Yuda Bo Studiante Disidí di Sirbi Yehova

1-2. (a) Dikon algun studiante ta duda pa bira Testigu? (b) Kiko nos ta bai siña den e artíkulo akí?

NO SEMPER ta fásil pa algun studiante batisá i bira Testigu. Abo ta kòrda kiko tabata stroba bo di batisá? Kisas bo tabatin miedu kon bo kolega-, amigu- i famianan lo a reakshoná. Òf kisas bo tabata duda si bo por a kumpli ku tur loke Yehova ta ferwagt di bo. Si ta asina, e ora ei bo por komprondé kon algun studiante di Beibel ta sinti i dikon por ta difísil pa nan tuma e desishon pa bira Testigu.

² Hesus tabata sa ku e tipo di kosnan ei por stroba un hende di sirbi Yehova. (Mat. 13:​20-22) Apesar di esei, el a sigui purba yuda nan pa bira su siguidó. El a yuda nan (1) mira ki ta stroba nan di sirbi Yehova, (2) stima Yehova mas, (3) pone Yehova na promé lugá i (4) sa kiko nan mester hasi ora nan haña nan ku oposishon. Nos por hasi meskos pa hende ku nos ta studia kuné den e buki Bo Por Disfrutá di Bida pa Semper! Ban wak kon nos por hasi esei.

YUD’É MIRA KI TA STROB’É DI SIRBI YEHOVA

3. Kiko tabata stroba Nikodemo di bira disipel di Hesus?

³ Nikodemo tabata un lider importante di e hudiunan. Un seis luna asina despues ku Hesus a kuminsá prediká, Nikodemo ya a realisá ku Hesus ta e Mesías. Pero “miedu di e hudiunan” a pone ku Nikodemo tabata bai serka Hesus anochi so. E miedu ei a stroba Nikodemo di sigui Hesus. (Huan 3:​1, 2; 7:13; 12:42) Kisas Nikodemo a pensa riba su státus i tur loke e por pèrdè si el a bira disipel di Hesus.a

4. Kon Hesus a yuda Nikodemo komprondé ki Yehova tabata ke p’e hasi?

⁴ Aunke Nikodemo tabata konosé Lei di Moises bon, e tabatin mester di un hende pa yud’é komprondé ki Yehova tabata ke p’e hasi. Hesus tabata dispuesto pa usa su tempu pa papia ku Nikodemo asta durante anochi. El a yuda Nikodemo i na un manera fásil el a splik’é loke e tin ku hasi pa bira un disipel: arepentí di su pikánan, batisá den awa i pone fe den e Yu di Dios.—Huan 3:​5, 14-21.

5. Kon nos por yuda un studiante mira ki ta strob’é di sirbi Yehova?

⁵ Asta si un studiante ta komprondé e bèrdatnan di Beibel bon, kisas lo e mester di yudansa pa mira ki ta strob’é di sirbi Yehova. Por ta e ta traha muchu òf su famia no ke p’e bira Testigu. Meskos ku Hesus, pasa tempu ku bo studiante. Bo por invit’é pa un kòpi di kòfi òf pa kana. Den e ambiente relahá ei, kisas lo e ta mas habrí pa konta bo ki ta e kosnan ku e ta hañ’é kuné. Yud’é mira ki kambio e tin ku hasi i kòrd’é ku e ta hasié pasobra e ta stima Yehova i no pa hasi bo kontentu.

6. Kon bo por yuda un studiante haña kurashi pa apliká loke e ta siña? (1 Korintionan 16:13)

⁶ Pa un studiante haña kurashi pa apliká loke e ta siña, e mester ta konvensí ku Yehova lo yud’é hasi loke ta korekto. (Lesa 1 Korintionan 16:13.) Un bon maestro di skol no ta djis siña un alumno kon pa hasi algu pero e ta yud’é haña e konfiansa ku e por hasié. Asina tambe, un bon maestro di Beibel no ta djis siña un studiante ki Yehova ke p’e hasi pero ta sigur’é ku Yehova lo yud’é hasi e kambionan nesesario. Ki mas bo por hasi pa yuda bo studiante?

