Nos Tin Ku Aseptá Ku Nos No Sa Tur Kos

1. Ki abilidatnan Yehova a duna nos, i dikon?

YEHOVA ke pa nos siña konos’é i usa nos kapasidat di pensa pa tuma desishon sabí segun ku nos ta sirbié. (Pro. 2:​1-5; Rom. 12:1) P’esei el a krea nos ku e abilidat di pensa, di siña kos nobo i di komprondé kon pa usa loke nos a siña.

2. Ki nos tin ku aseptá, i dikon ta importante pa nos aseptá esei? (Yòb 37:​23, 24; wak e plachi.)

² Aunke nos tin e kapasidat di siña hopi kos, tin hopi kos ku nos no sa. (Lesa Yòb 37:​23, 24.) Por ehèmpel, pensa riba Yòb. Ora ku Yehova a hasié un kantidat di pregunta, el a realisá kuantu kos e no sa. E kòmbersashon ei a pone Yòb para ketu i realisá ku e mester a hasi kambio i bira humilde. (Yòb 42:​3-6) Pues ta bon pa nos tambe realisá i aseptá ku nos no sa tur kos. Ora nos aseptá esei, nos tambe lo bira humilde i konfia ku Yehova lo bisa nos e kosnan ku realmente nos tin ku sa pa tuma bon desishon.—Pro. 2:6.

3. Kiko nos lo trata den e artíkulo akí?

³ Den e artíkulo akí nos lo trata algun kos ku nos no sa i algun reto ku esei ta trese kuné. Tambe nos lo wak dikon ta bon ku nos no sa sierto kos. Loke nos lo siña lo yuda nos konfia ku Yehova, “e Persona ku tin konosementu perfekto,” ta bisa nos loke nos realmente mester sa.—Yòb 37:16.

NOS NO SA KI DIA E FIN TA BIN

4. Segun Mateo 24:​36, kiko ta un di e kosnan ku nos no sa?

⁴ Lesa Mateo 24:36. Un di e kosnan ku nos no sa ta ki “dia i ora” e fin lo bin. Ni Hesus no tabata sa esei ora e tabata aki riba tera.a Despues el a bisa su apòstelnan ku Yehova so tin outoridat pa determiná ki ora sierto kos lo sosodé. (Echo. 1:​6, 7) Yehova ya a pone e fecha ku e fin lo yega. Pues ni maske kuantu nos purba buska pa saka afó, nos no por haña sa presis ki “dia i ora” e fin lo bin.

5. Kon nos por sinti pa motibu ku nos no sa ki dia e fin lo bin?

⁵ Pues, nos no sa pa kuantu tempu mas nos tin ku warda. Pa e motibu ei nos por pèrdè pasenshi i bira desanimá, foral si nos tin hopi aña ta warda pa Yehova su dia yega òf si nos famianan òf otro hende ta hasi bofon di nos. (2 Ped. 3:​3, 4) Ta normal ku komo hende nos por pensa: ‘Mare mi tabata sa ki dia e fin lo bin. E ora ei lo tabata hopi mas fásil pa mi por soportá tur e kosnan akí.’

6. Pasobra nos no sa ki ora e fin ta bini, ki bunita oportunidat nos tin?

⁶ Pero nos no tin nodi di sa ki dia e fin ta bin. Dikon? Pasobra nos a primintí di sirbi Yehova pa semper i no ku un fecha na mente. Pues komo ku nos no sa e dia, nos tin e bunita oportunidat di demostrá ku nos ta sirbi Yehova pa e motibunan korekto, pasobra nos ta stim’é i konfi’é. Pues na lugá di keda pensa ki dia e fin lo yega lo ta mas mihó pa nos pensa riba e kosnan bon ku lo pasa despues di e dia ei. Ora nos pensa riba e kosnan ei, nos lo stima i konfia Yehova mas i tin mas gana di ador’é.—2 Ped. 3:​11, 12.

7. Kiko sí nos sa?

⁷ Laga nos pensa riba loke sí nos sa. Nos sa ‘ku e último dianan a kuminsá na 1914.’ Den Beibel Yehova a duna nos profesianan ku ta proba esei. Ademas, el a duna nos detaye kon mundu lo ta desde e aña ei. Komo resultado nos ta konvensí ku “e dia grandi di Yehova ta serka.” (Sof. 1:14) Algu mas ku nos sa ta e trabou ku Yehova ke pa nos hasi, esta, pa konta mas tantu hende posibel tokante ‘e bon notisia di e Reino.’ (Mat. 24:14) Nos ta prediká e bon notisia ei den mas o ménos 240 pais i na mas ku 1.000 idioma. Nos no tin nodi di sa e “dia i ora” pa yuda den e trabou importante ei.

