Mantené Bo Goso si Bo Ta un Dunadó di Kuido

1-2. Kiko Yehova ta pensa di e esfuerso ku bo ta hasi pa kuida bo ser kerí? (Proverbionan 19:17) (Wak e plachinan.)

UN RUMAN hòmber di Korea ku yama Jin-yeol a konta: “Ami ku mi kasá tin mas ku 32 aña kasá. E último sinku añanan akí, mi kasá ta malu i ta ami ta kuid’é na kas. E tin e malesa Parkinson, i kasi e no por move su kurpa. Mi stima mi kasá masha hopi mes, i mi ta kuid’é ku masha amor. Anochi, e tin ku drumi den un kama di hospital. Mi ta drumi banda di dje, i nos ta drumi man tené.”

² Kisas abo ta kuida un ser kerí, sea bo mayor, bo kasá, bo yu òf un amiga òf amigu. Di mes, bo ta kontentu ku bo por yud’é pasobra bo stim’é. Ademas, ora bo ta kuida bo ser kerí, esei ta un manera pa bo mustra ku bo stima Yehova. (1 Tim. 5:​4, 8; Sant. 1:27) Sinembargo, no ta fásil pa kuida hende. Hopi biaha, otro hende no sa di e difikultatnan ku bo ta trata kuné. Kisas ora bo ta den hende bo ta smail, pero ora bo ta bo so, awa ta basha for di bo wowo. (Sal. 6:6) Podisé otro hende no sa kon bo ta sinti, pero Yehova semper sa kon bo ta sinti. (Kompará ku Éksodo 3:7.) Yehova ta apresiá e sakrifisionan ku bo ta hasi, i e ta mira bo lágrimanan. (Sal. 56:8; 126:5) E ta ripará tur loke bo ta hasi pa bo ser kerí. Anto Yehova ta konsiderá ku ta un fabor bo ta hasié, i e ta primintí ku lo e rekompensá bo pa esei.—Lesa Proverbionan 19:17.

3. Dikon lo tabata difísil pa Ábraham ku Sara kuida Taré?

³ Den Beibel tin hopi relato di hende ku mester a duna kuido. Por ehèmpel, pensa riba Ábraham ku Sara. Tempu ku nan a bai for di Ur, nan tata, Taré, tabatin mas o ménos 200 aña di edat. Tòg, el a bai ku nan. Nan mester a biaha 960 kilometer pa yega Háran. (Gén. 11:​31, 32) Probablemente, nan tabata biaha riba kamel òf buriku. Esei lo mester tabata hopi difísil pa Taré. Klaru ku Ábraham ku Sara tabata stima Taré. Pero lo no tabata nada fásil pa nan kuida un hende di edat asina avansá. Pues, lo mester tabatin biaha ku Ábraham ku Sara tabata hopi kansá. En todo kaso, Yehova sin duda a duna nan e forsa nesesario. Meskos ku Yehova a yuda Ábraham ku Sara, lo e duna bo e yudansa nesesario pa sigui kuida bo ser kerí.—Sal. 55:22.

4. Kiko nos lo trata den e artíkulo akí?

⁴ Ta hopi mas fásil pa bo sigui kuida bo ser kerí si bo tin goso. (Pro. 15:13) Un hende por keda felis asta ora bida ta hopi difísil. (Sant. 1:​2, 3) Kiko bo por hasi pa mantené bo goso? Bo por sigui pidi Yehova den orashon pa yuda bo keda positivo. Tin mas kos ku bo por hasi pa mantené bo goso. Den e artíkulo akí, nos lo trata algun di nan. Nos lo trata tambe loke otro hende por hasi pa yuda bo. Pero promé, nos lo trata dikon ta importante pa bo mantené bo goso ora bo ta kuida bo ser kerí i dikon por ta difísil pa hasi esei.

KON DUNAMENTU DI KUIDO POR AFEKTÁ BO GOSO?

5. Dikon un persona ku ta duna kuido mester mantené su goso?

⁵ Si un persona ku ta duna kuido pèrdè su goso, lo e no tin forsa pa sigui kuida su ser kerí. (Pro. 24:10) Ademas, ora e ta kansá, e por bira ménos amabel i kisas tin ménos gana di yuda. Kiko lo por pone un persona ku ta duna kuido pèrdè su goso?

