Kon Hesus A Santifiká i Vindiká Yehova Su Nòmber?

1-2. (a) Kiko Hesus a hasi riba e anochi promé ku e muri? (b) Kiko nos lo wak den e artíkulo akí?

TABATA 14 di nísan di aña 33, un djaweps anochi. Hesus tabata sa ku djis Hudas lo a traishon’é, ku su enemigunan lo a bai tortur’é i mat’é. Hesus a kaba di tene e Sena di Señor den un kamber ariba huntu ku su fiel apòstelnan. Despues di e sena ei el a duna nan algun palabra di animashon. Anto promé ku nan sali, Hesus a hasi un orashon masha importante. Apòstel Huan a skirbi e orashon ei na Huan kapítulo 17.

² Kon e orashon di Hesus ta yuda nos komprondé loke a preokup’é na e momento ei? Kon e orashon ei ta mustra nos loke tabata mas importante p’e ora e tabata riba tera? Ban wak.

“MI A HASI BO NÒMBER KONOSÍ NA E HENDENAN”

3. Kiko Hesus a menshoná dos biaha den su orashon, i kiko e tabata ke men? (Huan 17:​6, 26)

³ Den su orashon Hesus a bisa Yehova: “Mi a hasi bo nòmber konosí na nan.” Ta bisto ku esei tabata algu importante p’e pasobra el a menshon’é dos biaha. (Lesa Huan 17:​6, 26.) Pero kiko Hesus tabata ke men? Akaso e mester a splika su disipelnan ku Dios yama Yehova? Nò. Nan tabata hudiu i tabata sa esei kaba. E nòmber ei ta den e Skritura Hebreo kasi 7.000 biaha. Pues, loke Hesus tabata ke men ta ku el a siña su disipelnan e klase di Dios ku Yehova ta. El a yuda nan konosé Yehova mihó, esta, Su personalidat, propósito-, aktividat- i kualidatnan. Anto no tabatin niun otro persona ku por a hasi esei mihó ku Hesus.

4-5. (a) Duna un ehèmpel ku ta mustra kon un nòmber por bin nifiká mas pa un hende. (b) Kon e nòmber di Yehova a bin nifiká mas pa e disipelnan di Hesus?

⁴ Ban ilustrá esaki. Suponé ku tin un ansiano den bo kongregashon ku yama David, i e ta un siruhano. Bo konosé e ruman ei pa hopi tempu. Pero riba un dia bo ta bira hopi malu i bo mester bai hospital ku urgensia. Na e hospital, e ansiano ku ta siruhano a operá bo i salba bo bida. Djei padilanti, bo stima e ruman ei mas ku promé. Anto kada biaha ku bo tende su nòmber mesora ta bini na bo mente loke el a hasi pa bo. Awor su nòmber ta nifiká mas pa bo. David ta e mesun ansiano ku bo konosé pa años, pero awor e ta tambe e dòkter ku a skapa bo bida.

⁵ Asina tambe e disipelnan di Hesus tabata sa ku Dios yama Yehova. Pero danki na Hesus su sirbishi aki riba tera, e nòmber ei a bin nifiká mas pa nan. Hesus a imitá su Tata den tur loke el a bisa i hasi. Pues na e manera ku Hesus a trata hende i siña nan, su disipelnan a “siña konosé” su Tata mas mihó.—Huan 14:9; 17:3.

“BO NÒMBER KU BO A DUNA MI”

6. Den ki sentido Yehova a duna su nòmber na Hesus? (Huan 17:​11, 12)

⁶ Refiriendo na su disipelnan, Hesus a pidi Yehova den e orashon: “Protehá nan pa motibu di bo nòmber ku bo a duna mi.” (Lesa Huan 17:​11, 12.) Dikon Hesus a bisa “bo nòmber ku bo a duna mi”? Di promé, Hesus a representá Yehova i a papia p’e. El a bin den nòmber di su Tata i a hasi milager den e nòmber ei. (Huan 5:43; 10:25) Di dos, e nòmber Hesus ta nifiká “Yehova Ta Salbashon.” Pues manera nos ta mira, nifikashon di Hesus su nòmber tin Yehova su nòmber den dje.

7. Dikon Hesus por a papia den nòmber di Yehova? Duna un ehèmpel.

⁷ Pa yuda nos komprondé mihó, ban wak un ehèmpel. Un gobernante por nombra un hende komo su embahador i dun’é outoridat pa papia den su nòmber. For di e momento ei, e palabranan di e embahador tin e mesun peso ku esnan di e gobernante. Di mes manera, Yehova a nombra Hesus komo su representante i a dun’é outoridat pa papia den Su nòmber.—Mat. 21:9; Luk. 13:35.