NOS NO SA KON YEHOVA LO YUDA NOS

8. Kiko Eklesiástes 11:5 ta yuda nos komprondé?

⁸ Lesa Eklesiástes 11:5. For di e teksto ei nos ta komprondé ku no ta semper nos sa “loke e Dios berdadero ta hasi” ni tampoko loke e ta permití sosodé pa asina kumpli ku su boluntat. Pues nos no sa ki Yehova lo permití òf hasi pa yuda nos. (Sal. 37:5) Beibel ta kompará e echo ku nos no sa “loke e Dios berdadero ta hasi” ku e manera ku un yu ta krese den barika di su mama. Esei ta algu ku te asta awe sientífikonan no ta komprondé kompletamente.

9. E echo ku nos no sa kon Yehova ta yuda nos, kiko por pasa?

⁹ Komo ku nos no sa kon Yehova lo yuda nos, nos por keda bira bira hopi pa tuma sierto desishon. Nos por vasilá pa simplifiká nos bida i bai kaminda tin mester di mas publikadó. Òf nos por duda ku si Yehova ta kontentu ku nos. Esei por ta e kaso si nos no logra nos meta di hasi mas pa Yehova, si un proyekto ku e organisashon a konfia nos no ta kana òf si nos no ta hañando niun estudio apesar ku nos ta traha duru den e trabou di prediká.

10. Dikon ta bon ku nos no sa kon Yehova lo yuda nos?

¹⁰ Pero ta bon ku nos no sa kon Yehova lo yuda nos pasobra esei lo yuda nos bira humilde i modesto. Komo resultado nos lo aseptá ku Yehova su pensamentunan i manera di hasi kos ta mihó ku di nos. (Isa. 55:​8, 9) Pero tambe nos ta siña konfia Yehova mas. Pues ora kos bai bon den sirbishi òf riba un proyekto di konstrukshon nos tin tur motibu pa yama Yehova danki. (Sal. 127:1; 1 Kor. 3:7) Ma si kosnan no kana manera nos a ferwagt, nos tin ku kòrda ku Yehova tin tur kos bou di kontrol. (Isa. 26:12) Nos ta hasi nos parti, i nos ta konfia ku Yehova lo hasi sobrá. Loke sí nos por ferwagt i konfia ta ku Yehova lo duna nos e guia ku nos tin mester, asta si e no ta hasié na un manera milagroso manera den pasado.—Echo. 16:​6-10.

11. Kiko sí nos sa?

¹¹ Algu ku sí nos sa ta ku Yehova semper ta amoroso, hustu i sabí. Nos sa tambe ku e ta apresiá hopi loke nos ta hasi p’e i pa nos rumannan. Anto nos sa tambe ku Yehova semper ta rekompensá esnan ku ta leal na dje.—Heb. 11:6.

NOS NO SA KON NOS BIDA LO TA MAÑAN

12. Segun Santiago 4:13 i 14, kiko nos no sa?

¹² Lesa Santiago 4:​13, 14. Nos niun no sa kiko lo pasa mañan. Nos tur ta haña nos ku “situashon difísil òf ku suseso inesperá.” (Ekl. 9:11) P’esei nos no sa si nos lo logra hasi loke nos a plania òf si nos ta bibu pa logra hasié.

13. Kon nos ta sinti komo nos no sa ki lo bai pasa mañan?

¹³ Mayoria di biaha difikultat ta presentá ònferwagt. Tragedia por kambia nos bida di un dia pa otro, i laga nos sinti nos pèrdí i agitá. Anto ora kosnan no ke bira realidat pa kaba, esei por desanimá nos. (Pro. 13:12) Tipo di kosnan asina por pone ku nos ta kuminsá preokupá di mas tokante ki mañan lo trese. Tur esei por pone ku nos por sinti ku bida ta duru i nos lo no disfrutá di dje.

14. Ki nos tin ku hasi i sa pa ta berdaderamente felis? (Wak e plachi.)

¹⁴ Algu bon di pasa den difikultat ta ku nos por proba ku nos ta sirbi Yehova pasobra nos stim’é. Ora nos lesa e relatonan den Beibel nos ta mira ku Yehova no ta libra nos for di tur difikultat i ku e no ta plania nos destino. E sa ku pa nos ta felis di bèrdat, no ta dependé di sa ki lo pasa mañan sino di buska su guia i obedes’É. (Yer. 10:23) Ora nos akudí na Yehova ora di tuma desishon, nos lo tin e mesun aktitut ku Santiago: “Si Yehova ke, nos lo biba i hasi esaki òf esaya.”—Sant. 4:15.

