Kon Abo Por Santifiká i Vindiká Yehova Su Nòmber?

1-2. Kon nos sa ku Yehova ta importante pa Hesus?

YEHOVA ta e persona di mas importante pa Hesus. El a defendé su Tata te na morto. Manera nos a siña den e artíkulo anterior, Hesus tabata dispuesto pa muri pa proba ku Yehova ta santu i ku tur loke e hasi ta bon. (Mar. 14:36; Heb. 10:​7-9) Anto na final di e Reinado di Mil Aña, lo e ta dispuesto pa duna tur su outoridat bèk na su Tata pasobra e ke pa Yehova haña tur onor. (1 Kor. 15:​26-28) Tur loke Hesus a i lo hasi pa Yehova ta proba ku e stim’é masha hopi mes.

² Hesus a bin na tera den nòmber di su Tata. (Huan 5:43; 12:13) El a yuda su disipelnan konosé Yehova mihó. (Huan 17:​6, 26) Ora e tabata siña hende i hasi milager, el a laga komprondé bon kla ku ta Yehova a dun’é sabiduria i poder pa hasi e kosnan ei. (Huan 10:25) Anto el a pidi Yehova pa protehá su disipelnan “pa motibu di [Yehova su] nòmber.” (Huan 17:11) Mirando ku Dios su nòmber ta asina importante pa Hesus, kon ta posibel ku un hende por para ariba ku e ta kristian si e no konosé nòmber di Hesus su Tata ni no ta us’é?

3. Tokante kiko nos lo papia den e artíkulo akí?

³ Komo kristiannan berdadero, nos ta hasi esfuerso pa sigui den e pasonan di Hesus. P’esei nos tambe ta stima i respetá Yehova. (1 Ped. 2:21) Den e artíkulo akí nos lo wak dikon Yehova a duna su nòmber na esnan ku ta prediká “e bon notisia . . . di e Reino.” (Mat. 24:14) Tambe nos lo papia tokante kon importante e nòmber di Yehova mester ta pa kada un di nos.

“UN PUEBLO PA KARGA SU NÒMBER”

4. (a) Kiko Hesus a bisa su disipelnan promé ku el a bai shelu bèk? (b) Ki pregunta nos lo kontestá?

⁴ Nèt promé ku Hesus a bai shelu bèk, el a bisa su disipelnan: “Boso lo risibí poder ora spiritu santu baha riba boso. I boso lo ta mi testigunan na Herúsalèm, na henter Hudea i Samaria, i te na e partinan di mas leu di tera.” (Echo. 1:8) Pues nan lo a prediká e bon notisia tur kaminda, no na Israel so. Anto ku tempu, hende rònt mundu lo tabatin e oportunidat di bira disipel di Hesus. (Mat. 28:​19, 20) Pero ripará ku Hesus a bisa: “Boso lo ta mi testigunan.” Awor esei lo tabata ke men ku e hendenan ku bira disipel di Hesus lo ta testigu di dje so òf nan mester a siña konosé Yehova i ta testigu di dje tambe? Echonan kapítulo 15 lo yuda nos ku e kontesta.

5. Kon e apòstelnan i e ansianonan na Herúsalèm a mustra ku tur hende mester siña konosé Yehova? (Wak e plachi.)

⁵ Na aña 49 di promé siglo, e apòstelnan i e ansianonan na Herúsalèm a reuní pa papia tokante loke hende no-hudiu mester a hasi pa bira kristian. Na final di e reunion, Santiago, Hesus su ruman di parti mama, a bisa: “Pedro a konta nos en detaye kon Dios a dirigí su atenshon awor na hende di e nashonnan pa skohe for di nan un pueblo pa karga su nòmber.” Sitando Profeta Ámos, Santiago a agregá: “Pa asina e hendenan ku resta di e pueblo ei, huntu ku hende di tur nashon, esta, hende ku ta karga mi nòmber, por hasi esfuerso pa buska Yehova. Esei ta loke Yehova ta bisa.” (Echo. 15:​14-18; promé nota) Pues e hendenan ku bira disipel di Hesus lo siña tokante Yehova i tambe ‘karga Su nòmber.’ Ku otro palabra, nan lo yuda otro hende siña tokante Yehova i nan lo ta konosí na e nòmber ei.

6-7. (a) Dikon Hesus a bini na tera? (b) Pa ki motibu mas importante Hesus a bini na tera?

⁶ Hesus su nòmber ta nifiká “Yehova Ta Salbashon.” E ta esun ku Yehova a usa pa salba hende ku pone fe den dje. Hesus a bin na tera pa duna su bida pa humanidat. (Mat. 20:28) Ora el a paga e reskate ku su bida, el a habri kaminda pa hende haña pordon di nan pikánan i biba pa semper.—Huan 3:16.

