Un Meta Ekselente pa e Aña di Sirbishi Nobo
1 Si nos ke progresá spiritualmente, nos tin ku pone meta. Ki metanan personal bo a pone pa e aña di sirbishi nobo? Un meta ekselente ta pa traha pionero ousiliar ún òf mas luna. Normalmente e aktividat gososo aki ta rekerí algun planiamentu, pues awor ta e tempu apropiá pa kuminsá pensa riba dje. Pakiko pone e trabou di pionero ousiliar komo meta?
2 Motibunan pa Traha Pionero Ousiliar: E trabou di pionero ousiliar ta yuda nos agradá nos Tata selestial mas plenamente ya ku nos ta dediká mas tantu tempu den sirbishi. (1 Tes. 4:1) Ora nos pensa riba tur e kosnan ku Yehova a hasi pa nos, nos kurason ta motivá nos pa konta otronan tokante dje. (Sal. 34:1, 2) Yehova ta opservá i ta apresiá e sakrifisionan ku kada un di nos ta hasi pa por partisipá mas den sirbishi. (Heb. 6:10) E echo ku nos sa ku nos trabou duru ta hasi Yehova kontentu, ta duna nos hopi goso.—1 Kró. 29:9.
3 Generalmente, mas bo hasi algu, mas fásil e ta bira pa bo i mas bo ta disfrutá di dje. Dor di dediká mas tempu den sirbishi, lo bo tin mas konfiansa ora bo ta prediká di kas pa kas. Lo bo bira mas ábil den kuminsá kòmbersashon i den usa Beibel. Mas bo papia tokante bo fe, mas fuerte lo e bira. Hopi ruman ku no tabatin un estudio di Beibel a logra kuminsá unu durante ku nan tabata traha komo pionero ousiliar.
4 E trabou di pionero ousiliar por sirbi tambe komo e estímulo nesesario pa saka un persona for di un rutina spiritual monótono. Un eks-pionero regular ku a sinti ku e tabata duna muchu importansia na su trabou a disidí di traha pionero ousiliar pa un luna. El a bisa: “Mi a keda sorprendí kuantu e luna ei a stimulá mi spiritualmente! Mi a regla mi kosnan pa mi por a sigui traha pionero ousiliar, i esei a pone ku mi a bira pionero regular atrobe.”
5 Vense Opstákulo: Algun ruman kisas ta vasilá pa yena e formulario pa traha pionero ousiliar pasobra nan ta pensa ku nan no tin bon abilidat pa prediká. Si ta esaki ta tene bo atras, Yehova por yuda bo meskos ku el a yuda Jeremias. (Jer. 1:6-10) Ounke Moisés ‘no por a papia bon i su lenga tabata pisá,’ Yehova a us’é pa kumpli ku Su propósito. (Eks. 4:10-12) Si bo ta sinti ku bo no ta sufisiente kapasitá, pidi Yehova kurashi.
6 Bo ta vasilá pa yena e formulario debí na problema ku salú òf pa motibu ku bo ta hopi okupá? Si bo tin problema ku salú, un programa ku ta pas ku bo sirkunstansia lo por yuda bo traha pionero ousiliar na un paso trankil. Si bo ta un persona hopi okupá, podisé bo por skùif algun aktividat ku no ta dje importante ei pa un otro luna. Algun ruman ku ta traha fultaim a logra saka tempu pa traha pionero ousiliar dor di tuma un òf dos dia di fakansi.—Kol. 4:5.
7 Kon pa Hasié: Papia ku Yehova den orashon tokante bo deseo. Pidi Yehova bendishoná bo esfuersonan pa ekspandé bo ministerio. (Rom. 12:11, 12) E por yuda bo tuma desishonnan sabí relashoná ku e manera pa ahustá bo programa. (Sant. 1:5) Si bo no tin e deseo pa hasié, pidi Yehova yuda bo haña goso den e trabou di prediká.—Luk. 10:1, 17.
8 Papia komo famia tokante e meta pa traha pionero ousiliar. (Pro. 15:22) Podisé un miembro di famia por traha pionero ousiliar ku e apoyo di e otronan. Papia tokante bo deseo pa traha pionero ku otronan den e kongregashon, spesialmente ku esnan ku ta den e mesun sirkunstansia ku bo. Esaki lo por produsí mas entusiasmo pa e trabou di pionero ousiliar.
9 Ora bo repasá bo programa di aktividatnan teokrátiko pa e aña di sirbishi nobo, ki luna lo bo por traha pionero ousiliar? Si bo ta traha fultaim òf bo ta bai skol, kisas lo bo por pensa riba e lunanan ku tin dia liber òf ku tin sinku djasabra òf djadumingu. Por ehèmpel, sèptèmber, desèmber, mart i ougùstùs tin sinku fin di siman kompletu. Luna di mei tin sinku djasabra i yüni tin sinku djadumingu. Si bo tin problema ku salú, pensa riba e lunanan ku normalmente tin bon wer. Kisas bo ke plania tambe pa traha pionero durante e luna ku e superintendente di sirkuito ta programá pa sirbi boso kongregashon. Durante su bishitá lo bo tin e privilegio adishonal di por asistí na e promé mitar di e reunion ku e tin ku e pioneronan regular. Siendo ku e próksimo Memorial ta kai riba 22 di mart, e lunanan di mart, aprel ku mei ta hopi bon pa traha pionero. Unabes bo a skohe e luna òf lunanan ku bo ke traha pionero ousiliar, kuminsá pone riba papel un programa ku lo yuda bo kumpli ku e rekisito di ora.
10 Asta si bo ta sinti ku bo no por traha pionero ousiliar durante e aña di sirbishi binidero, tòg bo por mantené bo spiritu di pionero. Sigui hasi tur loke bo por den sirbishi, ku e konfiansa ku Yehova ta keda kontentu ora bo ta hasi esfuerso di henter bo alma pa dun’é lo mihó. (Gal. 6:4) Tambe bo por apoyá i animá esnan ku sí ta traha pionero ousiliar. Kisas asta bo por ahustá bo programa pa traha den sirbishi un dia èkstra den siman huntu ku nan.
11 Yehova su pueblo ta komprondé e urgensia di nos tempu. Nos tin un trabou pa kumpli kuné, esta, e predikashon di e bon nobo. Bida di hende ta enbolbí, i no a keda muchu tempu. (1 Kor. 7:29-31) Amor pa Dios i pa próhimo lo motivá nos pa hasi tur loke nos por den e ministerio. Ku esfuerso i bon planiamentu, kisas lo bo por traha pionero ousiliar por lo ménos ún luna durante e aña di sirbishi nobo. Esei ta un meta ekselente!
[Study Questions]
1. Ki meta nos por pensa riba dje pa e aña di sirbishi nobo?
2. Pakiko pone e trabou di pionero ousiliar komo meta?
3, 4. Kon e trabou di pionero ousiliar ta benefisiá nos?
5. Kon nos lo por vense e sintimentu ku nos no ta sufisiente kapasitá?
6. Kon lo ta posibel pa traha pionero apesar di problema ku salú òf un programa hopi okupá?
7. Dikon ta bon pa nos hasi e sirbishi di pionero ousiliar un asuntu di orashon?
8. Kon aplikashon di Proverbionan 15:22 lo por yuda bo traha pionero ousiliar?
9. Kua lunanan lo bo por skohe pa traha pionero ousiliar?
10. Kiko bo por hasi si bo no por traha pionero ousiliar?
11. Dikon nos mester sinti ku e tempu ta urgente?