15. Kiko nos sa di futuro?

¹⁵ Aunke nos no sa ki lo pasa mañan, loke sí nos sa ta ku Yehova a primintí nos bida eterno, sea den shelu òf riba tera. Nos sa ku e no por gaña i ku no tin nada ku por strob’é di kumpli ku su palabra. (Tito 1:2) E so por bisa: “Mi ta anunsiá e final for di kuminsamentu. I for di hopi tempu pasá, mi a anunsiá kos ku no a sosodé ainda.” Tur e kosnan ku el a anunsiá a pasa i lo sigui pasa. (Isa. 46:10) Anto nos sa sigur ku nada no por stroba Yehova di stima nos. (Rom. 8:​35-39) Lo e duna nos e sabiduria, e konsuelo i e forsa ku nos mester pa soportá tur kos. Nos ta konvensí ku Yehova lo yuda nos i bendishoná nos.—Yer. 17:​7, 8.

NOS NO POR KABA DI KOMPRONDÉ KON BON YEHOVA KONOSÉ NOS

16. Kiko Yehova sa tokante nos, i kon bo ta haña esei?

¹⁶ Lesa Salmo 139:​1-6. Yehova konosé nos dor en dor. Komo bo Kreador, e sa dikon bo ta pensa manera bo ta pensa i sinti manera bo ta sinti. E sa loke bo ta bisa i ki bo ke men. Tambe e sa ki bo ta hasi i dikon bo ta hasi nan. Rei David a bisa ku meskos ku un vigilante, Yehova ta protehá nos di tur banda i ku nunka nos ta for di su bista. Kon bo ta sinti pa sa ku e Dios todopoderoso, ku ta Haltísimo i a krea tur kos, ta preokupá pa bo? David a bisa: “Ta difísil pa mi komprondé kon bo por konosé mi asina bon. Esei ta algu asina maravioso ku mi no por kaba di komprond’é.”—Sal. 139:6.

17. Ki ta algun kos ku por pone ku ta difísil pa nos kere ku Yehova konosé nos dor en dor?

¹⁷ E manera ku nos a lanta, nos kultura òf nos kreensia promé ku nos a bira Testigu por pone ku ta difísil pa nos mira Yehova komo un Tata ku ta stima nos i ku ta preokupá pa nos. Òf tin biaha, meskos ku David, nos por sinti ku nos fayonan di pasado ta asina grave ku Yehova no ke sa nada di nos i ta keda leu for di nos. (Sal. 38:​18, 21) Òf kisas un hende ku di bèrdat ta purba di kambia su bida i biba manera Yehova ke, por pensa: ‘Si di bèrdat Yehova konosé mi asina bon, dikon e ta pidi mi pa kambia na lugá di aseptá mi pa ken mi ta?’

18. Dikon ta bon pa nos aseptá ku Yehova konosé nos mihó ku nos mes? (Wak e plachi.)

¹⁸ Ta bon pa nos aseptá ku Yehova konosé nos mihó ku nos mes i ku e ta mira e bon den nos aunke nos no ta mira esei. Aunke e ta mira nos fayonan, ta komprondé dikon nos ta sinti i ta aktua di sierto manera, e stima nos. (Rom. 7:15) Ora nos aseptá ku Yehova semper ta mira ki klase di hende nos por bira, esei por duna nos e konfiansa ku nos tin mester pa sirbié fielmente i ku goso.

19. Kiko sí nos sa tokante Yehova?

¹⁹ Nos sa ku Yehova ta amor i nos no ta duda den esei. (1 Huan 4:8) Nos sa ku tur loke e bisa nos pa hasi òf no hasi ta pasobra e stima nos i semper ke lo mihó pa nos. Nos sa ku e ke pa nos biba pa semper, i p’esei el a sòru pa e reskate. Danki na e reskate, nos sa sigur ku nos por sirbi Yehova apesar di nos fayonan. (Rom. 7:​24, 25) Anto nos sa tambe “ku Dios ta mas grandi ku nos kurason i sa tur kos.” (1 Huan 3:​19, 20) Yehova konosé nos dor en dor i tin e konfiansa ku nos por hasi su boluntat.

20. Kiko lo yuda nos pa no preokupá di mas?

²⁰ Yehova ta bisa nos tur loke ta importante pa nos sa. Pues nos no tin nodi di preokupá tokante kosnan ku nos no sa. Mas bien nos tin ku focus riba e kosnan ku realmente ta importante pa nos sa. Asina ei nos ta demostrá ku nos ta humilde i ta konfia plenamente den Yehova, “e Persona ku ta perfekto den konosementu.” (Yòb 36:4) Aunke ku aworakí nos no ta komprondé vários kos, nos sa ku Yehova lo sigui siña nos pa semper. Anto esei ta bon pasobra nunka nos lo no stòp di siña kosnan nobo tokante nos maravioso Dios.—Ekl. 3:11.