“Lucha e Lucha Excelente di Fe”
1 Apostel Pablo a urgi Timoteo pa “lucha e lucha excelente di fe.” (1 Tim. 6:12) Pablo mes a cumpli cu e palabranan aki. Na fin di su bida, el a bisa cu siguransa cu el a hiba un bon lucha. (2 Tim. 4:6-8) Den tur manera, el a ehercé e ministerio cu frankesa, curashi i awante. Dor di imitá su ehempel, nos por tin e mésun siguransa interno cu nos ta haciendo lo mihó cu nos por den nos lucha pa e fe cristian.
2 Haci e Esfuerso Necesario: Pablo a traha duru den e ministerio. (1 Cor. 15:10) Nos tambe ta haci mescos ora nos ta busca pa haña tur esnan cu ta merecedor den nos teritorio. (Mat. 10:11) Pa alcansá algun di nan, esei por nificá cu nos mester lanta mainta trempan pa predicá na hende cu nos ta topa riba caya. Of e por nificá traha na cabamentu di atardi of comienso di anochi pa haña hende despues cu nan bin cas bek.
3 Nos mester tin disiplina propio i un bon programa pa nos ta puntual ora di reuní cu nos grupo di studio di buki pa sirbishi di veld. Por ehempel, tin algun miembro dje famia di Betel cu tin cu core te cu 40 minuut cu auto ida i buelta, pa nan sali den sirbishi cu nan congregacion asigná den fin di siman. Tambe, kisas nos ta admirá algun publicadó i famia den nos congregacion cu tin cu biaha un bon pida, pero cu tog ta na tempu. Ehempelnan asina di rumannan diligente i organisá, ta digno di imitacion.
4 Nos mester sinti nos motivá pa rebishitá tur persona interesá cu nos haña. Asta ora nos laga literatura riba caya of den un ambiente informal, nos tin cu haci un esfuerso pa haña e persona su adres of number di telefon. Anto despues nos por bishit’é pa cultivá su interes i purba cuminsá un studio di Bijbel.
5 Sea Regular den Sirbishi: Pablo tabata consistente i cabal den su predicacion. (Rom. 15:19) Ke tal di abo? Bo ta participá cu regularidad den e ministerio? Bo a sali caba den sirbishi di veld e luna aki? Durante augustus, conductornan di Studio di Buki di Congregacion ta interesá pa soru pa tur hende den nan grupo participá den e ministerio. Nan lo yuda bo haci esei.
6 Dor di imitá Pablo su ehempel di apoyá e bon nobo plenamente, nos lo sigui “lucha e lucha excelente di fe.”