⁷ Pero dikon mester a salba humanidat? Esei ta debí na loke a pasa den e hòfi na Éden. Manera nos a siña den e artíkulo anterior, Ádam i Eva a rebeldiá kontra Yehova i a pèrdè e oportunidat di biba pa semper. (Gén. 3:​6, 24) Pues Hesus a bin na tera pa salba e desendientenan di Ádam ku Eva for di piká i morto. Pero Hesus a bin na tera pa un motibu mas importante. Kòrda ku den e hòfi na Éden, Satanas a daña Yehova su nòmber. (Gén. 3:​4, 5) Pues mester a santifiká e nòmber di Yehova. Hesus tabata sa ku ora Yehova su nòmber ser santifiká humanidat lo ta kompletamente salbá. Hesus tabata e mihó persona pa santifiká e nòmber di Yehova pasobra el a representá Yehova i a hasi loke Yehova tabata ke pa e hasi.

8. Kiko tur kristian mester komprondé i aseptá?

⁸ Tur kristian mester komprondé i aseptá ku esun ku en realidat a pèrkurá nan salbashon ta Yehova; Tata di Hesus. (Huan 17:3) Ademas, meskos ku Hesus, nan lo karga e nòmber di Yehova. Tambe nan tin ku komprondé ku ta importante pa santifiká e nòmber ei. (Echo. 2:​21, 22) Pues tur berdadero kristian tin ku siña tantu tokante Yehova komo tokante Hesus. Nos por komprondé anto dikon Hesus a kaba e orashon skirbí na Huan 17 asin’akí: “Mi a hasi bo nòmber konosí na nan i lo mi sigui hasié konosí, pa nan por demostrá e amor ku bo a stima mi kuné i pa mi por ta den union ku nan.”—Huan 17:26.

“BOSO TA MI TESTIGUNAN”

9. Si nos ke ta siguidó di Hesus, kiko mester ta importante pa nos?

⁹ For di loke nos a analisá nos ta mira ku, pa berdadero siguidónan di Hesus, no tin nada mas importante ku santifikashon di e nòmber di Yehova. (Mat. 6:​9, 10) Pues pa nos, Yehova su nòmber ta esun di mas importante den henter universo. Ban wak loke nos tin ku hasi pa santifiká e nòmber di Yehova i proba ku Satanas su akusashonnan ta puru mentira.

10. Tokante kiko nos ta lesa den kapítulo 42 pa 44 di Isaías? (Isaías 43:9; 44:​7-9) (Wak e plachi.)

¹⁰ Isaías 42 pa 44 ta yuda nos haña sa loke nos tin ku hasi pa santifiká e nòmber di Yehova. Den e kapítulonan ei, Yehova ta reta tur dios pa proba si di bèrdat nan ta eksistí. Anto meskos ku den un korte, Yehova ta puntra si tin testigu ku por proba esei. Pero niun hende no por a hasi esei!—Lesa Isaías 43:9; 44:​7-9.

11. Kiko Yehova ta bisa su sirbidónan na Isaías 43:​10-12?

¹¹ Lesa Isaías 43:​10-12. Yehova ta bisa su sirbidónan: “Boso ta mi testigunan, i ami ta e Dios berdadero.” Yehova ta pidi nan pa kontestá e pregunta akí: “Ta eksistí otro Dios fuera di mi?” (Isa. 44:8) Komo sirbidó di Yehova, nos tin onor di kontestá e pregunta ei. Ku nos palabra i akshon, nos ta testiguá ku di bèrdat Yehova ta e úniko Dios berdadero. Su nòmber ta esun di mas importante den universo. Na e manera ku nos ta biba, asta ora Satanas purba di hasi nos bida imposibel, nos ta proba ku di bèrdat nos stima Yehova i ta leal na dje. Asina ei nos ta santifiká e nòmber di Yehova.

12. Kon e profesia na Isaías 40:3 i 5 a kumpli?

¹² Isaías a profetisá tambe ku un hende lo “habri [òf, “prepará,” nota] e kaminda di Yehova!” (Isa. 40:3) Kon e profesia ei a kumpli? Huan Boutista a prepará e kaminda pa Hesus, ku a bin den nòmber di Yehova i a papia den nòmber di Yehova. (Mat. 3:3; Mar. 1:​2-4; Luk. 3:​3-6) E mesun profesia a bisa: “E gloria di Yehova lo ser revelá.” (Isa. 40:5) Kon esei a tuma lugá? Ora Hesus a bin na tera, el a representá Yehova asina bon ku tabata komo si fuera ta Yehova mes tabata riba tera.—Huan 12:45.

13. Kon nos por imitá Hesus?

¹³ Ora nos ta santifiká Yehova su nòmber, esta, defendé su reputashon, nos ta imitá Hesukristu. Meskos kuné, nos ta testigunan pa Yehova. Nos ta karga e nòmber di Yehova i ta konta otro hende tokante su maravioso obranan. Pero pa nos ta un bon testigu di Yehova, nos mester konta hende tambe tokante tur e kosnan ku Hesus a hasi pa santifiká e nòmber di Yehova. (Echo. 1:8) No tin un persona ku a testiguá mihó tokante Yehova ku Hesus. P’esei nos ta sigui su ehèmpel. (Rev. 1:5) Pero kiko e nòmber di Yehova mester nifiká pa kada un di nos?