8. Dikon nos por bisa ku Hesus a hasi tur kos den nòmber di su Tata asta promé ku el a bin na tera? (Éksodo 23:​20, 21)

⁸ Beibel ta bisa ku Hesus ta “e Palabra” pasobra Yehova a us’é pa duna instrukshon i informashon na angel i hende. (Huan 1:​1-3) Probablemente e tabata e angel ku Yehova a manda pa protehá i guia e israelitanan durante e tempu ku nan tabata den desierto. Ora Yehova a bisa nan pa obedesé e angel ei, e di: “Pasobra loke e ta hasi, e ta hasi den mi nòmber.”a (Lesa Éksodo 23:​20, 21.) Ku e palabranan ei Yehova a indiká ku Hesus ta represent’é. Hesus ta e persona prinsipal ku ta defendé i santifiká nòmber di su Tata.

“TATA, GLORIFIKÁ BO NÒMBER”

9. Kon nos sa ku e nòmber di Yehova tabata nifiká hopi pa Hesus?

⁹ Manera nos por a mira, asta promé ku Hesus a bini na tera, Yehova su nòmber tabata nifiká hopi p’e. Anto ora e tabata aki riba tera el a demostrá esei den tur loke el a hasi. Kasi na final di su sirbishi aki riba tera, el a pidi Yehova: “Tata, glorifiká bo nòmber.” Mesora su Tata a kontest’é ku un stèm fuerte for di shelu: “Mi a glorifik’é, i lo mi bolbe glorifik’é.”—Huan 12:28.

10-11. (a) Kon Hesus a glorifiká Yehova su nòmber? (Wak e plachi.) (b) Dikon mester santifiká i vindiká Yehova su nòmber?

¹⁰ Hesus tambe a glorifiká nòmber di su Tata. Kon asina? Un manera ku el a hasi esei ta di bisa otro hende kon maravioso Yehova ta i e kosnan impreshonante ku el a hasi. Pero Hesus a hasi mas ku esei, el a santifiká Yehova su nòmber i a vindiká su reputashon.b El a demostrá kon importante esei tabata ora el a siña su disipelnan kon pa hasi orashon. El a bisa: “Nos Tata ku ta den shelu, bo nòmber sea santifiká.”—Mat. 6:9.

¹¹ Dikon mester santifiká i vindiká Yehova su nòmber, òf reputashon? Den e hòfi na Éden, Satanas a daña Yehova su reputashon. El a insinuá ku Yehova tabata un gañadó i ku Yehova a keda sin duna Ádam ku Eva algu ku lo tabata bon pa nan. (Gén. 3:​1-5) Di e manera ei, el a indiká ku Yehova no ta hasi kosnan na e manera korekto. Debí na Satanas su mentiranan, hende por pensa ku Yehova ta un mal Dios. Mas despues den tempu di Yòb, Satanas a para ariba ku hende ku skohe pa sirbi Yehova ta hasi esei djis pasobra Yehova ta bendishoná nan. E gañadó ei a bisa tambe ku hende no ta stima Yehova di bèrdat te pa nan keda fiel na dje bou di prueba. (Yòb 1:​9-11; 2:4) Tempu lo a mustra ken ta e gañadó, Yehova òf Satanas.

“MI TA ENTREGÁ MI ALMA”

12. Kiko Hesus tabata dispuesto pa hasi pasobra e tabata stima Yehova su nòmber?

¹² Hesus tabata stima Yehova asina tantu ku e tabata dispuesto pa muri pa santifiká i vindiká Yehova su nòmber.c (Huan 10:​17, 18) Ádam ku Eva, e promé dos hendenan ku tabata perfekto, a desobedesé Yehova i a bai tras di Satanas. Pero Hesus di otro banda tabata dispuesto pa bini akí riba tera pa mustra kuantu e tabata stima Yehova. Hesus a hasi esaki dor di keda fiel na Yehova den tur kos. (Heb. 4:15; 5:​7-10) El a keda fiel na Yehova te na morto. (Heb. 12:2) Di e manera ei, el a mustra ku e stima Yehova i Su nòmber.

