Salú i Medio Ambiente

Dje coresponsal di Spierta! na Nigeria

Tur aña 49 miyon hende ta muri mundialmente. Rond di 75 porciento dje mortonan aki ta prematuro, e motibu siendo relacioná cu medio ambiente contaminá i moda di biba, segun un informe dje Organisacion Mundial di salú (WHO). Considerá algun ehempel:

◼ Cancer ta mata cincu miyon hende tur aña. Segun WHO, hopi di nan “ta debí directamente n’e aumento grandi di humamentu di cigaria den e último 30 aña.”

◼ Malesa di diarea, matando mas cu tres miyon mucha tur aña, hopi bes ta debí na cuminda i awa contaminá, i tambe na falta di limpiesa adecuado.

◼ Tuberculósis, matador di tres miyon hende pa aña, ta plama den pueblo den estado di pobresa i montoná riba otro, specialmente unda cu no tin higiena.

◼ Infeccion respiratorio, principalmente pulmonia, ta mata tres i mei miyon mucha bou di cincu aña di edad tur aña. Hopi ta biba den stad unda cu tin nivel haltu di contaminacion di aire.

Ademas di morto asina, tur aña un dos i mei mil miyon—casi mitar di poblacion di mundu—ta sufri di malesa como resultado di no tin suficiente awa of awa contaminá i falta di higiena. Ademas, situacionnan actual tal como yobida di ácido, debilitamentu di e capa di ozon, i aumento mundial di temperatura, WHO ta relacioná cu empeoramentu di salú di hopi hende. En general, segun e informe di WHO, mas cu dos mil miyon hende ta biba den medio ambiente cu ta peligroso pa bida of pa salú.

Dr. Hiroshi Nakajima, director general di WHO, a advertí: “Si nos no ta dal paso awor, e crísis p’e planeta i pa habitante di dje lo bira intolerablemente severo, cu un medio ambiente cu nos no por sostené mas.”

Bijbel ta primintí cu lo tin un tempu ora “ningun residente lo bisa: ‘Mi ta malu.’” (Isaías 33:24) Esfuerso di hende no por alcansá esei, sino e Reino di Dios, cu lo eliminá malesa i loke ta causa nan.—Revelacion 21:3, 4.

[Plachi Rekonosementu na página 24]

Godo-Foto