6. Dikon algun dunadó di kuido ta bira agotá?

⁶ Dunadó di kuido por bira agotá. Un ruman muhé ku yama Leah a bisa: “Asta ora kos ta bai bon, mi ta sinti mi morto kansá na final di dia. Tin biaha, mi no tin ni forsa pa kontestá mensahe riba telefòn.” Tin dunadó di kuido no ta drumi sufisiente òf haña chèns di relahá. Un ruman muhé ku yama Inés a bisa: “Mi no ta drumi sufisiente. Hopi biaha, mi tin ku lanta vários biaha durante anochi pa atendé ku mi suegra. Ami ku mi kasá tin basta aña sin por tuma un fakansi.” Algun dunadó di kuido no por aseptá invitashon pa aktividat sosial ni pa sierto asignashon den Yehova su sirbishi pasobra nan no por laga nan ser kerí su so. Komo resultado, nan ta sinti soledat, i nan ta tristu pasobra nan no por hasi tur e kosnan ku nan lo tin gana di hasi.

7. Dikon algun dunadó di kuido por sinti nan kulpabel òf tristu?

⁷ Dunadó di kuido por sinti nan kulpabel òf tristu. Un ruman muhé ku yama Jessica a bisa: “Hopi biaha, mi ta sinti ku mi mester hasi mas pa yuda mi tata. Anto ora mi tuma tempu pa sosegá, mi ta sinti ku mi ta egoista i ku ta algu malu mi ta hasi.” Tin ruman ta sinti nan kulpabel pasobra nan ta fadá ku e situashon. Otro ruman ta preokupá ku nan no ta hasi sufisiente pa yuda nan ser kerí. Tin ruman tambe ta sinti nan kulpabel pasobra kisas ora nan tabata kansá, nan a papia malu ku e persona ku nan ta yudando. (Sant. 3:2) Otro ruman ta tristu pasobra nan ta mira kon nan ser kerí ku ántes tabata masha bibitu ta bai atras. Un ruman ku yama Barbara a bisa: “E kos di mas duru pa mi ta pa mira kon kada dia e persona ku mi ta stima ta bai atras.”

8. Kon algun ruman a sinti ora hende a gradisí nan pa e kuido ku nan ta duna?

⁸ Tin dunadó di kuido ta sinti ku hende no ta apresiá loke nan ta hasi. Dikon nan ta sinti asina? Pasobra masha tiki hende ta gradisí nan òf elogiá nan pa nan trabou duru i pa e sakrifisionan ku nan ta hasi. Djis algun palabra di apresio lo por animá e persona ei. (1 Tes. 5:​18, nota) Un ruman ku yama Melissa a konta: “Tin biaha, mi tabata yora pasobra mi tabata masha kansá i desanimá. Pero ora e hendenan ku mi ta kuida gradisí mi pa loke mi ta hasi pa nan, mi ta sinti mi hopi mas mihó. E palabranan ei ta yuda mi lanta e siguiente dia ku mas smak di sigui kuida nan.” Un ruman hòmber ku yama Ahmadu huntu ku su kasá ta kuida nan subrina hóben ku ta sufri di epilepsia. Ahmadu a konta kon e ta sinti ora ku nan subrina yama nan danki: “Nos subrina no ta konsiente di tur e sakrifisionan ku nos ta hasi pa kuid’é. Pero nos ta sinti nos masha kontentu ora e gradisí nos òf ora e purba di skirbi: ‘Mi stima boso.’”

KON BO POR MANTENÉ BO GOSO?

9. Kon un dunadó di kuido por mustra ku e ta modesto?

⁹ Sea un persona modesto. (Pro. 11:2) Nos tur su tempu i energia ta limitá. Pues, bo tin ku disidí kiko ta e kosnan ku bo por hasi i kiko nò. Tin biaha, bo no por hasi loke hende kier pa bo hasi, i bo tin ku bisa “nò.” Asina bo ta mustra ku bo ta un persona modesto i ku bo sa bo limitashonnan. Pues, bo no tin ku sinti bo malu. Si otro hende ofresé pa yuda bo, sea gradisidu i aseptá nan yudansa. Un ruman hòmber ku yama Jay a bisa: “Ta un sierto kantidat di kos so bo por hasi den un dia. Ora bo sa bo límite i bo no ta bai mas leu ku esei, esei lo yuda bo mantené bo goso.”

