Usa Beibel Ábilmente
1. Dikon Beibel ta asina útil?
1 Ora nos usa Dios su Palabra inspirá, esei ta yuda nos proklamá i siña otro hende e bèrdat na un manera kla i tambe desenmaskará siñansa falsu i tradishon di hende.—2 Tim. 2:15; 1 Ped. 3:15.
2. Kiko lo yuda nos bira mas ábil den haña teksto di Beibel?
2 Familiarisá Bo Mes ku Beibel: Meskos ku ora bo ta usa kualke hèrmènt, mas bo us’é, mas ábil bo ta bira. Ora bo lesa henter e Beibel, esei ta duna bo un idea kiko e tema sentral di Beibel ta. Esaki ta yuda bo tambe pa kòrda teksto di Beibel i pa haña nan mas lihé. Segun ku bo ta familiarisá bo mes mihó ku e Skritura, lo bo papia ku mas entusiasmo i konvikshon ora bo ta duna testimonio informal i tambe ora bo ta prediká den sirbishi di vèlt.—1 Tes. 1:5.
3, 4. (a) Kua ta algun manera ku nos por familiarisá nos mes mihó ku Beibel? (b) Abo a yega di usa otro manera pa familiarisá bo mes mihó ku e Skritura?
3 Hasié un kustumber pa habri bo Beibel i sigui e oradó ora e ta lesa teksto durante reunion di kongregashon. Durante bo estudio personal i preparashon pa reunionnan di kongregashon, buska e tekstonan menshoná i meditá riba nan aplikashon. Hopi publikadó ta haña ku ora nan lesa teksto direktamente for di Beibel en bes di les’é riba kòmpiuter òf for di un printout, esei ta yuda nan haña e tekstonan mas lihé ora nan ta den sirbishi.—Juan 14:26.
4 Tin famia ta apartá tempu pa siña teksto di Beibel for di kabes. Pa hasi esaki, nan por usa karchi òf papel chikitu ku ta menshoná e teksto bíbliko na un banda i na e otro banda e sita. Tur ta haña un turno pa wak si nan ta kòrda sea kiko e teksto di Beibel ta bisa òf kua teksto ta bisa loke tin skirbí riba e karchi. Loke tambe ta yuda nos bira mas ábil ta ora nos ta praktiká presentashonnan pa sirbishi di vèlt i ta usa Beibel pa kontestá un hende ku bini ku un opheshon òf pregunta.
5. Dikon nos ke bira mas ábil den usa nos Beibel?
5 Beibel ta mas balioso ku kualke otro buki. Ta Beibel so por duna hende “sabiduria ku ta hiba na salbashon.” (2 Tim. 3:15) Ya ku mayoria di hende den nos teritorio no konosé e tesoronan presioso ku tin den Beibel, nos tin bon motibu pa bira mas ábil den mustra nan loke Beibel realmente tin di ofresé.—Pro. 2:1-5.