Referensia pa Material i Tarea pa Reunion Nos Bida i Sirbishi Kristian

Referensia pa Material i Tarea pa Reunion Nos Bida i Sirbishi Kristian

8-14 DI SÈPTÈMBER

TESORO DI E PALABRA DI DIOS | PROVERBIONAN 30

“No Laga Mi Ta Pober Ni Riku”

w11-S 1/6 10 §3

Kon pa Biba di Akuerdo ku Loke Bo Tin

Spar promé ku bo kumpra algu. Aunke e konseho ei por parse antikuá, e ta un di e mihó maneranan pa evitá problema finansiero. E konseho ei ta yuda hopi hende evitá debe i tur e konsekuensianan ku ta bini kuné, manera interes haltu ku ta hasi tur loke un persona kumpra mas karu. Beibel ta deskribí vruminga komo un bestia “sabí,” pasobra “nan ta buska i warda kuminda den tempu di kosecha” pa nan por usa despues.—Proverbionan 6:6-8; 30:24, 25.

15-21 DI SÈPTÈMBER

TESORO DI E PALABRA DI DIOS | PROVERBIONAN 31

Loke Nos Por Siña for di un Mama Su Konseho na Su Yu

w11-S 1/2 19 §7-8

Siña Bo Yunan Norma i Balor

Siña bo yunan e bèrdat kompleto tokante di sèks. Ta bèrdat ku bo tin ku spièrta bo yunan tokante di e peligernan di sèks. (1 Korintionan 6:18; Santiago 1:14, 15) Pero no lubidá ku Beibel ta bisa ku sèks ta un regalo di Dios i no un trampa di Satanas. (Proverbionan 5:18, 19; Kantika di Sálomon 1:2) Si bo konta bo yunan solamente tokante di e peligernan di sèks, bo por duna nan un punto di bista robes tokante di sèks, ku no ta kuadra ku loke Beibel ta bisa. Corrina, un señora yòn di Fransia, a bisa: “Mi mayornan a pone hopi énfasis riba inmoralidat seksual. Anto esei a laga mi haña un aktitut negativo relashoná ku sèks.”

Hasi sigur ku bo ta siña bo yunan e bèrdat kompleto tokante di sèks. Nadia, un mama na México, a bisa: “Loke semper mi a purba di yuda mi yunan tiner komprondé ta ku sèks ta un regalo bunita i natural ku Yehova Dios a duna na hende pa nan por disfrutá di dje. Pero, e ta un regalo solamente pa parehanan kasá. Sèks por trese felisidat òf sufrimentu, ta dependé kon nos ta us’é.”

29 DI SÈPTÈMBER–5 DI ÒKTOBER

TESORO DI E PALABRA DI DIOS | EKLESIÁSTES 3-4

Hoya Spiritual

it-S “Amor” §39

Stima

“Tempu pa Stima.” E úniko hendenan na ken amor no ta ser demostrá ta na esnan ku Yehova indiká ku no meresé esei, òf na esnan ku ta determiná pa sigui hasi loke ta malu. Pues, amor ta ser demostrá na tur hende; pero si nan mustra ku nan ta hende ku ta odia Dios, amor no ta ser demostrá na nan mas. Tantu Yehova komo Hesus ta stima hustisia i ta odia maldat. (Sl 45:7; Heb 1:9) No mester demostrá amor na hende ku ta odia e Dios berdadero intensamente. No tin motibu pakiko sigui demostrá amor na e tipo di hendenan ei, pasobra hende ku ta odia Dios lo no reakshoná riba Dios su amor. (Sl 139:21, 22; Isa 26:10) Pa e motibu ei, Dios ta odia nan, i e tin un tempu pa tuma akshon kontra nan.—Sl 21:8, 9; Ekl 3:1, 8.

13-19 DI ÒKTOBER

TESORO DI E PALABRA DI DIOS | EKLESIÁSTES 7-8

“Bai un Kas Kaminda Hende Ta na Luto”

it-S “Duelo” §9

Na Luto

Un Tempu pa Ta na Luto. Eklesiástes 3:1 i 4 ta bisa ku tin “tempu pa yora i tempu pa hari; tempu pa lamentá i tempu pa baila.” Komo ku henter humanidat ta mortal, e kurason di un persona sabí ta “na un kas kaminda hende ta na luto” en bes di na un kas kaminda tin fiesta. (Ekl 7:2, 4; kompará ku Pro 14:13.) Pues, un persona sabí ta usa e oportunidat pa mustra simpatia i duna konsuelo en bes di laga e oportunidat ei pasa bai pa e disfrutá di plaser. Esei lo yud’é kòrda kon kòrtiku bida ta i e importansia di tin un bon amistat ku su Kreador.