E Angelnan Ta Yuda Nos
1 “Mira, mi ta ku boso semper, te na fin di mundu.” E palabranan aki ta realmente un animashon pa tur esnan ku ta hasi kaso di e mandamentu di Hesus ku ta bisa: ‘Bai i hasi disipel.’ (Mat. 28:18-20) Un manera importante ku Hesus ta ku kristiannan berdadero, ta mediante su angelnan. (Mat. 13:36-43) Ta ki emoshonante pa deklará e “evangelio eterno” simultáneamente i den armonia ku e kriaturanan selestial fiel aki!—Rev. 14:6, 7.
2 Den Nos Sirbishi: Beibel ta revelá ku e angelnan ta mandá “pa sirbi esnan ku lo heredá salbashon.” (Heb. 1:14) Den promé siglo, e angelnan a yuda guia e siguidónan di Hesus pa nan alkansá esnan ku ta digno. (Echo. 8:26) Awendia tambe sirbidónan di Dios ta mira evidensia di guia angelikal. Tabatin hopi okashon ku doñonan di kas a bisa ku nan tabata resa pidiendo yudansa ora ku un Testigu a bishitá nan. Tantu nos komo e angelnan ta keda masha kontentu ora personanan asina ta reakshoná riba e mensahe di Reino!—Luk. 15:10.
3 Enfrentando Persekushon: Daniel i su tres hóben kompañeronan hebreo, apòstel Pedro i hopi otro persona ku a haña nan ku pruebanan severo a eksperensiá Yehova su protekshon mediante su angelnan ku ta “poderoso den fortalesa.” (Sal. 103:20; Dan. 3:28; 6:21, 22; Echo. 12:11) De bes en kuando, nos por sinti nos indefenso ora nos haña nos ku oposishon. Sin embargo, e eksperensia di e sirbidó di Eliseo, ora el a haña sa ku “esnan ku ta ku nos ta mas ku esnan ku ta ku nan,” por ta un gran animashon pa nos. (2 Rei. 6:15-17) Ounke por sosodé ku fuera di nos boluntat nan separá nos for di nos rumannan, nos no tin nodi desesperá. E Palabra di Dios ta sigurá nos: “E angel di SEÑOR ta kampa rònt di esnan ku ta tem’É.”—Sal. 34:7.
4 Lo no dura mashá ku ehérsitonan angelikal lo sali pa eliminá tur ku ta oponé e reinado di Kristu. (Rev. 19:11, 14, 15) Miéntras nos ta spera riba e dia ei, laga nos sigui alabá Yehova ku kurashi i ku pleno konfiansa ku nos tin e yudansa poderoso di e ehérsitonan selestial bou di mando di Kristu.—1 Ped. 3:22.