13. Dikon Hesus tabata e mihó persona pa proba ku Satanas ta un gañadó? (Wak e plachi.)

¹³ E manera ku Hesus a hiba henter su bida a proba ku ta Satanas ta e gañadó i no Yehova! (Huan 8:44) No tin un persona ku konosé Yehova mihó ku Hesus. P’esei, si tabatin algu di bèrdat den Satanas su akusashonnan kontra Yehova, Hesus sigur lo mester a sa esei. Pero Hesus semper tabata determiná pa defendé Yehova su reputashon, òf nòmber. Asta ora Yehova a kita su protekshon for di Hesus, Hesus a preferá di muri ku bira lomba pa su Tata.—Mat. 27:46.d

“MI A . . . KABA KU E TRABOU KU BO A DUNA MI”

14. Kon Yehova a rekompensá Hesus pa su fieldat?

¹⁴ Den Hesus su orashon e anochi promé ku el a muri, el a bisa: “Mi a . . . kaba ku e trabou ku bo a duna mi pa hasi.” Hesus tabata konvensí ku Yehova lo a rekompens’é pa su fieldat. (Huan 17:​4, 5) I e no tabata robes pa kere esei. Yehova no a lag’é den graf. (Echo. 2:​23, 24) El a resusit’é i a dun’é un puesto mas haltu den shelu. (Flp. 2:​8, 9) Ku tempu, Hesus a kuminsá goberná komo Rei di e Reino di Dios. Kiko e Reino ei lo logra? Hesus a splika esei ora el a siña nos pa pidi Yehova: “Laga bo Reino bini. Laga bo [Yehova su] boluntat sosodé, meskos ku den shelu, tambe riba tera.”—Mat. 6:10.

15. Kiko mas Hesus lo hasi?

¹⁵ Umbes akí na Armagedon, Hesus lo bringa kontra Dios su enemigunan i destruí hende malbado. (Rev. 16:​14, 16; 19:​11-16) Anto mesora despues, lo e benta Satanas den “abismo,” kaminda lo e ta prezu i lo no por hasi nada. (Rev. 20:​1-3) Durante e Reinado di Mil Aña, Hesus lo restorá pas riba tera i hasi humanidat perfekto atrobe. Lo e lanta e mortonan i hasi e tera un paradeis. I por fin Yehova su boluntat lo ser kumplí!—Rev. 21:​1-4.

16. Kon bida lo ta despues di e Reinado di Mil Aña?

¹⁶ Anto kon bida lo ta despues di e Reinado di Mil Aña? Piká i imperfekshon lo no eksistí mas. Hende lo no tin ku pidi pordon mas a base di e reskate di Hesus; ni lo no tin mester di un mediadó ni saserdote. Anto “e último enemigu,” morto, lo a ser destruí. E mortonan a ser resusitá i tur hende riba tera lo ta perfekto.—1 Kor. 15:​25, 26.

17-18. (a) Kiko lo pasa despues di e Reinado di Mil Aña? (b) Kiko Hesus lo hasi ora su periodo di goberná kaba? (1 Korintionan 15:​24, 28) (Wak e plachi.)

¹⁷ Kiko mas lo pasa despues di Reinado di Mil Aña? Algu masha spesial. Henter e diskushon tokante si Yehova ta santu i hustu lo ser kitá for di mesa. Bo ta kòrda loke a pasa den e hòfi na Éden? Satanas a insinuá ku Yehova ta un ganadó i ku E ta un mal gobernante ku no stima hende. Ma desde e tempu ei padilanti, bes tras bes sirbidónan di Yehova a proba ku Yehova su manera di hasi kos ta mas mihó. Pues despues di Reinado di Mil Aña, Yehova su reputashon lo ser kompletamente vindiká. Nos Tata den shelu lo proba ku di bèrdat e stima nos.

¹⁸ Despues ku e Reinado di Mil Aña kaba, tur hende lo sa ku tur loke Satanas a bisa tokante Yehova tabata mentira. Kiko Hesus lo hasi ora su periodo di goberná kaba? Akaso lo e sigui Satanas su ehèmpel i rebeldia kontra Yehova? Nò! (Lesa 1 Korintionan 15:​24, 28.) Hesus lo entregá e Reino bèk na su Tata i lo someté na Yehova su gobernashon. Hesus ta dispuesto pa hasi tur esei pasobra e stima Yehova.

19. Kon Hesus a santifiká i vindiká Yehova su nòmber?

¹⁹ No tin un persona ku por representá Yehova mihó ku Hesus. Pa Hesus santifikashon i vindikashon di e nòmber di su Tata ta e kos di mas importante. P’esei, e tabata dispuesto pa muri pa e nòmber ei, i despues di su Reinado di Mil Aña lo e entregá tur kos na su Tata bèk. Pues Yehova tabatin tur rason di duna Hesus Su nòmber. Pero kon nos por imitá Hesus? Den e siguiente artíkulo nos lo kontestá esei.