1925​—Shen Aña Pasá

SPERANSA KU TA TARDA

Hopi Studiante di Beibel a sinti ku na 1925 tera lo a bira un paradeis. Dikon? Ruman Albert Schroeder, kende despues a sirbi komo miembro di Kuerpo Gobernante, a bisa: “Nos a kere ku na 1925 e ungínan lo bai shelu pa forma parti di e Reino. Ademas, hòmbernan fiel manera Ábraham, David i otronan lo a resusitá pa fungi komo prens i tuma over gobernashon di tera komo parti di Dios su Reino.” Ta di komprondé ku algun a desanimá segun ku e aña a pasa bai sin ku loke nan a spera riba dje a kristalisá.—Pro. 13:12.

Aunke nan tabata desapuntá, mayoria di e Studiantenan di Beibel a sigui prediká. Nan a kuminsá kapta ku e kos di mas importante ku nan mester hasi ta prediká tokante Yehova. Laga nos mira kon nan a usa radio pa prediká na hopi hende.

MAS EMISORA

Na 1924, hopi hende tabata skucha e emisora WBBR. P’esei na 1925 a konstruí un emisora nobo serka di Chicago, Illinois. Su nòmber tabata WORD. Ralph Leffler, kende a yuda konstruí e emisora, a konta: “Anochi, den winter, hende di lugánan hopi leu tabata skucha e emisora.” Por ehèmpel, un famia ku tabata biba mas ku 5.000 kilometer leu na Pilot Station, Alaska, a skucha un di e promé transmishonnan. Despues di e transmishon, e famia a skirbi un karta pa yama danki pa e bunita programa ku a yuda nan sa mas tokante Dios i Beibel.

E Toren di Vigilansia di 1 di desèmber 1925 a bisa: “WORD ta un di e emisoranan na Merka ku su señal ta asina fuerte ku e ta kubri henter Merka punta pa punta, Cuba i e partinan te ariba di Alaska. Hopi hende ku nunka a tende e bèrdat awor kier a siña mas despues ku nan a skucha e emisora.”

Durante e mesun tempu akí, Studiantenan di Beibel tabata ke hasi uso di radio pa prediká e bon notisia na Canada tambe. P’esei, na 1924 a konstruí e emisora CHUC na Saskatoon, Saskatchewan. E tabata un di e promé emisoranan religioso na Canada. Pero pa 1925, mester a buska un lugá mas grandi pa e emisora na Saskatoon. Pues e organisashon a muda tur kos pa un edifisio ku nan a kumpra i renobá.

Danki na CHUC, hopi hende ku tabata biba leu òf den e pueblitonan chikitu na Saskatchewan a tende e bon notisia pa promé biaha. Por ehèmpel, despues di a skucha un transmishon, Señora Graham, kende tabata biba den un pueblito, a manda pidi literatura. Ruman George Naish a konta: “Señora Graham a skirbi den su karta: ‘Siña nos!’ Su petishon tabata asina urgente ku nos a mand’é tur e volúmennan di Estudio di e Skritura.” No a tarda muchu ku Señora Graham a kuminsá prediká i hiba loke e tabata siña na lugánan mas leu.

LUS NOBO

Den E Toren di Vigilansia di 1 di mart 1925, tabatin un artíkulo importante titulá: “Nasementu di e Nashon.” Dikon e artíkulo ei tabata asina importante? Pasobra pa algun tempu kaba, Studiantenan di Beibel tabata sa ku Satanas tin un organisashon ku ta konsistí di e demoñonan i e sistema religioso, ekonómiko i polítiko di e mundu akí. Sinembargo, den e artíkulo akí e “esklabo fiel i prudente” a yuda e rumannan komprondé ku Yehova tambe tin su organisashon. Su organisashon ta kompletamente diferente for di esun di Satanas i ta opon’é. (Mat. 24:45) Ademas, esklabo fiel a splika ku e Reino di Dios a nase na 1914 i ku e aña ei tabatin guera den shelu. Nan a splika tambe ku komo konsekuensia di esei, Satanas i su demoñonan a ser bentá fo’i shelu i awor nan ta riba tera.—Rev. 12:​7-9.

E komprondementu nobo ei tabata difísil pa algun hende aseptá. P’esei den e mesun artíkulo ei tabatin skirbí: “Nos ta sugerí tur lesadó di E Toren di Vigilansia ku no ta di akuerdo ku loke tin skirbí akinan pa tene pasenshi, konfia den Yehova i sigui sirbié fielmente.”

Tom Eyre, un kòlportùr (awor pionero) di Inglatera, a konta kon mayoria di Studiante di Beibel a sinti tokante e artíkulo ei. El a bisa: “E rumannan a keda masha kontentu ku e splikashon ei di Revelashon 12. Unabes nos a kapta ku e Reino a kuminsá goberná den shelu, nos kier a konta tur hende tokante e bon notisia ei. Esei a motivá nos pa prediká asta mas i a yuda nos mira ku Yehova ta bai hasi kosnan hopi impreshonante den futuro.”