10. Dikon ta importante pa bo purba di komprondé dikon bo ser kerí ta aktua na sierto manera? (Proverbionan 19:11)

¹⁰ Purba di komprondé dikon bo ser kerí ta aktua na un sierto manera. (Lesa Proverbionan 19:11.) Ora bo ta hasi esei, bo por keda kalmu ora e bisa òf hasi algu ku ta iritá bo. Algun malesa króniko por pone hende hasi kos ku normalmente nan lo no a hasi. (Ekl. 7:7) Por ehèmpel, un hende ku normalmente ta amabel i komprensivo awor kada bes ta pleita ku bo. Òf e por bira un persona ku ta eksigente òf ku ta rabia lihé. Si bo ta yudando un persona ku tin un malesa grave, kisas ta bon pa bo siña mas tokante su malesa. Mas bo ta komprondé su malesa, mas lo bo por mira ku e persona su komportashon ta debí na su malesa i no ta algu ku e ta hasi pa malu.—Pro. 14:29.

11. Kiko ta algun kos importante ku un dunadó di kuido mester traha tempu p’e tur dia? (Salmo 132:​4, 5)

¹¹ Traha tempu pa fortalesé bo amistat ku Yehova. Tin biaha, lo bo tin ku dediká ménos tempu na sierto kos pa bo por atendé otro asuntu ku ta “mas importante.” (Flp. 1:10) Fortalesé bo relashon ku Yehova ta un di e kosnan mas importante. Maske Rei David tabata hopi drùk, su adorashon na Yehova tabata e kos di mas importante p’e. (Lesa Salmo 132:​4, 5.) Asina tambe, maske bo tin hopi kos di hasi, bo tin ku saka tempu tur dia pa lesa Beibel i pa hasi orashon. Un ruman muhé ku yama Elisha a bisa: “Mi ta logra mantené mi goso, pasobra mi ta hasi orashon i meditá riba e palabranan animante di e salmonan. Orashon ta e kos ku mas ta yuda mi. Vários biaha durante dia, mi tin ku hasi orashon pa pidi Yehova yuda mi keda kalmu.”

12. Dikon ta importante pa hende ku ta kuida un ser kerí kuida nan mes salú?

¹² Saka tempu pa kuida bo salú. Si bo ta kuida un persona, kisas bo no tin hopi tempu pa kumpra i kushiná kuminda salú. Pero pa bo por tin bon salú mental i un kurpa salú, bo mester kome kuminda saludabel i hasi ehersisio. Pues, maske bo bida ta hopi drùk, bo tin ku saka tempu pa hasi e kosnan ei. (Efe. 5:​15, 16) Ademas, purba di drumi sufisiente. (Ekl. 4:6) Ekspertonan ta bisa ku ora nos ta drumi, nos selebro ta haña chèns di rekuperá. Un artíkulo médiko titulá, “E Maneranan Ku Soño Por Afektá Strès,” ta bisa ku ora un hende drumi sufisiente, e ta sintié ménos anshá i e por trata mas mihó ku strès. Ademas, bo mester saka poko tempu tambe pa rekreá. (Ekl. 8:15) Un ruman muhé a splika loke ta yud’é mantené su goso. El a bisa: “Ora tin bon wer, mi ta probechá bai pafó pa mi disfrutá di e bon wer. Anto por lo ménos un biaha pa luna, mi ta plania pa hasi algu leuk ku un amiga.”

13. Dikon ta bon pa hari? (Proverbionan 17:22)

¹³ No lubidá di hari. (Lesa Proverbionan 17:22; Ekl. 3:​1, 4) Harimentu ta bon pa bo salú mental i pa bo salú físiko. Ora bo ta kuida hende, hopi biaha kos por bai robes. Pero si bo por hari ora bo ta den situashon asina, lo bo sinti bo ménos di strès. Anto si bo por hari huntu ku e persona ku bo ta kuida, esei lo laga boso bira mas será ku otro.

14. Dikon ta bon pa papia ku un hende di konfiansa?

¹⁴ Papia ku un amigu òf amiga di konfiansa. Tin biaha, ni maske kiko bo hasi, tòg bo ta sinti bo anshá. Na momentonan asina, ta bon pa bo papia ku un bon amigu òf amiga ku lo no laga bo sinti bo malu ora bo ekspresá bo sintimentunan. (Pro. 17:17) Mas bien, lo e skucha bo ku atenshon i animá bo, i kisas esei ta nèt loke bo mester pa mantené bo goso.—Pro. 12:25.

