Imitá e Aktitut di Hesus
1 Ounke nunka nos a mira e Yu di Dios, mediante e registro skirbí di e bida i sirbishi di Hesus, nos a siña stim’é di bèrdat. (1 Ped. 1:8) Kumpliendo ku e boluntat di su Tata, el a bandoná su posishon elevá den shelu i a bini na tera. Komo hende, e no tabata egoista i a sirbi otronan i despues a duna su bida na fabor di humanidat. (Mat. 20:28) Dios su Palabra ta urgi nos: “Laga tin den boso e aktitut aki ku tabatin tambe den Kristu Hesus.” Kon nos por imitá su spiritu di sakrifisio propio?—Fil. 2:5-8.
2 Ora E Tabata Kansá: Ounke Hesus tabata perfekto tòg el a kansa. Na un okashon ora ku e tabata “kansá di su biahe,” el a duna testimonio kabal na un muhé samaritano. (Juan 4:6) Hopi kristian awe ta haña nan ku e mesun desafio. Despues di un siman duru di trabou, por ta difísil pa haña e fortalesa pa bai prediká. Sin embargo, si nos ta hasi esei regularmente, nos lo ripará ku e sirbishi kristian ta refreská nos spiritualmente.—Juan 4:32-34.
3 Na un otro okashon Hesus i su disipelnan tabata rumbo pa un lugá solitario pa nan por sosegá un ratu. Sin embargo, un multitut grandi a haña sa esei i a kore bai nan dilanti pa topa ku nan. En bes di rabia, Hesus a “sinti kompashon pa nan” i el a kuminsá “siña nan hopi kos.” (Mar. 6:30-34) Pa nos por kuminsá i kondusí studio di Beibel nos mester tin e mesun aktitut. E ta rekerí esfuerso persistente i berdadero amor pa hende. Si aktualmente bo no ta kondusiendo un studio di Beibel, no stòp di purba haña unu.
4 Pone Interesnan Spiritual na Promé Lugá: E trabou di pionero ousiliar por yuda nos konsentrá mas riba aktividatnan spiritual. Un ruman muhé hóben a skirbí: “Mama di un di mi amiganan a animá nos tur dos pa traha pionero ousiliar huntu kuné pa un luna. Mi ta mashá kontentu ku nos a djòin e. Mi tabatin e goso di por a konosé e rumannan mihó, i no a dura mashá ku nan tabata manera mi famia. Un kos mas ku mi a gusta ta ku mi tabatin mas oportunidat pa papia ku otro hende tokante Yehova i siña nan e bèrdatnan maravioso di e Reino. Tur e kosnan aki a laga mi sinti mi mas serka di Yehova i su organisashon.”—Sal. 34:8.
5 Nos tur ta konfrontá e lucha ku tin entre nos karni imperfekto i nos deseo di agradá Yehova. (Rom. 7:21-23) Nos tin ku resistí e aktitut di mundu di no ke kansa nan kurpa ni hasi esfuerso. (Mat. 16:22, 23) Mediante su spiritu santu, Yehova por yuda nos pa nos tin éksito. (Gal. 5:16, 17) Segun ku nos ta spera nos liberashon pa drenta Dios su hustu mundu nobo, laga nos imitá e aktitut di Hesus dor di pone e interesnan di Reino i interes di otro hende riba nos mes interesnan.—Mat. 6:33; Rom. 15:1-3.
[Study Questions]
1. Ki aktitut Hesus a desplegá?
2. Ki desafio hopi kristian ta konfrontá i kiko por yuda nan vens’é?
3. Kon nos por imitá Hesus su aktitut di ta dispuesto pa siña otro hende?
4. Kon e trabou di pionero ousiliar por yuda nos imitá e aktitut di Kristu?
5. Dikon nos tin ku hasi esfuerso kontinuamente pa imitá e aktitut di Hesus?