Bo Ta Perseverando?
1 “Mi no tin un motibu mas grandi pa duna gradicimentu cu e cosnan aki, . . . cu mi yunan ta sigui cana den e berdad.” (3 Juan 4) E awante dje yunan spiritual di Juan a dun’é gran goso. Esta contentu nos Tata celestial mester ta di mira cu miyones di su prospectivo yunan “ta sigui cana den e berdad”!—Pro. 23:15, 16; 27:11.
2 Aunke e pueblo di Dios en general ta persistí den actividad cristian celoso, algun ruman a baha nan actividad poco-poco. Maske e rumannan aki kisas tabata hopi activo nobo-nobo cu nan a siña e berdad, cu pasamentu di añanan, nan a cai den un patronchi di participá solamente un poco of de bes en cuando den e trabou di haci disipel.
3 Ta di comprendé cu algun ruman kisas a baha den nan actividad debí na limitacionnan físico i e efectonan di edad cu ta subi. Apesar di esei, mester encomendá nan pa nan awante. Nan ta haci loke nan por. Pero cada ruman cu a dedicá su bida na Dios mester puntra su mes: ‘Mi a permití mi mes enfocá asina tantu riba actividadnan personal, cu interesnan di Reino ta ocupá solamente un lugá chikitu den mi bida? Mi a bira un poco “lou,” of ainda mi ta haci esfuerso “vigoroso”?’ (Rev. 3:15, 16; Luc. 13:24) Laga nos tur refleccioná cu oracion riba loke nos ta haciendo i mehorá loke ta necesario, teniendo na mente cu Jehova ta primintí di duna “gloria i onor i pas pa tur hende cu ta obra loke ta bon.”—Rom. 2:10.
4 Con pa Perseverá: Kico a yuda Jesus perseverá? Pablo a splica: “P’e goso cu a ser poné su dilanti el a wanta un staca di tormento, despreciando bergwensa, i a sinta na man drechi dje trono di Dios.” (Heb. 12:1-3) E goso cu a ser poné dilanti Jesus a surpasá e pruebanan temporal cu e tabatin cu enfrentá. Teniendo na mente e goso cu tin poné nos dilanti, por yuda nos tambe perseverá. (Rev. 21:4, 7; 22:12) Si nos acudí na Jehova pa duna nos fortalesa mediante studio personal, asistencia regular na reunion i oracion persistente, nos lo por perseverá den e trabou cu el a duna nos pa haci.
5 E awante di Jehova su lealnan ta hacié contentu. P’esei, laga nos aumentá su goso dor di sigui “cana den e berdad.”