Nos por Hasi Loke Yehova Ta Pidi
1 Kumpli ku Yehova su lei- i prinsipionan ta e mihó manera di biba awe, i esaki ta yuda nos pone un bon fundeshi pa un futuro eterno. (Sal. 19:7-11; 1 Tim. 6:19) Sin embargo, e mundu di Satanas ta pone nos bou di hopi strès. Nos propio karni pekaminoso ta hasi e situashon pió. Den nos esfuerso pa kumpli ku nos responsabilidatnan bíbliko, tin biaha nos por sinti nos bou di demasiado preshon. (Sal. 40:12; 55:1-8) Kisas nos asta ta puntra nos mes si nos por hasi tur loke Yehova ta pidi di nos. Kiko por yuda nos mantené nos balansa spiritual na e momentunan ei?
2 Yehova Su Mandamentunan No Ta Pisá: Nunka Yehova ta eksigí kosnan irasonabel for di nos. Su mandamentunan no ta pisá, mas bien nan ta pa nos mes bon. (Deu. 10:12, 13; 1 Juan 5:3) E ta tene kuenta ku nos debilidatnan humano, i “ta kòrda ku ta stòf nos ta.” (Sal. 103:13, 14) Nos ta hasi nos máksimo esfuerso pa sirbi Dios. I komo un Dios miserikòrdioso, Yehova ta aseptá e esfuersonan aki asta si nan ta limitá dor di nos sirkunstansianan. (Lev. 5:7, 11; Mar. 14:8 ) E ta invitá nos pa tira nos karga riba dje, i e ta sigurá nos ku lo e hasi posibel ku nos por keda fiel.—Sal. 55:22; 1 Kor. 10:13.
3 Perseveransia Ta Nesesario: Relatonan di Beibel tokante personanan ku a keda fiel manera Elias, Jeremias i Pablo ta mustra dikon perseveransia ta nesesario. (Heb. 10:36) Yehova a sostené nan den tempu di difikultat i desanimashon. (1 Rei. 19:14-18; Jer. 20:7-11; 2 Kor. 1:8-11) E lealtat di nos rumannan den tempu moderno tambe ta stimulá nos. (1 Ped. 5:9) Meditashon riba e ehèmpelnan ei por yuda nos pa nos no desanimá.
4 Speransa den e promesanan di Dios ta “un anker di e alma.” (Heb. 6:19) Ta speransa a motivá Abraham ku Sara pa kumpli ku Yehova su petishon pa bandoná nan kas i bai “biba komo stranhero den e tera di promesa.” Speransa a fortalesé Moisés pa sin miedu e tuma un posishon na banda di adorashon berdadero. Speransa a fortifiká Hesus pa soportá e staka di tormento. (Heb. 11:8-10, 13, 24-26; 12:2, 3, NW) Si nos laga e promesa di Dios tokante un hustu mundu nobo sigui bria den nos kurason, nos tambe lo keda firme.—2 Ped. 3:11-13.
5 Loke tambe por duna nos vigor den nos sirbishi ta si nos kòrda riba nos propio obranan di pasado ku a reflehá lealtat, sakrifisio propio i kurashi. (Heb. 10:32-34) Esaki ta laga nos kòrda e goso ku nos ta sinti ora nos duna Yehova loke e ta pidi di nos: nos deboshon di henter alma.—Mat. 22:37.
[Study Questions]
1. Ki sintimentunan nos lo tin ku lucha kuné de bes en kuando, i kon bin?
2. Den ki manera Yehova ta rasonabel den loke e ta ferwagt di nos?
3. Kon Yehova ta fortalesé nos pa nos por perseverá?
4. Pakiko ta importante pa keda kòrda riba e promesanan di Dios?
5. Dikon e por ta un animashon pa reflekshoná riba nos propio obranan di lealtat di pasado?