15. Dikon ta bon pa abo i bo ser kerí papia tokante Paradeis?

¹⁵ Imaginá kon bo bida lo ta den Paradeis huntu ku bo ser kerí. Kòrda ku no ta pa semper lo bo tin ku sigui duna kuido. Nunka no tabata Yehova su propósito pa nos hasi e tipo di trabou ei. (2 Kor. 4:​16-18) Al kontrario, den futuro, nos lo biba manera tabata Yehova su propósito original. (1 Tim. 6:19) Ora abo ku bo ser kerí ta papia tokante loke boso lo hasi huntu den Paradeis, esei por hasi boso tur dos masha kontentu. (Isa. 33:24; 65:21) Un ruman muhé ku yama Heather a bisa: “Hopi biaha, mi ta bisa e hendenan ku mi ta kuida ku pronto nos lo sinta kose huntu, nos lo kore baiskel huntu i nos lo bai kore huntu. Nos lo traha pan i kushiná pa nos sernan kerí ku resusitá. Anto, ora nos kaba di pensa riba e kosnan ei, nos ta gradisí Yehova pa nos bunita speransa.”

KON OTRO HENDE POR YUDA?

16. Kon nos por yuda un ruman den kongregashon ku ta kuida un ser kerí? (Wak e plachi.)

¹⁶ Nos por yuda un ruman haña un poko tempu pa su mes. Nos por ofresé pa wak e ser kerí di un ruman ku ta duna kuido. Di e manera ei, e ruman ta haña chèns di sosegá i tempu pa hasi algun diligensia. (Gal. 6:2) Algun publikadó a traha un skèdjel pa nan sa ken por yuda tur siman. Un ruman muhé ku yama Natalya ta kuida su kasá ku ta paralisá. El a bisa: “Un ruman hòmber den kongregashon ta bini un òf dos biaha pa siman pa pasa tempu ku mi kasá. Nan ta prediká huntu; nan ta kòmbersá, i asta nan ta wak pelíkula huntu. Mi kasá ta disfrutá mashá di e tempu ku e ta pasa ku su amigu. Anto ami ta haña chèns di sosegá òf hasi kos ku mi ta gusta, manera bai kana un tiki.” Den algun kaso, bo por asta ofresé pa pasa anochi ku e ser kerí di un ruman pa asina e ruman por haña un chèns pa drumi bon anochi.

17. Kon nos por yuda un dunadó di kuido durante reunion?

¹⁷ Nos por yuda un ruman durante reunion di kongregashon. Tin ruman no por presta bon atenshon durante reunion di kongregashon, asamblea di sirkuito ni kongreso, pasobra nan tin ku atendé ku nan ser kerí. E rumannan den kongregashon por ofresé pa sinta huntu ku e ruman su ser kerí durante henter e reunion òf parti di e reunion. Si e persona ku ta haña kuido no por sali for di kas, bo por ofresé pa bai kas serka dje i wak reunion huntu kuné. Di e manera ei, e ruman ku ta kuid’é por bai reunion en persona.

18. Kiko mas nos por hasi pa ruman ku ta duna kuido?

¹⁸ Elogiá e rumannan ku ta duna kuido i hasi orashon pa nan. Ta bon pa e ansianonan saka tempu regularmente pa animá e rumannan ku ta duna kuido. (Pro. 27:23) Nos tur den kongregashon mester keda bisa e rumannan ku ta duna kuido ku nos stima nan i ku nos ta apresiá mashá tur loke nan ta hasi. Ademas, nos por pidi Yehova pa sigui duna nan forsa i yuda nan mantené nan goso.—2 Kor. 1:11.

19. Ki speransa nos tin pa futuro?

¹⁹ Pronto, Yehova lo seka tur lágrima di tur kara. Lo no tin malesa ni morto mas. (Rev. 21:​3, 4) “Hende ku tin desabilidat na nan pia lo bula manera biná.” (Isa. 35:​5, 6) E tempu ei, nos lo no sufri mas di e krekechénan di behes ni nos lo no mira nos sernan kerí bira bieu ni bira malu mas. “Hende lo no kòrda riba e kosnan di ántes mas.” (Isa. 65:17) Miéntras ku nos ta warda pa Yehova kumpli ku su bunita promesanan, nos por tin sigur ku semper lo e yuda nos. Si nos sigui dependé riba Yehova, lo e yuda nos “sigui perseverá ku pasenshi i goso.”—Kol. 1:11.