Sugerensianan pa Presentá Dios Realmente Ta Interesá den Nos?
Despues di menshoná un notisia trágiko lo bo por bisa:
“Bo a yega di puntra bo mes dikon Dios ta permití hende sufri si realmente e ta interesá den nos? [Permití e persona kontestá.] E foyeto aki ta kontestá e pregunta ei di un manera satisfaktorio i ta mustra kiko Dios lo hasi den futuro serkano. [Mustr’é e plachinan na página 27, i lesa Salmo 145:16 for di paragraf 22.] Kon Dios lo eliminá tur e sufrimentu ku humanidat a pasa aden? Lo mi kier a konsiderá e pregunta ei e siguiente biaha ku mi bin.” Ofresé e foyeto, i hasi areglo pa bolbe bèk.
Ora di hasi e rebishita, lo bo por bisa:
“Biaha pasá ku mi a bishita bo, nos a lesa e teksto aki. [Lesa òf sita Salmo 145:16.] Despues mi a hasi e pregunta: Kon Dios lo eliminá tur e sufrimentu ku humanidat a pasa aden?” Laga e persona buska su foyeto. Kaba bai na página 27-8, i konsiderá paragraf 23-5. Ofresé un estudio di Beibel, òf hasi areglo pa konsiderá paragraf 26 i 27 n’e siguiente bishita.
Un publikadó teenager lo por bisa:
“Hopi hóben di mi edat ta preokupá kon mundu lo ta aki 10 òf 15 aña. Kon abo ta kere ku bida lo ta n’e tempu ei? [Permití e persona kontestá.] E problemanan ku nos ta mira awe ta indiká ku nos ta bibando den e último dianan. [Lesa 2 Timoteo 3:1-3.] E foyeto aki ta kontestá e siguiente preguntanan. [Lesa e preguntanan riba e portada, i ofresé e foyeto.] Si bo tin un par di minüt e siguiente biaha ku mi bin, lo mi ke papia ku bo riba un pensamentu positivo enkuanto fin di malesa i behes.” Hasi areglo pa bolbe bèk.
Ora bo bolbe bèk, lo bo por bisa:
“E último biaha ku nos a kòmbersá, mi a bisa ku lo mi ke papia ku bo tokante fin di malesa i behes. E punto ei ta ser menshoná den e foyeto aki.” Laga e persona buska su foyeto. Kaba lesa i konsiderá paragraf 6 i 7 na página 23-4. Hasi areglo pa konsiderá paragraf 8 i 9 n’e siguiente bishita.
Ora di traha ku un mucha, e adulto lo por introdusí nan tur dos i bisa:
“Ku bo permiso, ________ lo kier a lesa un teksto bíbliko pa bo. [E mucha ta lesa Salmo 37:29 i ta duna un komentario breve.] E foyeto aki ta mustra kon Dios lo kumpli ku su propósito pa hende i e tera. [Mustr’é e plachinan na página 24-7.] Ora nos bolbe bèk, lo mi ke mustra bo loke Beibel ta bisa tokante e maravioso promesa di resurekshon.” Ofresé e foyeto, i hasi areglo pa bolbe bèk.
Ora di hasi e rebishita, e adulto lo por bisa:
“Biaha pasá, nos a lesa Salmo 37:29 i mi a menshoná ku lo mi ke mustra bo kiko Beibel ta bisa tokante resurekshon. Wak kiko e foyeto ta bisa akinan.” Laga e persona buska su foyeto. Kaba konsiderá paragraf 12-14 na página 24-5. Ofresé un estudio di Beibel, òf hasi areglo pa konsiderá paragraf 15 i 16 n’e siguiente bishita.