LOKE E NÒMBER DI YEHOVA TA NIFIKÁ PA NOS

14. Segun Salmo 105:​3, ki nos ta sinti pa e nòmber di Yehova?

¹⁴ Nos ta orguyoso di e nòmber di Yehova. (Lesa Salmo 105:3.) Yehova ta keda masha kontentu ora nos ta broma tokante dje. (Yer. 9:​23, 24; 1 Kor. 1:31; 2 Kor. 10:17) Pa nos, ta un onor pa konta otro hende kon santu Yehova ta i ku tur loke e hasi ta bon. Nunka nos mester tin bèrgwensa di bisa nos koleganan, kompañeronan di klas, bisiñanan òf otro hende ku nos ta Testigu di Yehova. Diabel tin masha gana pa nos stòp di papia tokante e nòmber di Yehova. (Yer. 11:21; Rev. 12:17) Pa bisa bèrdat, Satanas i su profetanan falsu ke pa hende lubidá mes riba e nòmber di Yehova. (Yer. 23:​26, 27) Pero nos stima e nòmber di Yehova asina tantu ku nos ke broma tokante dje “henter dia.”—Sal. 5:11; 89:16.

15. Kiko ta nifiká usa, òf invoká, e nòmber di Yehova?

¹⁵ Nos ta sigui usa, òf invoká, e nòmber di Yehova. (Yoèl 2:32; Rom. 10:​13, 14) Usa, òf invoká, e nòmber di Yehova ta enserá mas ku djis menshoná e nòmber. Nos mester siña konosé Dios komo un Persona, konfi’é i pidié yudansa i guia. (Sal. 20:7; 99:6; 116:4; 145:18) Tambe e ta enserá konta otro hende tokante su nòmber i tokante su bunita kualidatnan. Ademas e ta enserá tambe yuda otro hende hasi kambio den nan bida pa hasi Yehova kontentu i wòrdu salbá.—Isa. 12:4; Echo. 2:​21, 38.

16. Kon nos por proba ku Satanas ta un gañadó?

¹⁶ Nos ta dispuesto pa sufri pa e nòmber di Yehova. (Sant. 5:​10, 11) Ora ku nos ta sufri pasobra nos ta leal na Yehova, nos ta proba ku Satanas ta un gañadó. Den temp’i Yòb, Satanas a bisa esaki tokante sirbidónan di Yehova: “Un hende lo entregá tur loke e tin pa salba su bida.” (Yòb 2:4) Satanas a insinuá ku ta ora kos ta bon so hende lo sirbi Yehova i ku nan lo laga Yehova na kaya asina ku kos bira duru. Yòb a proba ku esei niun ora so no ta bèrdat. Nos tambe tin e onor di proba ku nunka nos lo bira lomba pa Yehova, ni maske ki Satanas bin kuné. Nos por ta kompletamente konvensí ku Yehova lo kuida nos pa motibu di su nòmber.—Huan 17:11.

17. Segun 1 Pedro 2:​12, den ki otro manera nos por onra e nòmber di Yehova?

¹⁷ Nos tin rèspèt pa e nòmber di Yehova. (Pro. 30:9; Yer. 7:​8-11) Komo ku nos ta representá Yehova i ta karga su nòmber, loke nos hasi por sea onra òf desonrá su nòmber. (Lesa 1 Pedro 2:12.) P’esei, nos ke hasi tur loke nos por pa alabá Yehova ku nos abla i kondukta. Di e manera ei, aunke nos ta imperfekto, nos por onra e nòmber di Yehova.

18. Ki ta un otro manera ku nos por proba ku Yehova su nòmber ta importante pa nos? (Wak e nota.)

¹⁸ E nòmber di Yehova ta mas importante ku nos mes reputashon. (Sal. 138:2) Nos ta skohe pa hasi kosnan manera Yehova ke. Pero debí na esei hende sa kritiká nos i papia malu di nos.a Hesus tabata dispuesto pa ser kondená komo un kriminal i muri na un manera humiante pa asina duna onor na e nòmber di Yehova. El a hasi esei “sin preokupá ku e bèrgwensa ku esei a trese kuné” i sin wòri ku kiko hende lo a pensa di dje. (Heb. 12:​2-4) Loke mas tabata import’é ta pa hasi e boluntat di Yehova.—Mat. 26:39.

19. Kiko bo ta sinti pa e nòmber di Yehova, i dikon?

¹⁹ Nos ta orguyoso pa sirbi Yehova i pa nos ta un gran onor pa ta Testigu di Yehova. P’esei, nos no ta wòri ora ku otro hende despresiá nos òf kritiká nos. E nòmber di Yehova ta mas importante pa nos ku kualke otro kos, asta nos mes reputashon. Pues laga nos ta determiná pa sigui onra e nòmber di Yehova sin importá kiko Satanas zuai nos kuné. Asina ei, meskos ku Hesukristu, nos ta demostrá ku e nòmber di Yehova ta nifiká tur kos pa nos.