YUD’É STIMA YEHOVA MAS

7. Kon Hesus a yuda su oyentenan stima Yehova mas?

⁷ Hesus tabata sa ku si su disipelnan stima Yehova, lo ta mas fásil pa nan apliká loke nan ta siña. P’esei, hopi biaha el a siña nan kosnan ku lo a laga nan stima Yehova mas. Por ehèmpel, el a kompará Yehova ku un tata ku ta duna kos bon na su yunan. (Mat. 7:​9-11) Algun di Hesus su oyentenan kisas no tabatin un tata ku a stima nan. Pues imaginá kon nan a sinti ora Hesus a konta di un yu ku a hasi hopi kos malu i kon su tata ku kariño a risibié brasa habrí. Nan por a mira ku Yehova stima nan mashá i ke yuda nan.—Luk. 15:​20-24.

8. Kon bo por yuda bo studiante stima Yehova mas?

⁸ Bo tambe por yuda bo studiante stima Yehova mas. Bo por hasi esei si kada biaha ku boso studia bo hala atenshon na Yehova su kualidatnan. Yud’é mira e konekshon entre loke el a siña i Yehova su amor. Anto ora boso ta trata e reskate, yuda e studiante komprondé ku esei ta Yehova su regalo p’e. (Rom. 5:8; 1 Huan 4:10) Ora un studiante realisá kuantu Yehova stim’é, esei lo yud’é stima Yehova mas i mas.—Gal. 2:20.

9. Kiko a yuda Michael hasi kambio?

⁹ Michael, di Indonesia, a lanta den un famia Testigu pero e no a batisá. Ku su 18 aña el a bai afó pa traha komo shofùr di trùk. Despues el a bin Indonesia bèk pa kasa, pero el a laga su famia pa bai sigui traha afó. Durante e tempu ku e tabata afó, su kasá i yu muhé a kuminsá studia Beibel i apliká loke nan tabata siña. Despues ku Michael su mama a muri, el a bai Indonesia bèk pa kuida su tata. Michael a disidí di aseptá un estudio di Beibel for di e buki Bo Por Disfrutá di Bida pa Semper! Na lès 27, ora nan tabata trata e sekshon “Kiko Mas Nos Por Siña?” e kos a touch e. Michael a kuminsá yora ora el a pensa kuantu doló Yehova lo mester sinti segun ku e tabata mira su Yu ta sufri. El a haña asina tantu apresio pa e reskate ku el a hasi kambio den su bida i a batisá.

YUD’É PA PONE YEHOVA PROMÉ

10. Kon Hesus a yuda su disipelnan pa pone Yehova na promé lugá? (Lukas 5:​5-11) (Wak e plachi.)

¹⁰ Algun hende ku Hesus a prediká na dje a realisá mesora ku e tabata e Mesías. Pero nan tabatin mester di yudansa pa komprondé ku e trabou di prediká mester ta na promé lugá den nan bida. Pedro i Andres ya tabatin un par di tempu komo disipel di Hesus ora el a pidi nan pa laga tur kos i siguié fultaim. (Mat. 4:​18, 19) Nan dos, huntu ku Santiago i Huan, tabatin un negoshi di piskamentu ku tabata bai bon. (Mar. 1:​16-20) Ora Pedro i Andres a disidí di “laga nan redanan,” sin duda nan lo a hasi sigur ku nan famia lo tin lo nesesario miéntras ku nan tabata sigui Hesus. Ki a impulsá nan pa pone Yehova na promé lugá? Den e buki Lukas nos ta lesa ku Hesus a hasi un milager ku a yuda nan konfia ku Yehova lo duna nan tur loke nan tin mester.—Lesa Lukas 5:​5-11.

11. Ki nos por hasi pa fe di nos studiante bira mas fuerte?

¹¹ Kontrali na Hesus, nos no por hasi milager. Pero loke sí nos por hasi ta di konta nos studiante ku Yehova ta sostené tur hende ku pon’é na promé lugá den nan bida. Por ehèmpel, bo ta kòrda kon Yehova a yuda bo ora bo a kuminsá bai reunion? Kisas bo mester a papia ku bo shèf i bis’é ku lo bo no por traha overtaim si e ta kai riba dia di bo reunionnan. Splika bo studiante ku, ora b’a tuma e desishon ei i b’a mira kon Yehova tabata yuda bo, bo fe den dje a bira mas fuerte.

