i otro hende.—1 Tim. 4:16.
4 Tambe nos cada un por ofrecé pleno apoyo na nos hermandad cristian den otro maneranan significativo. Nos por apoyá e reunionnan di congregacion dor di asistí regularmente i participá cu entusiasmo. (Sal. 122:1, 8, 9) Nos por haci nos parti pa tene e congregacion moralmente limpi. Nos por duna apoyo financiero n’e obra mundial, di acuerdo cu nos medionan. Nos por yuda limpia Salon di Reino. Tur hende por promové un spiritu caluroso di amor i unidad den e congregacion dor di yuda hende nobo, mucha i grandinan.—Col. 3:12, 14.
5 Pues, kisas bo ta puntra: ‘Kico mi por haci?’ Maske bo esfuersonan individual por parce insignificante, dor di haci bo parti, bo ta contribuí na un congregacion fuerte, activo i salú. Pues anto, nos tur tin un parti vital den onra Jehova su nomber!