PREDIKÁ TOKANTE YEHOVA

Awe Testigunan di Yehova konosé e teksto na Isaías 43:10 hopi bon. E ta bisa: “Boso ta mi testigunan, sí, mi sirbidó ku mi a skohe.” Pero promé ku 1925, nos publikashonnan kasi nunka tabata menshoná e teksto ei. Pero esei lo a kambia. Durante 1925, a splika Isaías 43:10 i 12 na plaka chikí den 11 edishon di E Toren di Vigilansia!

Na final di ougùstùs 1925, Studiantenan di Beibel a bai un kongreso na Indianapolis, Indiana. Ruman Joseph F. Rutherford a skirbi un mensahe pa yama e delegadonan bon biní. E mensahe ei a ser imprimí riba e programa. E mensahe a bisa: “Nos a bini e kongreso akí pa haña forsa di Yehova pa asina nos por bai prediká komo su testigunan ku ainda mas determinashon.” Durante e kongreso ei di 8 dia, tur ku a asistí a wòrdu animá pa prediká tokante Yehova tur chèns ku nan haña.

Riba djasabra, 29 di ougùstùs, Ruman Rutherford a duna un diskurso ku e tema: “Un Yamada pa Pone Man na Obra.” Durante e diskurso el a pone hopi énfasis riba e importansia di prediká. El a bisa: “Yehova ta bisa: ‘Boso ta mi testigunan, i ami ta e Dios berdadero.’ Djei Yehova ta duna e mandamentu akí: ‘Prepará e kaminda pa e pueblo.’ E úniko hendenan riba tera ku por hasi esei i prediká pa Yehova ta esnan ku e mes ta yuda ku su spiritu i ku ta su testigunan.”—Isa. 43:12; 62:10.

Despues di Ruman Rutherford su diskurso, el a lesa un dokumento titulá: “Un Mensahe di Speransa.” Tur hende ku a asistí a bai di akuerdo ku e dokumento. El a bisa tambe ku e úniko manera pa nos disfrutá di berdadero “pas, prosperidat, bon salú, bida, libertat i felisidat” ta mediante Dios su Reino. Mas despues, a tradusí i imprimí e dokumento ei den un tratado na mas idioma. A logra parti mas o ménos 40 mion tratado.

Aunke e Studiantenan di Beibel ainda no a kambia nan nòmber pa ‘Testigunan di Yehova,’ ya nan a kuminsá komprondé kon importante ta pa nan prediká tokante Yehova.

HASI REBISHITA

Segun ku e kantidat di Studiantenan di Beibel a oumentá rònt mundu, e organisashon a animá nan pa rebishitá hende ku a mustra interes. Despues di e kampaña pa parti e tratado Un Mensahe di Speransa, e Boletina a duna e siguiente instrukshon: “Bai bèk i rebishitá e hendenan ku a tuma e tratado.”

Den e Boletin di yanüari 1925, tabatin eksperensia di un Studiante di Beibel na Plano, Texas. E ruman a bisa: “Nos a keda sorprendí ora ku nos a bolbe prediká den teritorio ku nos a prediká kaba. Nos tabatin mihó resultado trahando nan ku ora nos prediká den teritorionan nobo. Tin un pueblito den nos teritorio ku nos a prediká sinku biaha kaba durante e último dies aña. . . . Poko tempu pasá Ruman Hendrix i mi mama a bolbe prediká einan anto nan a laga mas buki einan ku promé.”

Anto un kòlportùr, na Panamá, a skirbi: “Hopi hende ku ántes a kore ku mi for di nan porta, awor a kambia di aktitut ora ku m’a bini bèk un di dos òf di tres biaha. E último aña akí m’a dediká mas tempu na hasi rebishita i m’a haña hopi bon eksperensia.”

FUTURO

Na final di 1925, Ruman Rutherford a skirbi un karta pa tur kòlportùr i a konta nan kiko a wòrdu hasí e aña ei i loke nan mester a sigui hasi. El a bisa: “Durante e último aña, boso tabatin e privilegio di konsolá hopi hende ku tabata tristu. Esei a duna boso hopi goso. Na 1926 boso lo tin hopi oportunidat mas pa prediká tokante Dios i su Reino i pa demostrá ken realmente ta su adoradónan. Laga nos usa nos boka pa alabá nos Dios i nos Rei.”

Na final di aña 1925, e rumannan a plania pa hasi e Bètel na Brooklyn mas grandi. Na 1926, nan a kuminsá ku e proyekto di konstrukshon di mas grandi ku e organisashon a yega di hasi.