12. (a) Dikon nos tin ku bai ku diferente ruman na e estudio? (b) Kon bo por usa vidio pa yuda bo studiante pone Yehova na promé lugá? Duna un ehèmpel.

¹² Lo ta bon tambe pa bo studiante skucha ki kambio otro rumannan mester a hasi pa pone Yehova na promé lugá den nan bida. Pues, invitá ruman ku tin diferente background kompañá bo na e estudio. Pidi nan konta kon nan a bin den e bèrdat i ki nan mester a hasi pa pone Yehova na promé lugá. Tambe, tuma tempu pa wak huntu ku bo studiante e vidionan di e sekshon “Kiko Mas Nos Por Siña?” i, ora ta apropiá, esnan di e sekshon “Mas Informashon Interesante” di e buki Bo Por Disfrutá di Bida pa Semper! Por ehèmpel, ora boso ta na lès 37 i a wak e vidio Yehova Lo Pèrkurá pa Nos, kòmbersá tokante e vidio i yuda bo studiante mira ku e por tin sigur ku Yehova lo yud’é ora e pone Yehova na promé lugá.

YUD’É TA PREPARÁ PA OPOSISHON

13. Kon Hesus a prepará su disipelnan pa oposishon?

¹³ Na vários okashon, Hesus a bisa su disipelnan ku hende, asta nan famia, lo purba di stroba nan di sirbi Yehova. (Mat. 5:11; 10:​22, 36) Durante Hesus su último dianan riba tera, el a atvertí nan ku nan bida lo kore peliger debí ku nan ta adorá Yehova. (Mat. 24:9; Huan 15:20; 16:2) El a konsehá nan pa no pleita ku niun hende ku ta oponé nan i pa wak bon ki nan ta bisa i hasi.

14. Kon nos por yuda nos studiante prepará pa oposishon? (2 Timoteo 3:12)

¹⁴ Meskos ku Hesus, nos por prepará nos studiante pa oposishon si nos splik’é loke algun di su kolega-, amigu- òf famianan por hasi òf bisa. (Lesa 2 Timoteo 3:12.) Algun kolega por hasi chèrchi di e manera ku e ta hiba su bida awor. Otro hende, asta famia djaserka, por kritiká loke e ta siñando for di Beibel. Ta bon pa nos no tarda pa prepará e studiante pa oposishon. Asina ei, lo e sa ki pa hasi òf bisa.

15. Ki por yuda un studiante trata ku oposishon di famia?

¹⁵ Si famia di e studiante ta opon’é, bo por bis’é ku esei no ta algu straño, pasobra asta Hesus mes a hañ’é ku esei. (Mar. 3:21; Huan 7:5) Yuda e studiante pensa i mira dikon su famia lo ta opon’é. Kisas ta pasobra nan ta pensa ku loke Testigunan di Yehova ta siña no ta bèrdat òf ku Testigunan ta mal hende. Yuda e studiante mira tambe ku e mester tin pasenshi i pa sigui papia amabel ku su famia i otro hende.

16. Kon nos por yuda un studiante pa tene kuenta ku su famia ora e ta papia tokante su kreensianan?

¹⁶ Si famia di e studiante ke sa algu di loke e ta studia, ta bon pa e studiante no purba di splika muchu kos di biaha. Sino e famia por sinti ku ta muchu kos i lo no ta interesá den un siguiente kòmbersashon. P’esei, animá e studiante pa tene su kòmbersashonnan kòrtiku i fásil. Asina ei, e porta ta keda habrí pa un siguiente kòmbersashon. (Kol. 4:6) E studiante asta por animá su famianan pa subi jw.org. Asina ei nan por haña sa mas tokante Testigunan di Yehova riba nan mes tèmpo.

17. Kon bo por yuda bo studiante kontestá pregunta tokante Testigunan di Yehova? (Wak e plachi.)

¹⁷ Bo por usa tambe e seri “Pregunta Ku Hopi Hende Sa Hasi Tokante Testigunan di Yehova” riba jw.org pa yuda bo studiante prepará kontesta fásil pa preguntanan ku su kolega òf famia por hasié. (2 Tim. 2:​24, 25) Anto no keda sin hasi “Loke Hende Sa Bisa” òf “Si un Hende Puntra” ku tin na final di kada lès di e buki Bo Por Disfrutá di Bida pa Semper! Animá bo studiante pa bisa e kontesta den su mes palabra. Kaminda tin mester, yud’é mehorá su kontesta. Tur esaki lo dun’é mas konfiansa pa defendé su fe.

