Tin Bida den Wega!
1 Bijbel ta mustra cla cu e boluntad di Jehova ta “pa tur clase di hende ser salbá.” Sin embargo, ta cierto tambe cu e prospecto di bida di miles di miyones di hende ta dependé di nan actitud pa cu Jehova Dios i su Reino den man di Jesucristo. Un actitud corecto por ta basá solamente riba “conocimentu exacto dje berdad.” (1 Tim. 2:3, 4) Miéntras nos ta notificá hende cu pronto lo limpia e tera di tur maldad pa asina habri caminda pa Dios su mundu nobo di husticia, nos a ser comisioná tambe pa efectuá un trabou vital cu ta salba bida.—Mat. 24:14; 28:19, 20; Rom. 10:13-15.
2 Pakico Asina Urgente? Jesus a spierta tocante un “tribulacion grandi tal como no a sosodé desde principio di mundu.” (Mat. 24:21) E tribulacion ei lo yega su culminacion na Armagedon. (Rev. 16:16) E masanan di hende cu ta confrontá destruccion si nan no reaccioná faborabel na e bon nobo ta incluí nos famianan, bisiña, colega di trabou, compañero di scol i conocínan incrédulo. Pero nos ta interesá pa alcansá “tur clase di hende,” i asina imitá Dios cu a manifestá su amor pa henter e mundu di humanidad dor di duna su Yu Jesucristo, como un rescate pa tur. (Juan 3:16) Nos mester haci esfuerso celoso pa invitá tur hende pa hui bai na Dios su lugá di siguridad. Dor di efectuá e trabou di predicá plenamente, nos por evitá culpa di sanger.—Eze. 33:1-7; 1 Cor. 9:16.
3 Kico Ta Nos Meta? Henter e Palabra di Dios ta enfatisá e importancia dje trabou di predicá. Manera apostel Pablo a expres’é, “e amor cu e Cristo tin ta obligá nos” biba na armonia cu e camindanan di Dios. (2 Cor. 5:14) Ademas, hopi bes E Toren di Vigilancia ta enfatisá nos obligacion di predicá. Nos Ministerio di Reino continuamente ta duna instruccion en cuanto con pa haci e trabou di predicá. E ancianonan ta organisá e trabou i ta animá nos pa participá den dje. Otro publicadónan ta invitá nos pa sali huntu cu nan den e ministerio. Nos ta tende hopi tocante prepará nos presentacionnan, ofrecé revista i otro literatura, haci rebishita, conducí studio di Bijbel i usa tur oportunidad pa duna testimonio. Tur esaki ta yuda nos logra e meta di salba bida.—1 Cor. 9:22, 23; Efe. 1:13.