Jehova Su Bendicion Ta Haci Nos Ricu
1 Hopi bes nan ta midi e éxito di un persona n’e cantidad di cen cu e ta gana. Ta p’esei hopi hende ta mira personanan cu placa como e hendenan di mas felis i satisfecho. Sin embargo, hende cu ta pensa cu placa por cumpra felicidad ta mal ekibocá. (Ecl. 5:12) Esnan cu ta “determiná di bira ricu” den sentido material no ta haña goso duradero. (1 Tim. 6:9) Na contraste, sirbidónan di Jehova ta realmente gososo i ta e hendenan mas ricu na mundu. (Pro. 10:22; Rev. 2:9) Con asina?
2 Evidencia di Nos Rikesa: Nos tin perspicacia spiritual ricu i un comprendimentu dje Palabra di Dios, Bijbel. Via su organisacion terenal, Jehova ta siña nos continuamente tocante su mes i su Yu, pa nos beneficio eterno. E comprendimentu exacto cu nos tin ta haci posibel pa nos hala cerca Jehova i disfrutá di un relacion íntimo cuné. (Sant. 4:8) Nos ta ser protehá di cierto malesa i peligernan dor di dicerní loke ta bon i loke ta malu i sigui e leynan di Dios. Nos tin sigur cu Jehova lo percurá pa nos, i esei ta resultá den contentamentu i pas mental cu ta bini di Dios.—Mat. 6:33.
3 Nos ta gosa di pas i unidad den nos hermandad spiritual pasobra nos ta cultivá Dios su fruta di spiritu. Uní dor di un laso fuerte di amor, nunca nos tin nodi sinti cu Dios of nos rumannan a bandoná nos ora nos ta confrontá calamidad.—Gal. 6:10.
4 Nos bida tin berdadero nificacion i propósito. Nos ta consider’é un privilegio maraviyoso cu nos por participá den e predicacion mundial dje bon nobo. Nos ta haña un goso duradero segun cu nos ta yuda otro hende drenta den un bon relacion cu Dios i sirbi uní cu nos den adoracion puru. E ministerio, nos tesoro precioso, ta trece onor na Jehova i ta duna nos e satisfaccion di ta contribuí na e santificacion di su nomber. Nos ta mantené un actitud mental positivo, sabiendo cu pronto nos speransa pa futuro lo ser realisá.
5 Demostrá Nos Aprecio: Laga nos demostrá aprecio p’e bendicionnan di Jehova cu di berdad ta haci nos e hendenan mas ricu na mundu. (Pro. 22:4) Si tur dia nos tuma tempu pa meditá riba loke nos tin, esei lo impulsá nos pa gradicí Jehova pa su amor generoso i sigui dun’é nos debocion exclusivo.