18. Kon bo por animá bo studiante pa bira un publikadó no batisá? (Mateo 10:27)

¹⁸ Hesus a pidi su disipelnan pa proklamá e bon notisia tur kaminda. (Lesa Mateo 10:27.) Mas lihé un studiante kuminsá prediká ku e kongregashon, mas lihé lo e siña konfia den Yehova pasobra lo e mira kon Yehova ta yud’é. Kon bo por yuda un studiante tin e meta ei? Ora ku anunsiá ku lo tin kampaña di prediká, manera pa Memorial òf kongreso, yuda bo studiante mira ki e tin ku hasi pa bira publikadó. Splik’é ku normalmente ta mas fásil pa kuminsá prediká durante un kampaña. Ademas, bo por anim’é pa kuminsá duna parti den nos reunion di den siman. Asina ei e ta siña papia di su kreensianan ku konvikshon.

DEMOSTR’É KU BO TA KONFIA DEN DJE

19. Kon Hesus a demostrá ku e ta konfia den su disipelnan, i kon nos por imit’é?

¹⁹ Promé ku Hesus a muri i subi bai shelu, el a bisa su disipelnan ku nan lo ta huntu atrobe. Nan no a komprondé ku Hesus tabata ke men ku nan lo ta den shelu kuné. Aunke Hesus tabata sa ku nan no a komprondé ki e tabata ke men, loke sí e tabatin sigur di dje ta ku nan kier a sirbi Yehova. (Huan 14:​1-5, 8) E tabata sa ku nan tabatin mester di tempu pa komprondé sierto kos, manera e speransa di bai shelu. (Huan 16:12) Nos tambe por laga nos studiante mira ku nos tin e konfiansa ku e ke hasi loke ta korekto i sirbi Yehova.

20. Kon Chifa a mustra konfiansa den su studiante?

²⁰ Ta importante pa semper nos konfia ku nos studiante ke hasi loke ta korekto. Esei ta loke Chifa,b un ruman na Malawi, a hasi. El a kuminsá un estudio den e buki Bo Por Disfrutá di Bida pa Semper! ku Alina, un hóben katóliko. Ora nan a kaba ku lès 14, Chifa a puntra su studiante ki ta su opinion tokante usa imágen pa adorá Dios. Alina a trèk kara i bisa: “Ta mi ta disidí si mi ta usa imágen òf nò.” Chifa a pensa ku esei lo tabata Alina su último dia di estudio. Pero Alina no a bisa nada. Chifa a mustra pasenshi i a sigui studia Alina, konfiando ku e dia lo yega ku Alina lo komprondé ku no mester usa imágen. Un par di luna despues nan tabata na lès 34 i Chifa a hasi Alina e pregunta ku tin den e lès: “Kon bo a benefisiá te ku awor di bo kurso di Beibel i di tur loke bo a siña tokante Yehova, e Dios berdadero?” Chifa a konta ki Alina a kontestá: “El a bisa hopi kos bunita, un di nan tabata ku Testigunan no ta hasi nada ku Beibel ta bisa ta malu.” Un par di tempu despues, Alina a stòp di usa imágen i por a batisá.

21. Ki nos por hasi pa yuda un studiante tuma e desishon di sirbi Yehova?

²¹ Ta bèrdat ku Yehova ta esun “ku ta pon’é krese” pero nos tambe por yuda un studiante sirbi Yehova. (1 Kor. 3:7) Nos no tin ku djis siñ’é loke Yehova ke p’e hasi, pero tambe yud’é stima Yehova mas. Ademas, nos ta yud’é mira ku su amor pa Yehova ta bisto ora e pone Yehova na promé lugá den su bida. Tambe nos ta yud’é siña konfia ku Yehova lo yud’é ora e haña oposishon. Ora nos laga nos studiante mira ku nos tin konfiansa den dje, nos ta yud’é haña e kurashi pa disidí di sirbi Yehova.